Numbers 34 - Iñupiatun Mumiksat Uqalugiksuat

Nunam Killiŋich

¹ Atanġum uqautiŋagaa Moses,

² “Piraksrikki Israel-gum kiŋuvaaŋich aasii uqallautilugich: ‘Isiġuvsi Canaan-mun, qaiññiaqtamnun ilivsiññun kiŋuvaannaktaaġitquvlugu, killiqallaaniaqtut nunaginiaqtasi inna.

³ Kiluliñaam tuŋaani killia inniaqtuq nunagluktuaŋaniñ Zin killiŋagun Edom-gum. Isagutiluni kivalliġmiñ kiluliñaaŋaniittuam isuani Dead Sea-m.

⁴ Tavraasii saquniaqtuq kiluliñaaŋanun Akrabbim Pass-mun suli taavuŋa Zin-kuaġluni uŋasiktigiliġḷuni kiluliñaaŋanun Kadesh Barnea-muaglaan. Aasii saqummiḷuni tuŋaanun Hazar Addar-m, tikił̣ł̣ugu Azmon,

⁵ saquluniasii tuŋaanun natiġnam killiŋani nunaŋata Egypt suli isuani Mediterranean-gum.

⁶ “‘Avanitchiani tuŋaaniittuaq killiginiaġaa Mediterranean Sea.

⁷ “‘Salliñaam killiŋata tittaŋa inniaqtuq Mediterranean Sea-miñaglaan Mount Hor-mun

⁸ aasii tavraŋŋa Hamath Pass-mun. Inniaqtuq Zedad-muaglaaġataġlugu

⁹ aasii-suli Ziphron-mun, aasii isuqaġluni Hazar Enan-mun. Tavra taamna killiginiaġiksi salliñaam tuŋaani.

¹⁰ “‘Kivaliñaaŋani killiŋa tittaqaġniaqtuq Hazar Enan-miñ Shepham-mun.

¹¹ Killiŋa anmugniaqtuq Shepham-miñ Riblah-mun kiluliñaaŋani Ain-gum qimiġaŋisiguaġluni kivaliñaaŋata Lake Galilee-m,

¹² Killiŋa kiluani inniaqtuq maliġilugu Jordan aasii isuqaġluni Salt Sea-mun. “‘Taapkua tavra sisamat killiqallaaniaqtut nunavsiññun.’”

¹³ Moses-gum piraksriŋagaich Israel-gum kiŋuvaaŋich: “Tavra tamanna nuna akuqtuġniaqtaqsi tigusiḷḷaalusi nalautchuġautinik, nuna Atanġum piksrirrutaa quliŋŋuġutaiḷauruanun maŋŋuqallaaruanun iḷaqaqługich avvauruanun maŋŋuqaqtuanun.

¹⁴ Maŋŋuqaqtuat Reuben-miglu Gad-miglu suli avvaŋich maŋŋuqaqtuat Manasseh-mik pianiŋagaich kiŋuvaannaktaaksrautitiŋ, aviktuaqługich qitunġaġiiḷḷaaruatigun,

¹⁵ kivaliñaaŋani Jordan-gum, akiani Jericho-m.”

Aullarriuruat Autaaġniaġaat Nuna

¹⁶ Atanġum uqallautigaa Moses,

¹⁷ “Eleazar-m aŋaiyyuliqsiqpauruam, Joshua-vlu, iġñiŋata Nun-gum, autaaġniaġaak nuna iñugnun.

¹⁸ Inillaiḷusi aullarriksramik maŋŋuqatigiiksuaniñ ikayuqtiksraŋiññik autaaqsaqparruŋ nunannaktaaksraŋat.”

^19-28 Ukuniŋa iñugnik Ataniq naliġaaqaŋaruq: Maŋŋuuruat Aullarri Judah Caleb iġñiŋa Jephunneh-m Simeon Shelumiel iġñiŋa Ammihud Benjamin Elidad iġñiŋa Chislon-gum Dan Bukki iġñiŋa Jogli-m Manasseh iġñiŋa Joseph-gum Hanniel iġñiŋa Ephod-gum Ephraim iġñiŋa Joseph-gum Kemuel iġñiŋa Shiphtan-gum Zebulun Elizaphan iġñiŋa Parnach-gum Issachar Paltiel iġñiŋa Azzan-gum Asher Ahihud iġñiŋa Shelomi-m Naphtali Pedahel iġñiŋa Ammihud-gum

Maŋŋuuruat Aullarri

²⁹ Tavra taapkua iñuich Atanġum piriksraqtaaġiraŋich autaaġniŋani kiŋuvaannaktaaksraŋata Israel-gum kiŋuvaaŋisa nunaŋani Canaan.