Numbers 7 - Iñupiatun Mumiksat Uqalugiksuat

Aitchuutiŋich Aullarrich

¹ Taaptumani uvlumi Moses nappaiganigataqami Tupqanik Atanġum nayuqtauviata, nalunaiqsaġiŋagaa suli ilaaguaqtaġivlugu Tupiq suġautapayauraŋiḷḷu, suli ikipkaivigḷu savaluutipayaaŋiḷḷu.

² Tavraasii iḷagiiksuat qaukłiġiraŋich maŋŋuġiraŋisa Israel, taapkua kisitchimmata aullarrigiraŋich,

³ qaġġirriŋarut aitchuutimignik Ataniġmun: itchaksranik usiaqtuutinik aksraliktuanik, qulit malġuk (12) qimuktinik, atausiullaavlugu usiaqtuun aksraliktuaq malġuuruagnun aullarrignun suli qimukti atausiq aullarriḷḷaamun. Aitchuutigianigmatigik saaŋani Tupqum,

⁴ Ataniq uqallaktuq Moses-mun,

⁵ “Akuqtuqsigik taapkua aitchuutauruat atuġumagaich savaaġiraksraġiramignun Tupiġmun; qaiḷḷugich Levi-m kiŋuvaaŋiññun sunik savaaksrautillaaqaqpata.”

⁶ Tavraasii Moses-gum qaiñŋaniġaich usiaqtuutit aksraliktuat qimuktillu Levi-m kiŋuvaaŋiññun.

⁷ Qaitchiñiqsuq malġugnik usiaqtuutignik aksraliktuagnik suli sisamanik qimuktinik Gershon-gum kiŋuvaaŋiññun,

⁸ suli sisamat usiaqtuutit aksraliktuat tallimat piŋasullu qimuktit Merari-m kiŋuvaaŋiññik. Savaaksrautaalli savaaġiyumaaqtaŋat aullarriqaġlutiŋ Ithamar-mik iġñiŋanik Aaron.

⁹ Aglaan Moses qaitchiŋaiñŋaruq usiaqtuutinik aksraliktuanik naakka qimuktinik Kohath-gum kiŋuvaaŋiññun, qanukkii salumaruat suġġauttat qaunagiraŋich nanmaktaksraġivlugich.

¹⁰ Aullarrich aitchuutiligaaŋammiut ilaaguaqtausaqpan ikipkaivik. Itqanaiyaġmata qaitchaqługich aitchuutitiŋ ikipkaivigmun,

¹¹ Atanġum uqallautigaa Moses, “Uqautikkich uvlutuaġaġikpan qulit malġugni (12) uvluni iḷaŋat aullarrich qaitchigisiruq aitchuutimiñik ilaaguaqtauniksraŋanun ikipkaivium.”

^12-83 Qaisaġiŋagaich aitchuutitiŋ ukunatitun: Uvluq Maŋŋuuruat Aullarriŋich Sivulliġmi uvlumi Judah Nahshon iġñiŋa Amminadab Tuglianni uvlut Issachar Nethanel iġñiŋa Zuar-m Piŋayuanni uvlut Zebulun Eliab iġñiŋa Helon-gum Sisamaŋanni uvlut Reuben Elizur iġñiŋa Shedeur-m Tallimaŋanni uvlut Simeon Shelumiel iġñiŋa Zurishaddai-m Itchaksraŋanni uvlut Gad Eliasaph iġñiŋa Deuel-gum Tallimat malġuanni uvlut Ephraim Elishama iġñiŋa Ammihud-gum Tallimat piŋayuanni uvlut Manasseh Gamaliel iġñiŋa Pedahzur-m Quliŋŋuġutaiḷaŋanni uvlut Benjamin Abidan iġñiŋa Gideoni-m Quliŋanni uvlut Dan Ahiezer iġñiŋa Ammishaddai-m Qulit atausiŋanni (11) uvlut Asher Pagiel iġñiŋa Ochran-gum Qulit malġuanni (12) uvlut Naphtali Ahira iġñiŋa Enan-gum Aitchuutit qaġġisiraŋich iñullaam atiruaguŋarut: atausiq iḷuturuaq puggutauraq qatiqtuamiñ manigmiñ piḷiaq uqumaisilaaqaqtuaq malġukipiaq qulit (50) ounces-tun suli atausiq iḷuturuaq puggutauraq qatiqtuamiñ manigmiñ piḷiaq uqumaisilaaqaqtuaq Iñuiññaq qulit (30) ounces-tun, inillaŋaruakun maliġiraksrakun, iluqatik siḷivinŋavlutiŋ palauvagmik akunŋaruamik uqsrumik palauvaksranun aitchuutiksranun; atausiq kaviqsuaq manik puggutauraq uqumaisilaaqaqłuni sisamatun ounces-tun, siḷivinŋavluni ikipkautikun tivraġiksaunmik; atausiq nutauruaq aŋusalluq, atausiq aŋusalluq imnaiq, suli atausimik ukiuqaqtuamik imnaiyaamik, ikipkautiksramik; atausimik nagruligmik piḷuunmun aitchuutiksramik; suli malġugnik aŋusallugnik, tallimanik aŋusallunik imnaiñik, tallimanik nagrulignik, suli tallimanik atausimik ukiuqaqtuanik imnaiyaanik, iḷammiuġunmun aitchuutiksranik.

Uvluq Maŋŋuuruat Aullarriŋich

^84-88 Katiłługich aitchuutit qaġġirraŋich qulit malġuuruat (12) aullarrich ilaaguaqtausaġman ikipkaivik iñugiaktilaaqaŋarut ukunatun: qulit malġuk (12) puggutaurat qatiqtuamik manigmiñ piḷiat suli qulit malġuk (12) iḷuturuat puggutaurat qatiqtuamik manigmiñ piḷiat uqumaisilaaqaqhutiŋ piŋasukipiatun (60) pounds-tun qulit malġuk (12) puggutaurat kaviqsuamik manigmiñ piḷiat uqumaisilaaqaqhutiŋ katiłługich malġukipiaq tallimat piŋasut (48) ounces-tun, imaqaqhutiŋ ikipkautikun tivraġiksautinik qulit malġuk (12) pamiqsaat, qulit malġuk (12) imnaich aŋusallut, suli qulit malġuk (12) atausimik ukiuqaqtuat imnaiyaat, iḷaqaqhutiŋ palauvaksranik aitchuutauniaqtuanik, ikipkautikun aitchuutiksranik qulit malġuk (12) nagrulgich piḷuunmun aitchuutiksrat iñuiññaq sisamat (24) aŋusallut, piŋasukipiat (60) imnaich aŋusallut, piŋasukipiat (60) nagrulgich, piŋasukipiat (60) atausimik ukiuqaqtuat imnaiyaat, iḷammiuġunmun aitchuutiksrat.

⁸⁹ Moses isiġami Tupiġmun uqaqatigisaqtuqługu Ataniq, tusaagaa Ataniq uqaurriñi qulaaniñ matuata Sivunniuġutikun Kiguunniġum, akunġagni malġuk isaġuligaak cherubim.