Numbers 35 - Iñupiatun Mumiksat Uqalugiksuat

Nunaaqqich Qaisaŋich Levi-m Kiŋuvaaŋiññun

¹ Qaiqsuaŋiñi Moab akiani Jordan River-m Jericho-miñ, Atanġum uqallautigaa Moses,

² “Piraksriġḷugich Israel-gum kiŋuvaaŋich kiŋuvaannaktaaŋiñiñ nunaniñ aitchuqulugich Levi-m kiŋuvaaŋich iniqpagnik iñuuniaġviksraŋiñik suli avataanni nunanik pamiqsaaŋisa niġiñiaġviksraŋiñik.

³ Tamatkua nunaaqqich, iñuuniaġviginiaġaich Levi-m kiŋuvaaŋisa. Niġiñiaġviginiaġaat nuna pamiqsaaŋisa suli allat niġrutiŋisa iniginiaġaat.

⁴ Niġiñiaġviuniaqtuaq nuna avataanni iniqpaŋisa sivisutiginiaqtuq katchiŋiññiñ sugnamulliqaa 500 isagniġum avvaŋatun,

⁵ kaŋiġalluaġiksuaq sivisutigivluni 1,000 isagniġum avvaŋatun saniġallaaŋanniillasiḷugu, iniqpak qitqaniillugu.

⁶ Aitchuqtaksraġiniaġisi Levi-m kiŋuvaaŋich itchaksranik iniqpagnik annaksaġviksraŋiñik nallipayaavsi qimagviksraŋannik pisaaġiŋiḷḷugu iñuaġniġuvsi. Aasii suli, iniqpaksriḷḷugich malġukipiaq malġuvsaanik (42)

⁷ iḷḷatilugich niġiñiaġviksraŋiññun, aitchuġniaġisi Levi-m kiŋuvaaŋich malġukipiaq tallimat piŋasunik (48) iniqpagnik.

⁸ Iniqpaich qaitchasi Levi-m kiŋuvaaŋiññun nunaŋiñiñ Israel kiŋuvaaŋiññi qaitkisigisi qiñiġlugu aktilaaŋat kiŋuvaannaktaaġiraŋata maŋŋuqallaaruat: Iñugiaktuanik qaitchiḷusi kiŋuniġiiñiñ iñugiaktuanik piqaqtuaniñ, aglaan iñukitchuanik iñukisuuranik piqaqtuamiñ.”

Annaksaġviksrat Nunaaqqich

⁹ Atanġum uqallautigaa Moses

¹⁰ uqautitquvlugich Israel kiŋuvaaŋich: “Ikaaġuvsiuŋ Jordan River aasii isiġlugu nunaŋa Canaan,

¹¹ naliġakkisirusi iniqpagnik annaksaġviksranik nallivsi qimaaviksraŋiññik iñuaġniġuvsi pisaaġigaluaġnagu.

¹² Tavrani anayanniuġniaŋitchusi tuquruam nanmiñiq iḷaŋaniñ akisaġumaruamiñ. Kiñaunnii pasirauruaq iñuaġniḷugu tuqutauniaŋitchuq uqaqsitaaqqaaŋaunnagich iñuich.

¹³ Itchaksrauruat iniqpaich qaitchasi annaksaġviuniaqtut,

¹⁴ piŋasut kivaliñaaŋani Jordan illutiŋ aasii piŋasut suli nunaŋani Canaan.

¹⁵ Taapkua iniqpauruat annaksaġvigillaaniaġaich Israel kiŋuvaaŋisa suli allaniñ nunaniñŋaqtauruat tamaani iñuuniaqtuat aullaġumaaqhutiŋ naakka nunaaqqiuruani iñuuniaqataulutiŋ. Kiñapayaaq pisaaġiġaluaġnagu iñuaqtuaq qimakkumiñaġniaqtuq iḷaŋannun.

^16-18 “Aglaan, nalliqsi, satkuqaġluni savił̣hamik naakka uyaġagmik naakka qirugmik tuqutchigumi iñugmik, pasirauniaqtuq iñuaqtuatun aasii tuquttuksraġiniaġaat.

¹⁹ Akisaqtiuruam nanmiñiq iḷaŋata tuquttaksraġiniaġaa iñuaqtuaq; kasuġumiuŋ, tavra tuqunniaġaa.

²⁰ “Uumisuutiqaġluni aglaan iñugmun aasii tuqullugu tinulugu naakka miḷuġlugu

²¹ naakkaunnii qakiġlugu, pasirauniaqtuq iñuaqtualiuġlugu aasii tuqutauruksrauniaqtuq. Akisaqtiuruam tuqutaksraġiniaġaa iñuaqtaŋa pisigilugu. Paqitkumiuŋ tavra, tuqunniaġaa.

²² “Aglaan tuqutkumiuŋ pisaaġigaluaġnagu iñuk uumigiŋisani, tinulugu naakka miḷuġlugu sumik

²³ naakkaunnii, qiñiġaluaġnagu, miḷuqsaqpauŋ uyaġagmik aasii tuqullugu iñuk, pisaaġiġaluaġnagu anniqsaġlugu naakka akiḷḷiġiŋiḷḷugu.

²⁴ Iñuich isivġiqtuksraġiniaġaik pasirauruaġlu akisaqtiuruaġlu maliġilugich taapkua maliġiraksriaguruat.

²⁵ Iñuich munaġiruksraġigaat pasirauruaq iñuaġnivḷugu pisaaġigaluaġnani akisaqtiuruamiñ aasii aullaqtillugu annaksaġlutiŋ qimaktuat iniqpaŋannun. Tavraniittuksrauniaqtuq tuqulġataqtillugu Aŋaiyyuliqsiqpaich Qaukłiat, uqsruqtaaqtauŋaruaq salumaruamik uqsrumik.

²⁶ Uniñŋaniqpagu pasirauruam iniqpak annaksaġviuruaq

²⁷ aasii akisaqtiuruam paqillugu siḷataani iniqpaum suli tuqullugu, tainnasiq akisautiuruaq iñuaqtualiuġutauniaŋitchuq.

²⁸ Pasirauruaq tavrani iniqpagmi annaksaġviuruami ittuksrauniaqtuq tuqulġataqtillugu Aŋaiyyuliqsiqpaich Qaukłiat, taamna pianikpan utillaniaqtuq ilaata nanmiñiq nunagiraġmiñun.

²⁹ Taapkua tavra maliġiraksrat atuqtaksraġiniaġisi kiŋuniiġiniaqtasiḷu, sumi iñuuniaġaluaġuvsi.

³⁰ “Pasirauruaq iñuaġniḷugu tavra tuqutauruksrauniaqtuq kisianik malġugnik iḷisimariqaġlutiŋ; atausim iñuum uqalua naamaniaŋitchuq tunulliḷiqsaġlugu pasirauruaq iñuaġniḷugu.

³¹ Iñuaqtuqtuat iliŋich tuqutauruksrauniaqtut. Naŋaġumiñaitkaat taamna tatavsaun akiḷiiḷutiŋ manigñik.

³² Qimaŋakpata iniqpagmun annaksaġviuruamun, akiḷiipkaqtaksraġiŋitkisi utillasisaġlugich aimmiviiŋiññun tuquŋaiñŋaan Aŋaiyyuliqsiqpaich Qaukłiat.

³³ Tainna piñiġuvsi, salumaiḷiñiaġiksi nuna iñuuniaġvigiraqsi. Iñuaqtuutim salumaiḷisuugaa nuna, kisianik tuqutaukpan iñuaqtuaq qanuġlugu piraġausiq atuġumiñaitkaat salumasisaġlugu nuna iñuk tuqutauganigman.

³⁴ Salumaiḷiñasiuŋ nuna iñuuniaġvigiraqsi, qanuq uvaŋa Atanġuruŋa suli iñuuruŋa akunġanni Israel kiŋuvaaŋisa.”