Numbers 8 - Iñupiatun Mumiksat Uqalugiksuat

Inillagmatigik Nannich

¹ Atanġum uqallautigaa Moses,

² “Uqallautisaġiñ Aaron iḷikpagich tallimat maḷġuuruat nannich naniqaġvigñun, inillaqulugich qaummatitchumiñaqsiḷugich sivuġaŋiññun naniqaġviich.”

³ Aaron kamaksrivḷuni inillaŋagaich nannich saałługu sivuġaŋa naniqaġvium.

⁴ Naniqaġvik iluqaan savaaguŋaruaq kauktamik kaviqsuamik manigmik, qiñiyunaqsaqługu nautchiatun ittuanik maliġivlugu tuvraaksriutaa Atanġum qiñiqtittaŋa Moses-mun.

Salummaqtauniŋallu Ilaaguaqtauniŋallu Levi-m Kiŋuvaaŋisa

⁵ Atanġum uqallautigaa Moses,

⁶ “Iliŋiguaġlugich Levi-m kiŋuvaaŋich allaniñ Israel-gum kiŋuvaaŋiññiñ aasii salummaġlugich

⁷ inna: siqił̣ł̣aktiġlugich imiġmik salummautauruamik aasii nusaiyaġluni tamatkiġlugu timaa iqaġilugiḷḷu annuġaatiŋ. Tainna tavra pigumiŋ inmigñik salumasiñiaqtut.

⁸ Tavraasii piḷutiŋ pamiqsaamik aŋusalluayaamik aitchuutiksramiglu palauvaksramik akunŋaruamik olive uqsruanik; ilvich aasii allamik pamiqsaamik aŋusalluayaamik piḷutin piḷuunmun aitchuutiksramik.

⁹ Aasii atautchimuktillugich iluqaisa Israel-gum kiŋuvaaŋich aasii Levi-m kiŋuvaaŋich makitillugich sivuġaannun Tupqum nayuqtauvigma.

¹⁰ Israel-gum kiŋuvaaŋich argatiŋ iḷiruksraġigaich niaquŋiññun Levi-m kiŋuvaaŋich,

¹¹ aasii tavra Aaron-gum ilaaguaqtaġiniaġaich Levi-m kiŋuvaaŋich, nalunaiqsaġlugu nuimaniŋa aitchuutauruam uvamnun Israel-gum kiŋuvaaŋiññiñ, savaaqaġumaut savaamnik.

¹² Levi-m kiŋuvaaŋich argatiŋ iḷigisigaich niaquŋigñun malġuk immuliviik aŋusalluŋiksa; atausiq aitchuutaulugu piḷuunmun suli igḷua ikipkautikun aitchuutaulugu, nalautitchaġlugu piraġausiq salummaġniŋannun Levi-m kiŋuvaaŋich.

¹³ “Ilaaguaqtaġilugich Levi-m kiŋuvaaŋich piqpagnaqtuakun aitchuutauyumaut uvamnun, aasii Aaron-lu iġñiŋiḷḷu aullarriġuġlugich iliŋiññun.

¹⁴ Inna iliŋiguaqtuksraġigitin Levi-m kiŋuvaaŋich allaniñ Israel-gum kiŋuvaaŋiññiñ, uvaŋa pigiyumagitka.

¹⁵ Salummaqtaġianikkupkich suli iliŋiguaġlugich Levi-m kiŋuvaaŋich, piksraqtaaguvlutiŋ savallaruat Tupiġmi Atanġum nayuqtauviani.

¹⁶ Piksraqtaaġipiallaŋagitka inaŋiutivlugich iluqaiññun aŋayukłiġiraŋiññun Israel-gum kiŋuvaaŋich, uvaŋa kisima piginiaġitka.

¹⁷ Ilaaguaqtaġiŋavlugich uvaŋa pigisukługich aŋayukłiich iġñiŋich Israel-gum kiŋuvaaŋisa aŋayukłiŋiḷḷu niġrutipayaaŋisa, taimani tuqunnapkich aŋayukłiupayaaqtuat Egypt-mi.

¹⁸ Piksraqtaaġigitka Levi-m kiŋuvaaŋich inaŋiqsaġlugich aŋayukłiich Israel-gum kiŋuvaaŋich,

¹⁹ aasii qaiñŋagitka Levi-m kiŋuvaaŋich Aaron-mullu iġñiŋiñullu, aitchuutauvlugich Israel-gum kiŋuvaaŋiññiñ, savautitquvlugich iñuich Tupiġmi suli qaunagitquvlugich Israel-gum kiŋuvaaŋich suksraunġiqsauniksraŋanniñ qallivaitparruŋ Salumaniqsrauruaq Ini.”

²⁰ Tavraasii Moses-guvlu, Aaron-guvlu iluqatiglu Israel-gum kiŋuvaaŋich ilaaguaqtaġiŋagaich Levi-m kiŋuvaaŋich, Atanġum piraksriutaatun Moses-mun.

²¹ Levi-m kiŋuvaaŋich salummaŋarut ilimignun iqaġivlugiḷḷu annuġaatiŋ, aasii Aaron-gum ilaaguaqługich aitchuutigiŋagaich Ataniġmun. Piraġausiq suli nalaułługu salummaŋammigaich.

²² Tavra Levi-m kiŋuvaaŋich piksraqtaaguvlutiŋ savallaruat Tupiġmi Atanġum nayuqtauviani aullarriqaqłutiŋ Aaron-miglu iġñiŋiññiglu. Iñuich savaŋarut supayaamik Atanġum piraksriutaatun Moses-mun Levi-m kiŋuvaaŋisigun.

²³ Atanġum uqallautigaa Moses,

²⁴ “Iñuiññaq tallimaniñ aglaan (25) ukiuqaqtuat Levi-m kiŋuvaaŋich savaksaġniaqtut Tupiġmi Atanġum nayuqtauviani,

²⁵ ukiunikkumiŋ malġukipiaq qulitun (50) savaŋaiġñiaqtut.

²⁶ Taamna pianikpan ikayuġumiñaġaich kiŋuvaaqatiini savaktuat Tupiġmi, aglaan savaktuksrauŋitchuq kisimi. Tainna tavra aŋalanniaġisi savaaġiniaqtaŋich Levi-m kiŋuvaaŋisa.”