Obadiah 1 - Iñupiatun Mumiksat Uqalugiksuat

¹ Uvva kiliktuutaa Obadiah-m, Kamanaqtuam Atanġum uqallautaagun nunaqpauruaq Edom pisigivlugu. Atanġum tiliŋagaa kiliktuiri nunauruanun, aasii tusaaŋagikput kiliktuutaa: “Itqanaiyaġitchi! Aŋuyagiaġlakput nunaqpaŋa Edom!”

Atanġum Tatavsaġniaġaa Edom

² Atanġum uqallautigaa nunaqpaŋa Edom, “Qapaŋasipkaġniaġikpiñ; iñupayaat suuŋiḷaġiliġñiaġaatin.

³ Kamanniraaġutikpich sagluqipkaġaatin. Annaummiviqaqtutin aulayaitchuamik uyaġagmi; qutchiksuami iġġimi aimaaġviqaqtutin, tavraasii uqallakhutin iliŋnun inna, ‘Kia nuqitchumiñaqpaŋa anmun?’

⁴ Aimaaġviḷiuġaluaqtutin qutchiksivḷugu tiŋmiaqpaich ugluŋisitun, iḷivlugulu akunġanniittuatun uvluġiat, aglaan nuqitchumiñaġikpiñ anmun.

⁵ “Tigligayuktit qaigamik unnuami, tigliguurut pisuktamignik kisian. Iñuich pukukkamik grape-nik siiġñanik unitchił̣auraġuurut. Aglaan akiḷḷiivich suksraiġutipiaŋagaatin.

⁶ Kiŋuniiguruasii Esau-mun, piqpagnaqtuat suġauttasi tigligaŋagaich.

⁷ Ikayuqtikkaluavsi sagluqiŋagaasi; nunavsiññiñ aninŋagaasi. Iḷauraaġiŋagaluaqtavsi akiiḷiŋagaasi. Avilaitqatikkaluavsi niġiqatikaavsi pitqiksiġautiŋagaasi; innaqtut ilikkun, ‘Immaimña nauŋ pisaasuġniq pigisuuŋaraa?’

⁸ “Uvlumi tatavsaġupku nanaqpaŋa Edom, suksraunġiġñiaġitka pisaasuqtuat iñuŋi suli isumattutaiġḷugi.

⁹ Aŋuyaktiŋich Teman tatamaalaniaqtut, suli iluqaġmik aŋuyaktiŋich Edom tuqutauniaqtut.

Patchisauruat Edom Tatavsaqtaumman

¹⁰ “Tigligaikavsigiḷḷu tuquġaqavsigiḷḷu nanmiñiq iḷasi, kiŋuvaaguruat Jacob-mun, tuqutauniaqtusi suli suksraunġiqsaulusi isuitchuamun.

¹¹ Igḷiqsaaqsiññaŋarutin taimani uvlumi akiḷḷiiŋisa upkuaqpaiyaqtaġmatigik. Piḷuktigiŋarutin maaniġmiuguŋitchuatun aullaurriruatun Jerusalem umialgutiŋiññik aasii autaaqługich avanmun.

¹² Kamanniraaŋitchin imma aŋalamaqłuktauniŋatigun nanmiñiq iḷakpich Judah-miittuat. Quyyatigiŋirruŋ imma uvluq suksraunġiqsauviat. Iglautigiŋaitkich imma nagliksaaqtitaummata.

¹³ Iñugiraġma nunaŋanuktuksrauŋiñŋagaluaqtutin kamasaaġvigiyyaġlugich nagliksaaqtuat suli suġauttaiyaġiaġlugich umialgutiŋiññik tavrani uvlumi nagliksaaġmipkaqługich.

¹⁴ Kayyaagni makitaruksrauŋiñŋagaluaqtutin sapisuglugich qimaaruat. Tigupkaqtuksraġiŋaiñŋagaluaġitin akiḷḷiiŋiññun tavrani uvlumi nagliksaaġvianni.

God-im Isivġiġñiaġai Nunaqpauruat

¹⁵ “Uvluq qalliruq Uvaŋa Atanġuruaŋaa, isivġiiviksraġa nunauruapayaanik. Edom-miuguruasii, savaaġiŋaratin savaaguniaġmiut iliŋnun. Utiġviginiaġaatin savaaġiŋaraqpich.

¹⁶ Iñugiraġma akuqtuaġiŋagaat tatavsaun salumaruami uvaŋa qimiqqamni. Aglaan avativsiññiittuat nunaqpaich akuqtuaġiniaġaat tatavsaun imiġmatun qakkiññałhaaqtuamik imaligmik qallunmik; iluqaan akuqtuaġiniaġaat aasii suksraunġiqsaulutik taimuŋa.

Akimaniŋa Israel-gum

¹⁷ “Aglaan Iġġiani Zion iḷaŋich annagniaqtut, aasii taamna salumaruaguniaqtuq ini. Iñuŋisa Jacob pigiliutiniaġaat nanmiñiq nunaktiŋ.

¹⁸ Iñuŋich Jacob-guvlu Joseph-guvlu igniqtun iḷiñiaqtut; suksraunġiġñiaġaich iñuŋich Esau-m igniqtun suksraunġiqsiruatun. Kiŋuniġupayaaqtuaq Esau-mun annagniaŋitchuq. Uvaŋa, Atanġuruaŋaa, uqallaktuŋa.

¹⁹ “Iñuich samanitchiani Judah-m ittuat iññiġñiaġaat Edom; avanitchianiittualli salliñġanni iġġich nunannaktaaġiniaġaat Philistia. Israel-miugurualli piññaktaaġiniaġaik nunaŋik Ephraim-guvlu Samaria-vlu; iñuŋisali Benjamin-gum piññaktaaġiniaġaat Gilead.

²⁰ Anitauŋaruat iñuich paanitchianiñ Israel utiġniaqtut aasii pisaġilugu Phoenicia takpauŋaaglaan Zarephath-mun. Anitauŋammiruat Jerusalem-miñ Sardis-miittuat pisaġiniaġaich inauruat samanitchiani Judah-m.

²¹ Akimaruat iñuŋich Jerusalem-miut akiiḷiñiaġaich Edom iñuŋich aasii atanniqsuliġḷugi. Aasii ilaa Ataniq umialguniaqtuq.”