Numbers 4 - Iñupiatun Mumiksat Uqalugiksuat

Savaaksrautiŋich Kohath-gum Kiŋuvaaŋisa

¹ Atanġum uqallautigaik Moses-lu Aaron-lu

² kisitchitquvlugik Levi-m kiŋuvaaŋiññiñ Kohath-gum kiŋuvaaŋiññik, iḷagiiksuatigullu, aŋayuqaaġiiksuatigullu,

³ suli agliutilugich iluqaisa aŋutit ukiuqaqtuat iñuiññaq quliniñ (30) malġukipiaq qulinun aglaan (50) piksraqtaaguvlutiŋ savallaruat Tupiġmi Atanġum nayuqtauviani.

⁴ Uvva savaaŋat Kohath-gum kiŋuvaaŋisa Tupiġmi Atanġum nayuqtauviani: savaaqaġniaqtut salumapiaġataqtuanik.

⁵ Aullaġnaqsiraġikpata, Aaron iġñiniḷu isiġniaqtut Tupiġmun, talukiyaaq piiġḷugu sivuġaaniittuaq Sivunniuġutim Kiguunniŋata, aasii matulugu Kiguunniq taaptumiŋa.

⁶ Qitummaaġiksuamik qisisamik matulugu, suŋauraaqtaamiglu ukił̣haamik matulugu, aasii iviqtillugik akigautik.

⁷ Suŋauraaqtaamik ukił̣haamik taluniaġaat niġġivik punniġum aitchuutauruam Ataniġmun irvianun aasii tavruŋaġlugich puggutaurat, qallutit, iḷuturuanik puggutauranik aitchuutiqaġviksranik, wine-qaġvigniglu. Inniaqtuq punniq iñiġlugu niġġivigmi.

⁸ Kaviqsuamik ukił̣haamik taapkua iluqaisa matulugich, qitummaaġiksuamik qisisamik matulugu aasii iviqtillugik akigautik.

⁹ Suŋauraaqtaamik ukił̣haamik taluniaġaat naparuaq naniqaġvik, naniŋiḷḷu, tiguullautiŋiḷḷu, aġraliqullu, iluqaisalu nannich uqsruksraŋisa puuŋich.

¹⁰ Nimmaaġniaġaich taputilugich suġauttapayauraŋich qitummaaġiksuamun qisisamun aasii iḷiḷugich akigaunmun.

¹¹ Isivinniaġaat suŋauraaqtaaq ukił̣haaq qaaŋanun ikipkaivium savaaguruam kaviqsuamik manigmik, aasii matulugu qitummaaġiksuamik qisisamik, iviqtillugik aasii akigautik.

¹² Iluqaisa niġiñiutit atuġuuraŋich Salumaruami Inimi piruksraġigaich, nimmaaġutilugich suŋauraaqtuamun ukił̣haamun, qitummaaġiksuamik qisisamik matulugich, aasii iḷiḷugich usiaġvium avaluanun.

¹³ Aġraiyaġlugu patukpagmiñ ikipkaiviḷiaq aasii matulugu tigluuraaqtaamik ukił̣haamik.

¹⁴ Tavruŋaġlugich iluqaisa atuġuuraŋich ikipkaivigmi: aġraliqutit, kakiurat, piksrugaurat, iḷuturuallu puggutaurat. Qitummaaġiksuamik qisisamik matulugich aasii iviqtillugik akigaunnaŋik.

¹⁵ Aaron-guvlu iġñiŋiksalu matuuganikpatigich salumaruat suġauttapayaurat, aullaġnaqsikpata kisian, Kohath-gum kiŋuvaaŋisa tigumiaġiaġniaġaich. Aglaan aksiktuksraġiŋitkaich salumaruat suġauttaŋich, atakkii tainna pituaġumiŋ tuquniaqtut. Kohath-gum kiŋuvaaŋisa tigumiaġniaġaich tamatkua iḷuaniittuat Tupqum Atanġum nayuqtauviata.

¹⁶ Eleazar-m iġñiŋata Aaron-gum, aŋaiyyuliqsiqpauruam, aŋalanniaġaa iluqaan Tupiq suli uqsruŋat nannich, tivraġiksautit, palauvaksrat aitchuutiksrat, uqsruqtaaġun, suli supayaat Tupiġmiittuat ilaaguaqtauŋaruat Ataniġmun.

¹⁷ Atanġum uqallautigaik Moses-lu Aaron-lu,

¹⁸ “Iḷaŋich Kohath-gum

¹⁹ tuqutaupkaġnasigik qallipkaġlugich ukunuŋa salumaruanun suġauttanun. Tainnaquŋiḷḷugich, inna savautiniaġisi: Aaron-lu iġñiŋiglu isiġniaqtut aasii iñullaa piraksriqsuġlugu sunik tigumiaġniaqtilaaŋa.

²⁰ Uvvakii Kohath-gum kiŋuvaaŋich isiqtuksrauŋitchut aasii tautuglugich salumaruat suġauttat, qanukkii tuquniaqtut.”

Piraksrautiŋich Gershon-gum Kiŋuvaaŋisa

²¹ Atanġum uqautigaa Moses

²² kisitchitquvlugu kiŋuvaaŋiññik Gershon-gum iḷagiiksuatigullu, aŋayuqaaġiiksuatigullu,

²³ suli agliutilugich aŋutipayaat ukiuqaqtuat iñuiññaq quliniñ (30) malġukipiaq qulinun aglaan (50) piksraqtaaguvlutiŋ savallaruat Tupiġmi Atanġum nayuqtauviani.

²⁴ Savaaġiniagaich tigumiaġlugiḷḷu ukua:

²⁵ Tupiq, iḷulliq taluŋa, qitiqłiq taluŋa, qisigiksaaq qalliq taluŋa, talukiyaaŋa paaŋata,

²⁶ talukiyaallu akłunaallu siḷalliata avataaniittuat Tupqum, talukiyaaŋich paaŋata siḷallium, suġauttaŋiḷḷu nappaisaġmata taapkuniŋa. Savaaġiniaġaat sunapayaaq savaaksrauruaq taapkuniŋa savakpata.

²⁷ Moses-guvlu Aaron-guvlu qaunaginiaġaich Gershon-gum kiŋuvaaŋich savagniaqtilaaŋiñik savaaksrautipayaamignik piraksriusiamiktitun Aaron-miḷḷu iġñiŋiññiḷḷu.

²⁸ Uvva ukuniŋa piraksriusiaqaqtut iḷagiraŋich Gershon Tupiġmi; savaaġiniaġaich aullarriqaġlutiŋ Ithamar-mik aŋaiyyuliqsiqpaum Aaron-gum iġñiŋanik.

Savaaksrautiŋich Merari-m Kiŋuvaaŋisa

²⁹ Atanġum uqallautigaa Moses kisitchitquvlugu kiŋuvaaŋiññik Merari-m iḷagiiksuatigullu, aŋayuqaaġiiksuatigullu,

³⁰ agliutilugiḷḷu aŋutipayaurat ukiuqaqtuat iñuiññaq quliniñ (30) malġukipiaq qulinun aglaan (50) savakkumiñaqtuat savaamik Tupqani Atanġum nayuqtauviata.

³¹ Savaaqaġniaqtut tigumiaġlugich avaluuŋich, ayaŋich, akigaunnat, suli alliġaŋich Tupqum,

³² suli akigaunnat, alliġaŋich, paugat, suli akłunaaŋich siḷallium avataata Tupqum, savaunnaŋiḷḷu tamatkuniŋa nappaisaqamiŋ. Iñullaa tigumiallaaniaqtuq nalunaiqsallaanik.

³³ Uvva ukua savaaġiniaqtaŋich iḷagiraŋisa Merari-m savaaġigumirruŋ Tupiq; savaaġiniaġaich aullarriqaġlutiŋ Ithamar-mik aŋaiyyuliqsiqpaum Aaron-gum iġñiŋanik.

Kisitchimmata Levi-m Kiŋuvaaŋiññik

^34-48 Ataniq piraksriiganigman, Moses-lu, Aaron-lu, aullarrigiraŋiḷḷu nunaaqqim kisitchiñagutiŋarut piŋayuiguruanik iḷagiiksuanik Levi-m kiŋuvaaŋiññik, Kohath, Gershon, suli Merari-m iḷaŋiñik. Kisiłługich iḷagiiguruatigun suli qitunġaġiiksuatigun aasii agliutivlugich aŋutipayaat ukiuqaqtuat iñuiññaq quliniñ (30) malġukipiaq qulinun aglaan (50) piksraqtaaguvlutiŋ savallaruat Tupiġmi Atanġum nayuqtauviani, ukunatun: Iḷaŋich Iñugiaktilaaŋich Kohath 2,750 Gershon 2,630 Merari 3,200 Katiłługich Iñugiaktilaaŋat: 8,580

Iḷaŋich Iñugiaktilaaŋich

⁴⁹ Aŋutillaa agliutiŋagaat Atanġum piraksriutaatun Moses-mun; suli piraksriutaatun Atanġum Moses-kun, iñullaa savaaksriñŋagaat savaquvlugu naakka tigumiaqtautquvlugu.