Numbers 5 - Iñupiatun Mumiksat Uqalugiksuat

Salumaitchuat Iñuich

¹ Atanġum uqallautigaa Moses,

² “Piraksrikkich Israel-gum kiŋuvaaŋich anitqulugich iluqaisa naŋirrutiqaqtuat uviñimiktigun, timimiktigun maqiuqtuaqtuat, iluqaisalu salumaiḷiŋaruat aksiŋavlugich tuquŋaruat.

³ Anillich iluqaisa piraġausikun salumaitchuaguruat iñuich, salumaiḷiŋitchumagaat nullaummivik, iñuuviga akunġanniiłłuŋa iñugiraġma.”

⁴ Israel-gum kiŋuvaaŋich kamaksrivḷutiŋ anitkaich iluqaisa salumaitchuat nullaummivigmiñ.

Natqiksruutit Pimaqłuktautinun Allanun

⁵ Atanġum uqallautigaa Moses

⁶ ukuniŋa piraksriqsuutauruanik Israel-gum kiŋuvaaŋiññun: nalliqsi iḷumutuuŋitchuaq Ataniġmun piḷuktualiqiluni akiḷḷiġilugu alla iñuk,

⁷ quliaqtaksraġigiksi piḷuutiksi aasii natqiglugu akiḷiunmik naamaruamik, iḷalugu 20 percent-tun, pimaqłuŋaraġnun.

⁸ Aglaan taamna iñuk tuquaniŋaniqpan suli nanmiñiq iḷaiḷḷuni akiiḷaiġviksramik, akiḷiutaa aitchuutauniaqtuq Ataniġmun tuttillugu aŋaiyyuliqsiqpagmun. Taamna akiḷiun iḷauniaqtuq aŋusallumun imnaimun piraġausiq nalaullugu salummaqtauniŋanun pasirauruam.

⁹ Aasii-suli ilaaguaqługu aitchuigumiŋ Israel-gum kiŋuvaaŋich Ataniġmun aŋaiyyuliqsiqpaum akuqtuiruam piginiaġaa.

¹⁰ Aŋaiyyuliqsillaam pigisuuniaġaich aitchuutauruat ilimiñun.

Nuliaguruat Tuvaaqatiqaqtuat Iḷimasuktuanik

¹¹ Atanġum piraksriġaa Moses

^12-14 Israel-gum kiŋuvaaŋich piraksriquvlugich ukuniŋa: iḷaanni nalautitpan aŋun iḷimasugluni aġnaqtiŋ allatuġnasugilugu salumaiḷiŋaluni inmiñun. Aglaan uiguruaq nalupqisugluni, nuliaŋa suiḷauriŋakpan iḷisimaraiḷḷuni, suli aŋupkaŋaiḷḷuni. Naakkaunnii uiguruam iḷimagikpauŋ nuliani, allatuqatiqaŋaitkaluaqtillugu.

¹⁵ Nallipayaaŋaktigun nalautitkaluaqpan aŋutim nuliani aŋaiyyuliqsiqpagmuutiruksraġigaa. Aitchuiruksrauruq malġuktun pounds-tun uqumaisigiruaq barley palauvak, aglaan uqsriġñiaŋitkaa olive uqsruanik naakkaunnii iḷisiḷuni tivraġiksaunmik, qanukkii iḷimasuktuamiñ uiguruamiñ aitchuutauruq, iḷumun ittuaq nalunaiqsaġlugu.

¹⁶ Aŋaiyyuliqsiqpaum aġnaq saavitittuksraġigaa aasii makitillugu sivuġaanun Atanġum.

¹⁷ Kuvisiḷuni salumaruamik imiġmik puggutauramun savaamik qikumiñ aasii nunaviñiksraġluni natqaniñ Tupqum Atanġum nayuqtauvianiñ aasii imiġmuglugu.

¹⁸ Tavraasii aŋivillugich aġnam nusaŋich aasii iḷiḷugu aitchuutauruaq palauvak argaŋiñun. Aŋaiyyuliqsiqpaum tigummiñiaġaa puggutauraq imalik tipigluktuamik imaġmik piaġiiḷipkaiḷḷaruamik.

¹⁹ Aŋaiyyuliqsim aġnaq unniqsuqłiipkaġniaġaa: “Allatuŋaitkuvich, aksiktauniaŋitchutin piaġiitchuamun imiġmiittuamun.

²⁰ Aglaan allatuŋaguvich,

²¹ Atanġumtuq atqiñ piaġiitchualiuġumagaa takkuanni iñuuqatikpiñ. Illian-tuq ugligli narraallu puvilluni.

²² Unatuq imiq piaġiitchuaq timignugli aasii narraan puvitillugu illiallu ugliktillugu.” Aġnaq inna kiggutiqaġniaqtuq, “Ii, taamna tainna illi. Aamian.”

²³ Aŋaiyyuliqsiqpaum agliutigisigaa taamna piaġiitchuaq aasii aglaich uaqtillugich tipigluktuamun immamun.

²⁴ Imiqtinŋaiñŋaan aġnaq imiġmik piaġliuġutauniaqtuamik,

²⁵ aŋaiyyuliqsiqpaum pigisigaa aitchuutauruaq palauvak aġnam argaŋiñiñ, isaaġutigisigaa ilaaguaqtaġilugu Ataniġmun, aasii tigumiaġlugu ikipkaivigmun.

²⁶ Tavraasii piksraġisiruq utummagmiñun nalunaiñŋutaġisaġlugu aitchuun aasii ikipkaivigmi ikipkautigilugu. Aqulliulugu, aġnaq imiqtinniaġaa taavrumiŋa imiġmik.

²⁷ Allatuŋaniqpaŋ imġum kiiqsiuliqsinniaġaa; narraaŋa puvilluni illialu ugligniaqtuq. Ilaata atqa piaġiitchuaġuġniaqtuq iñuuniaqatiimiñi.

²⁸ Aglaan patchisaiññiġumi, anniutiqaġniaŋitchuq suli miqłiqsiḷḷaniaqtuq.

^29-30 Taamna pitqurauruq aŋun saŋiaksimakpan suli iḷimasuliġḷuni nuliani allatuġasugilugu. Aġnaq makittuksrauniaqtuq sivuġaanun Atanġum, aasii aŋaiyyuliqsiqpaum piraġausiq savaaġiniaġaa.

³¹ Uiguruaq patchisaiññiaqtuq, aglaan aġnaq pasiraukpan, tatavsaqtauniaqtuq.