Numbers 32 - Iñupiatun Mumiksat Uqalugiksuat

Maŋŋuuqatigiiguruat Kivaliñaaŋani Jordan

¹ Maŋŋuqaqtuat Reuben-miglu Gad-miglu iñugiaktuanik pamiqsaaqaŋarut. Tautukkamirruŋ nunaŋa Jazer-vlu Gilead-lu nalaunŋatilaaŋanik pamiqsaanun,

² Moses-muŋaruk, Eleazar-mullu, suli allanun aullarriŋiññun nunaaqqiuruat uqallakłutiŋ,

^3-4 “Manna marra nuna Atanġum ikayuqługich Israel kiŋuvaaŋich inillaktittaŋich nunaaqqiŋich Ataroth, Dibon, Jazer, Nimrah, Heshbon, Elealeh, Sibmah, Nebo, suli Beon—nunagiksut pamiqsaanun, suli uvva uvagut iñugiapiaġataqtuanik pamiqsaaqaqtugut.

⁵ Aitchuqsigut tamattumiŋa nunamik pigisaġikput, ikaaqtinnialanagu Jordan River innillagvigitqulugu.”

⁶ Moses-gum kiuŋagai, “Uvva tamaaniitchukpisi allat Israel kiŋuvaaŋich aŋuyagiaqtillugich?

⁷ Qanuq imña qapiŋasaaqsaavisigik Israel kiŋuvaaŋich ikaaġniksraŋanniñ Jordan-mik nunamun Atanġum aitchuutigiŋaraanun?

⁸ Tainnauvva aapagirasi piŋarut tilikapkich Kadesh Barnea-miñ qimilġuyyaquvlugu nuna.

⁹ Tikilġataqamirruŋ Eshcol Valley tautuŋagaat nuna, aglaan utiqamiŋ, nikatchaiŋagaich iñuich isiġniaġniŋannun nunamun Atanġum aitchuutigiŋaraanun.

¹⁰ Ataniq qinnaliŋaruq taiptumani uvlumi aasii unniqsuqłiivḷuni:

¹¹ ‘Unniqsuqłiiruŋa kamakkutaiñmata uvamnun, nalliat unnii aŋutit iñuiññaqtun (20) ukiuqaqtuat naakka utuqqauruat Egypt-miñŋaŋaruat isiġniaŋitchut nunamun unniqsuqłiisigiŋaramnun Abraham-mun, Isaac-mun, suli Jacob-mun.’

¹² Iluqaisa taputiŋagaich aglaan Caleb iġñiŋa Jephunneh-m Keniz-miuguruam suli Joshua iġñiŋa Nun-gum; iluqaaqłutik maliġiŋagaak Ataniq.

¹³ Atanġum qinnautiŋagaich iñuich aasii tammaŋaruatun iglaupkaŋagaich nunagluktuami malġukipiani (40) ukiuni iluqaġmiŋ kiŋuniġiiguruat kamakkutaiñŋaruat tuquanigataqtillugich.

¹⁴ Aasii uvva kiŋuniivsisun piusi, nutauruasi kiŋuniġiich pigiitchualiqiruasi qinnaipiallakkuminaqsivḷugu Ataniq Israel-mun.

¹⁵ Tunullugu maliġuaŋaiġuvsiuŋ, univsaaġniaġaich iluqaisa ukua iñuich nunagluktuamun, aasii patchisauniaqtusi suksraunġiqsaukpata.”

¹⁶ Ullakługu Moses uqautiniġaak, “Sivulliulugu, uyaġagnik avaluliullaktiġlavut imnaivut suli payaŋaiyaŋaruanik iniqpaliuġluta aġnaptignun suli qitunġaptignun.

¹⁷ Tavraasii itqanaiḷḷuta aullaqasiġñiaġivut Israel kiŋuvaaŋich aullatilugich aŋuyakpata inillaanigataqtillugich nunaksrautimignun. Qitunġavut aasii iñuuniaqtut maani sapukutaligaani inini, anayanniuŋiḷḷutiŋ iñuŋiññiñ mattuma nunam.

¹⁸ Utiġniaŋitchugut aimmiviptinnun iluqaġmiŋ Israel-gum kiŋuvaaŋich nunaksriusiamignun inillaqqaaŋaunnagich.

¹⁹ Uvagut nunannagniaŋitchugut akunġanni Jordan taavanitchiani, qanukkii uvva nunaqaanigniaqtugut maani kivaliñġani Jordan.”

²⁰ Moses-gum kiugai, “Tainna pipiaġniaġuvsi, tavra takkuani Atanġum itqanaiġitchi aŋuyagiaqsaġlusi.

²¹ Iluqaġmiŋ aŋuyaktivsi ikaaqparruŋ Jordan aullarigilugu Ataniq aŋuyakkisigisi akiḷḷiivut Ataniġmun akiisilġataqtillugich

²² suli piññaktaaġilugu nuna. Taaptuma aquagun, utiġumiñaqtusi, qanuq piñiaġniraqsi pianigniaġiksi Ataniġmun suli allanun Israel kiŋuniiŋiññun. Tavra Atanġum nalupqinaiġñiaġaa tamanna nuna kivaliñaaŋa Jordan ilivsiññuñ piginiaqtilaaŋa.

²³ Aglaan unniqsuqłiisigiraqsi nalaunŋisuaġuvsiuŋ, piḷuusiqiniaqtusi paaqłaglugu Ataniq. Iḷisimaniaqtusi; tatavsaqtauniaqtilaavsiññik piḷuusiqiasi pisigilugich.

²⁴ Tavraasii nunaaqqiḷiuġitchi aġnavsiññun suli qitunŋavsiññun, avaluliuġlugiḷḷu imnaisi, aglaan savaglusi unniqsuqłiisigiravsiktun.”

²⁵ Aŋutiŋich Gad suli Reuben-gum uqallaktut, “Aŋuun, tainna piraksriutiktun savagniaqtugut.

²⁶ Tuvaaqativullu miqłiqtuvullu suli pamiqsaavut imnaiḷḷu uniktauniaqtut maani iniqpaŋiñi Gilead.

²⁷ Iluqata aglaan aŋuyagiaqsałhiñaagurugut Ataniġmik piraksriqsuqtiqaġluta. Ikaaġniaġikput Jordan aasii aŋuyagluta, uqallautigiraqtun.”

²⁸ Tavraasii Moses-gum piraksriŋaniġaich Eleazar-lu, Joshua-lu, allallu iḷagiich aullarriuruat Israel maŋŋuŋiññik.

²⁹ “Iñuŋich Gad suli Reuben ikaaqparruŋ Jordan aŋuyagiaġlutiŋ Atanġum piraksriutaagun suli ilivsi ikayuqtigilugich piññaktaaġiguvsiuŋ nuna, tavra qaitkisigiksi nunaŋa Gilead iliŋiññun nunagitqulugu.

³⁰ Aglaan ikaaqatigiŋitpasi aŋuyagiaġlutiŋ, akuqtuqtaksraġigaat nunaksrautiktiŋ piqatigilusi Canaan-mi.”

³¹ Iñuŋisa Gad suli Reuben kiuniġaat, “Aŋuun, pipiaġniaqtugut Atanġum piraksriutaatun.

³² Aullarrigilugu ilaa ikaaġniaqtugut nunaŋanun Canaan aŋuyagiaġluta, nunaksrautikput pigillayumagikput maani kivaliñġani Jordan.”

³³ Tavraasi Moses-gum piraksriŋagaich maŋŋuqaqtuat Gad-mik Reuben-miglu suli avvaŋich maŋŋuqaqtuat Manasseh-mik, iġñiġuruaq Joseph-mun, iluqaan nunaŋanik Umialguruam Sihon Amor-miunun suli Umialguruam Og-gum Bashan-mium, taputivlugich inauruat suli nunaŋata avataanniittuat.

³⁴ Maŋŋuqaqtuat Gad-mik nappaitqiŋarut avaluŋaruanik nunaaqqiŋiñik Dibon-gum, Ataroth-gum, Aroer-m,

³⁵ Atroth Shophan-gum, Jazer-m, Jogbehah-m,

³⁶ Beth Nimrah-m, suli Beth Haran.

³⁷ Maŋŋuqaqtuat Reuben-mik nappaitqiŋarut Heshbon-mik, Elealeh-mik, Kiriathaim-mik,

³⁸ Nebo-mik, Baal Meon-mik (taamna atiq simmiŋaruaq), suli Sibmah-mik. Nutauruanik atchiqsuŋaniġaich nunaaqqich savatqiksatiŋ.

³⁹ Iḷagiraŋisa Machir-m iġñiŋata Manasseh-m pisaġiŋaniġaat nunaŋa Gilead, nayuqsiutivlugu, aasii aniłługich tavraniittuat Amor-miut.

⁴⁰ Tavraasii Moses-gum Gilead qaiñŋagaa iḷagiraŋiñun Machir-m, aasii tavrani iñuuniaqsaŋarut.

⁴¹ Jair-m, iḷagiraŋata maŋŋuqaqtuat Manasseh-mik, aŋuyakługich pisaġiŋaniġaich iḷaŋich nunaaqqiurat aasii atchiqł̣ugich “Nunaaqqiŋich Jair-m.”

⁴² Nobah-vli aŋuyakługich pisaġiŋaniġaa Kenath nunaaqqiuraŋiḷḷu, aasii atchitqikł̣ugu Nobah-mik, ilaata atimiñik.