Numbers 36 - Iñupiatun Mumiksat Uqalugiksuat

Kiŋuvaannaktaaŋich Uiñiŋaruat Aġnat

¹ Qaukłiġiraŋich qitunġaġiiguruat Gilead-gum iḷagiraŋich, iġñiŋa Machir-m suli tutaalua Manasseh-m, Joseph-gum iġñiŋa, ullautiŋarut Moses-mun suli allanun Israel kiŋuvaaŋisa aullarriŋiññun.

² Uqaqhutiŋ, “Atanġum piraksriqsuġaatin autaaquvlugu nuna Israel kiŋuvaaŋiññun nalautchautikun. Piraksriqł̣usiḷu qaitquvlugu nunaŋa iḷagirapta Zelophehad-gum paniutiŋiñun.

³ Aglaan itqaumarusi, uiñikpata aŋutinik allanik maŋŋuqaqtuanun, tavra nunnaktaaŋat pigiliutiniaġaat taapkua allanik maŋŋuqaqtuat, aasii aktilaaŋa nunannaktaaġirapta uvagut mikłiḷaaġniaqtuq.

⁴ Ukiuŋa Quviasualaniksram Israel kiŋuvaaŋiññun tikitpan, iluqaġmiŋ nunat tuniŋaraŋich utiqtitpata nutim iñuŋiñun, nunaŋat Zelophehad-gum paniŋisa iñiġlugu iḷḷatiniaqtuq taapkunuŋa uiñigvigiraŋisa kiŋuniiŋiñun aasii piiqsauluni maŋŋuptinniñ kiŋuvaannaktaaġiraqput.”

⁵ Tavraasii Moses-gum qaitchiŋagaich iñuŋich Israel Atanġum piraksriutaanik. Uqallaktuq, “Uqaluat kiŋuniiŋisa Joseph nalaunŋaruq,

⁶ tavraasii Ataniq uqallaktuq paniutiŋich Zelophehad uiñikkumiñaqtut isumamiktun kimik uiñigukkumiŋ aglaan kisian iliŋisa aapaŋata maŋŋuqatigiramignun.

⁷ Kiŋuvaannaktaaguruaq Israel-mi nuutqataġniaŋitchuq kiŋuniġiiñiñ allanun kiŋuniġiiksuaguruanun, Israel kiŋuvaaŋi pigisimaaġniaġaa maŋŋuġiraġmiñiñ kiŋuvaannaktaaġirani nuna kiŋuniimiñiñ nanmiñiq.

⁸ Aġnaupayaaqtuaq kiŋuvaannaŋaniġumi nunamik Israel kiŋuvaaŋiññiñ uiñiktuksrauniaqtuq aŋunmik kiŋuniiqatigiraġmiñik. Tainnaġumiŋ Israel kiŋuvaaŋi kiŋuvaannagniaqtut nunanik maŋŋuġiraġmiŋniñ,

⁹ aasii nunagiraŋich aitchuutauniaŋitchut maŋŋuqaqtuaniñ allanun kiŋuniġiiguruanun. Maŋŋuqallaaruat pigisimaaġniaġaich iliŋisa nanmiñiq nunagiratiŋ.”

¹⁰ Tavraasii Zelophehad paniutiŋich kamaksriŋaniqsut Atanġum piraksriutaanik Moses-mun.

¹¹ Zelophehad paniŋich, Mahlah, Tirzah, Hoglah, Milcah suli Noah, uiñiktuŋaniqsut aññaamignik aapamigniñ.

¹² Uiñiŋaniqsut iḷagiiksuaniñ maŋŋuqaqłutiŋ Manasseh-mik iġñiŋanik Joseph, aasii nunaŋat tavraniinŋaniqsuq aapamiŋ maŋŋuqatigiraŋiñi.

¹³ Tavra taapkua piraksriutit maliġiraksriallu Atanġum qaiñŋaraŋich Moses-kun, qaiqsuaŋiñi Moab akiani Jordan River-m Jericho-miñ.