Numbers 33 - Iñupiatun Mumiksat Uqalugiksuat

Iglauniŋat Egypt-miñ Moab-mun

¹ Uumani quliaŋagaich atiŋich init Israel-gum kiŋuvaaŋich nullaġaġimmata aullaqigamiŋ Egypt-miñ maŋŋullaaġiraŋisigun aullarriqaqhutiŋ Moses-miglu Aaron-miglu.

² Piraksriutaagun Atanġum, Moses-gum agliurruŋagaich atillaaŋich inauruat nullaġaġigamiŋ.

³ Israel-gum kiŋuvaaŋisa uniñŋaniġaat Egypt akimiaŋanni (15th) uvlut sivulliġmi tatqiani ukium, uvlaakumman sivulliġmik Qulaurrusiqiqqaaqtillugich. Atanġum munaqqutaata ataaniiłłutiŋ aullaŋaniqsut iniqpagmiñ Rameses-miñ takkuanni Egypt iñuŋich,

⁴ iḷuviqsiḷġataviksuat aŋayukłiġñik iġñimignik Atanġum tuqupkaqtaŋiññik, qanukkii ilaata tatavsaŋavlugich isivġiġamigich god-iŋŋuaŋisigun.

⁵ Israel-gum kiŋuvaaŋich aullaŋarut Rameses-miñ aasii nullaqłutiŋ Sukkoth-mun.

⁶ Nullatqiŋarut aasii Etham-mun siñaanun nunagluktuam.

⁷ Tavraŋŋaasii utinmukłutiŋ Pi Hahiroth-mun, kivaliñaaŋanun Baal Zephon, aasii nullaqłutiŋ Migdol-mun.

⁸ Aullaŋarut Pi Hahiroth-miñ aasii ikaaqłutiŋ Red Sea-kun nunagluktuaŋan Etham; piŋasuni uvluni iglianikamiŋ, nullaŋarut Marah-mun.

⁹ Tavraŋŋa Elim-mun nullaŋarut, qulit malġugnik (12) suvliktuaqaqtuamun immanik suli piŋasukipiaq qulinik (70) palm-nik napaaqtuligaamun.

¹⁰ Aullaqamiŋ Elim-miñ nullaŋarut Red Sea-m siñaanun.

¹¹ Red Sea-miñ aullaqikamiŋ nullatqiŋaniqsut nunagluktuaŋanun Sin.

¹² Nunagluktuaŋaniñ Sin aullalgiññamiŋ nutqaŋarut Dophkah-mun.

¹³ Taaptumaasii aquagun nullalgił̣ł̣utiŋ Alush-mun.

¹⁴ Aasii aullaqamiŋ Alush-miñ, nullaaqtuŋaniqsut Rephidim-mun, tavrani imġił̣ł̣uni imiksraiñŋaniqsut.

^15-37 Rephidim-miñ Mount Hor-muaglaaġataqhutiŋ ukunuŋa nullaaqataŋarut: Sinai-m Desert-mun, Kibroth Hattaavah-mun, Hazeroth-mun, Rithmah-mun, Rimmon Perez-mun, Libnah-mun, Rissah-mun, Kehelathah-mun, Mount Shepher-mun, Haradah-mun, Makheloth-mun, Tahath-mun, Terah-mun, Mithkah-mun, Hashmonah-mun, Moseroth-mun, Bene Jaakan-mun, Hor Haggidgad-mun, Jotbathah-mun, Abronah-mun, Eziongeber-mun, nunagluktuaŋanun Zin (taamna Kadesh-guruq), Mount Hor-mullu, killianiittuamun nunaŋata Edom.

^38-39 Piraksriġmani Atanġum, Aaron aŋaiyyuliqsiqpak mayuŋaruq Mount Hor-mun. Tuquŋaniqsuq 123-tun ukiuqtutilaanikłuni sivulliġmi uvluani tallimaŋata tatqich malġukipiaŋanni (40th) ukiut aullaġataġmata Israel-gum kiŋuvaaŋich Egypt-miñ.

⁴⁰ Umialga Arad kiluḷiñaam tuŋaaniittuaq Canaan-mi tusaaŋaniqsuq Israel kiŋuvaaŋich imma qaiñmugnivḷugich.

^41-49 Mount Hor-miñaglaan qaiqsuaŋiñun Moab nullaaqataŋaniqsut ukunani inini: Zalmonah-mi, Punon-mi, Oboth-mi, Abarim-mi killiŋani nunaŋata Moab, Dibon Gad-mi, Almon Diblathaim-mi, Abarim Mountains-ni qaniŋani Mount Nebo-m, suli qaiqsuaŋiñi Moab akiani Jordan River-m Jericho-miñ, akunġagni Beth Jeshimoth-guvlu Acacia Valley-vḷu.

Piraksriutit Ikaaqsaŋaiñŋaisa Jordan-kun

⁵⁰ Atanġum uqautiŋagaa Moses qaiqsuaŋiñi Moab akiani Jordan River-m Jericho-miñ

⁵¹ “Uqautikki Israel kiŋuniiŋi aasii innaġlugich: Ikaaġuvsiuŋ Jordan nunaŋanuglusi Canaan,

⁵² anittaqtuksraġigisi iñuuniapayaaqtuat nunami. Siqumillugich uyaġagniḷḷu savił̣haniḷḷu iñuuraqpaliaŋich iluqaisalu nanġaiviŋich qutchiksuaniittuat.

⁵³ Iñuuniaġvigiliutilugu nuna, qanuq uvva qaitkiga ilivsiññun nunagiliutitquvlugu.

⁵⁴ Autaaġlugu nuna maŋŋuqallaaruanun suli iḷagiiksuanun tigusiḷḷaalutiŋ nalautchautinik, qaiḷḷaalugu aŋiruaq nuna iñugiakpata iḷagiiksuat aasii mikiruaq iñukitchuanun.

⁵⁵ Anittaŋisuaġuvsigik nunami iñuuniaqtuat, tamatkua uniktinŋaruat iłuiḷḷiuġutiqaqtinniaġaasi irriutatun irivsiññi suli kakiḷḷaġnaqtuatun saniġavsiññi, suli akiḷḷiqsruġniaġaasi nunami iñuuniaġviginiaqtavsiññi.

⁵⁶ Anittaŋisuaġuvsigik, suksraunġiġñiaġivsi, sivunniutiga nalaullugu suksraunġiġukługich.”