Numbers 9 - Iñupiatun Mumiksat Uqalugiksuat

Tugliŋa Qulaurrusiqiniġum

¹ Atanġum uqautigaa Moses Sinai Desert-mi sivulliġmi tatqimi ukiutqigman Israel-gum kiŋuvaaŋich aullaġmata-qaŋa Egypt-miñ. Uqallaktuq,

^2-3 “Uvlut akimiaġutaiḷaŋanni (14th) uumani tatqimi, isagutisaaġlugu siqiñiq nipikpan, Israel-gum kiŋuvaaŋich Qulaurrusiqiruksraurut maliġuaġlugich piraksriutauruallu aŋalanniŋallu maliġiraksriat.”

⁴ Tavra Moses-gum uqautiŋagaich iñuich Qulaurrusiqitquvlugich

⁵ aasii siqiñiq nipimman akimiaġutaiḷaŋanni (14th) uvlut sivulliġmi tatqimi nalautinŋagaat Sinai Desert-mi. Iñuich savaŋagaat sunapayaaq Atanġum piraksriutaatun Moses-mun.

⁶ Aglaan iḷaqaŋarut iñuich piraġausikun salumaiḷiŋaruanik aksiŋavlutiŋ tuquŋaruam timaanik, aasii iḷaksruutiyumiñaiñŋaniqsut Qulaurrusiqiruani taaptumani uvlumi. Ullautiŋarut Moses-mun Aaron-mullu,

⁷ aasii uqallakłutiŋ, “Salumaitchugut aksiŋavlugu tuquŋaruam timaa, aglaan summan minitaugaqsivisa aitchuutiksraunmun Ataniġmun piqatigilugich Israel-gum kiŋuvaaŋich?”

⁸ Moses kiugai, “Utaqqiuraallagitchi piraksriusiaqaġataqtilluŋa Ataniġmiñ.”

⁹ Atanġum uqallautigaa Moses

¹⁰ uqallautitquvlugich Israel-gum kiŋuvaaŋich inna, “Ilivsi naakka kiŋuvaaġirasi salumaiŋaniqpata aksiksiŋavlutiŋ tuquŋaruam timaanik naagga piił̣ł̣usi aullaaŋavlusi, Qulaurrusiqisukkuvsi

¹¹ piyumiñaqtusi tatqiq qaaŋianikpan, anaqasaaġniŋani akimiaġutaiḷaŋanni (14th) uvlut tavrani tatqimi. Niqinaqivigilugu puvlaksautaitchuamik punniġmik suli tipigluktuanik naurianik.

¹² Iḷakunasigik niqit uvlaaġataqtillugu naakkaunnii navignasigik niġrutit sauniŋich. Qulaurrusiqiruksraurusi maliġuaġlugich piraksriutipayaat.

¹³ Aglaan piraġausiq nalaullugu salumaruaguguvsi iglauŋiḷḷusiḷu, aasii iḷauŋitkuvsi Qulaurrusiqiruani, iḷauŋaiġñiaqtusi iñugiramnun, qanukkii aitchuutiqaŋitchusi uvamnun piviksraq nalautinman. Igḷutuqtaksraġigiksi tatavsausiaksraŋa piḷuutivsi.

¹⁴ “Allaniñ nunaniñ akunnavsiññi iñuuniaqtuat Qulaurrusiqisukpata, maliġiraksraġigaich iluqaisa piraksrallu maliġiraksriallu. Pitquraq atiruq kimupayauraq, nutim tamaaniitkaluaqpata naakka allaniŋŋaqtaugaluaqpata.”

God-im Aullatimmagich Nuviyakun

^15-16 Uvlumi nappaġmarruŋ Tupiq Atanġum nayuqtauvia, nuviya niptaġaqtuq aasii taluvlugu Tupiq. Unnuaġmagu nuviya igniqtun iḷiḷḷaavluni.

¹⁷ Nuviya qunmugaġimman, Israel-gum kiŋuvaaŋich aullaġaqtut, aasii nullaġaqtut nuviya nutqaġman.

¹⁸ Iñuich aullaqiraqtut piraksriutaagun Atanġum, piraksriutaagun-suli nullaġmivḷutiŋ. Nuviya aulaŋiñman qulaani Tupqum, nullaummisuurut.

¹⁹ Iḷaanni nuviya Tupqum qulaaniittaqtuq sivisuruami, kamagivlugu Ataniq nullaummisuurut.

²⁰ Iḷaanni qavsiqiurani uvluni nuviya qulaaniittaqtuq Tupqum; Atanġum piraksriutaagun nullaġaqtut, aasii suli piraksriutaagun aullaġmivḷutiŋ.

²¹ Iḷaanni suli nuviya qulaŋiusimaraqtuq unnuapałhiñaq, aasii aullaqimmivḷutiŋ qunmupqauraġman. Aullaqiraqtut, nuviya qunmugaġimman.

²² Uvlut malġuugaluaqpata, tatqiq naatkaluaqpan, ukiuq naatkaluaqpan, naaggaunnii sivisułhaaġluni, tavra nuviya qulaaniinman Tupqum, aullalaitchut; qunmugman aglaan, aullallaavlutiŋ.

²³ Nullaqłutiglu aullallaavlutiglu piraqtut kamagivlugu piraksriutaa Atanġum Moses-kuaqługu.