Numbers 31 - Iñupiatun Mumiksat Uqalugiksuat

Aŋuyagmatigik Midian-miut

¹ Ataniq uqallaktuq Moses-mun,

² “Akisaqsaġisi Midian-miut pisigilugu aŋalatchisaat Israel kiŋuvaaŋiññun. Taamna pianikkupku, tuquniaqtutin.”

³ Tavra Moses-gum uqautiŋagaich iñuich, “Aŋuyagumiñaaqsaġitchi, aŋuyakkumagisi Midian-miut aasii Ataniq akisautilugu.

⁴ Maŋŋuqatigiiguruaniñ Israel-mi aullaqtitchiḷusi 1,000-tun aŋutinik aŋuyagiaqtuksranik.”

⁵ Tavraasii 1,000-tun aŋutinik iñuksrallaaŋaniqsut maŋŋuqatigiiḷḷaaruaniñ, katilugich iñugiaktilaaqaŋarut 12,000-tun aŋuyagiaqsałhiñaat.

⁶ Moses-gum aŋuyagiaqtinŋagaich qaukłiqaqługich Phinehas-mik iġñiŋanik Eleazar-m aŋaiyyuliqsiqpaum, aŋalanŋagaich salumaruaguruat suġauttaŋich suli nipauqłuktautiksraŋich sunaqsiraġikpata.

⁷ Aŋuyaŋagaat Midian, Atanġum piraksriutaatun Moses-mun, aasii tuqułługich aŋutit iluqaisa,

⁸ iḷagivlugich tallimat umialiŋich Midian-mi: Evi-ḷu, Rekem-lu, Zur-lu, Hur-lu, suli Reba. Tuqunŋamammigaat Balaam iġñiŋa Beor-m.

⁹ Israel kiŋuvaaŋisa piññaktaaġiŋaniġaich Midian-miuguruat aġnaŋich miqłiqtuŋiḷḷu, pamiqsaaŋillu suli iñugiaktuat niġrutiŋich, piññaktaaġivlugiḷḷu suġaliŋich,

¹⁰ suli ikipkaŋagaich iniqpaŋich nullaġviŋiḷḷu.

¹¹ Piksraqtaaġiŋagaich suġautapayaaŋich, iḷagivlugich tigutaaqtat niġrutillu,

¹² aasii Moses-muutivlugich Eleazar-mullu suli nullauvviŋiññi Israel kiŋuvaaŋiññun, qaiqsuaŋiñi Moab akiani Jordan River-m Jericho-miñ.

Aŋuyaktit Utiqtut

¹³ Moses-gum, Eleazar-vlu suli iluqaġmiŋ allat aullarrigiraŋich nunaaqqiŋisa paaŋagaich nullaġviŋisa siḷataani aŋuyaktit.

¹⁴ Moses-gum qinnautiŋagaich qaukłiuruat aŋuyaktuanun—aullarriruallu 1,000-guruanun, suli qaukłiuruat 100-nun—utaaruat aŋuyaktuaniñ.

¹⁵ Moses-gum apiġigaich, “Summan uvva iluqaisa aġnat iñuupkaqpisigich?

¹⁶ Itqaumagisi taapkua aġnat kamaksrivḷutiŋ Balaam piraksriutiŋiñik Peor-mi ukpiġutaiqsił̣ł̣ugich Israel kiŋuniiŋich Ataniġmun. Tavra tainna pimmata naŋirrutiqpak iḷiŋaruq Atanġum iñuŋiñun.

¹⁷ Tavraasii tuqutchigik nukatpiaġrupayaat. Suli tuqullugich aġnapayaat siñiqatiqaŋaruat aŋunmik,

¹⁸ aglaan pigilugich ilivsi iluqaisa aġnaiyaat siñiqatiqaŋaitchuat aŋunmik.

¹⁹ Tavra iluqasi tuqutchiŋaruasii iñugmik naagga aksiksiŋaruasi tuquruam timaanik, siḷataaniittuksraurusi nullaummivium tallimat malġugni uvluni. Piŋayuanni uvlut suli tallimat malġuanni salummaġlusi piraġausiq nalaullugu ilivsiññik suli aġnat piññaktaaġiŋarasi.

²⁰ Salummaqtuksraġimmigisi annuġaapayaat suli sut qisigmik piḷiat, nagrulgiḷḷu mitquŋiñik, naakka qirugnik.”

²¹ Eleazar aŋaiyyuliqsiqpak uqallaktuq aŋuyaktinun utiqtuanun aŋuyagiaŋaqqaaqłutiŋ, “Marra makua maliġiraksrat Atanġum qaiñŋaraŋich Moses-mun.

^22-23 Sunapayauraq ikiyumiñaitchuaq ukunatitun, kaviqsuaq manik, qatiqtuaq manik, patukpak, savił̣haq, naakka uqhat, salummaqtauniaqtuq ignikuaqtillugu suli imikuaqtillugulu. Sunapayauraq aasii ignikuaġumiñaitchuaq salummaġlugu imikun salumasisaġlugu.

²⁴ Tallimat malġuŋanni uvlut iqaġigisigisi annuġaasi; tavra piraġausiq nalaullugu salumasiñiaqtusi aasii isillasiḷusi nullaummivigmun.”

Aviktuaġniŋat Piññaktaaŋisa

²⁵ Ataniq uqallaktuq Moses-mun,

²⁶ “Ilviḷḷu Eleazar-lu, piqatiqaġlusik allanik aullarriuruanik nunaaqqimi, kisitkisigisi supayaat piññaktaaġiŋarasi, taputilugich tigutaaqtallu niġrutillu.

²⁷ Aviglugich piññaktaaguruat malġuullugich atilugich, atautchiich aŋuyagiaŋaruanun aasii igḷuiŋich iñuŋisa nunaaqqiuruam.

²⁸ Aŋuyagiaŋaruat piksrautiŋiññiñ, ilaaguaqsiḷusi aitchuutiksramik Ataniġmun atausiḷḷaamik 500-guruaniñ tigutaaqtaniñ suli tainnasuli pamiqsaaniñ, kakaktiniñ, imnaiñiñ, suli nagruligniñ.

²⁹ Qaiḷḷugich aasii Eleazar-mun aŋaiyyuliqsiqpagmun nuimaruagilugich aitchuutigilugich Ataniġmun.

³⁰ Taapkunaŋŋa qaitchaŋiññiñ iñugnun, atausimik piksrallaalusi malġukipiaq quliuruaniñ (50) tigutaaqtaniñ suli tainnasuli pamiqsaaniñ, kakaktiniñ, imnaiñiñ, suli nagruligniñ. Qaiḷḷugich Levi-m kiŋuvaaŋiññun qaunaksrauruanun Atanġum Tupqanik.”

³¹ Moses-lu suli Eleazar-lu aŋaiyyuliqsiqpauruaq savaŋaruk Atanġum piraksriutaatun.

^32-35 Uvva ukua agliusimaniŋat pisaġiŋaraŋisa aŋuyaktit, taputivlugu ilimignun piksraqtaaġiraġmiŋ: 675,000 imnaiḷḷu nagrulgiḷḷu, 72,000 pamiqsaat, 61,000 kakaktit, suli 32,000 aġnat siñiqatiqaŋaitchuat aŋunmik.

^36-40 Avvaŋich aŋuyaktit autaaġusiaġiŋagaich 337,500 imnaiḷḷu nagrulgiḷḷu, taapkunaŋŋa 675 taxes-nik aitchuutauŋarut Ataniġmun; 36,000 pamiqsaat aŋuyaktinun, taapkunaŋŋa 72-guruanik taxes-nik aitchuutiqaŋarut Ataniġmun; 30,500 kakaktit aŋuyaktinun, taapkunaŋŋa 61-guruanik taxes-nik aitchuutiqaŋarut Ataniġmun; aasii 16,000 aġnat siñiqatiqaŋaitchuat aŋunmik aŋuyaktinun, taapkunaŋŋa 32-guruanik taxes-nik aitchuutauŋarut Ataniġmun.

⁴¹ Tavra Moses-gum qaitchiŋagaa Eleazar tax ilaaguaġlugu aitchuun Ataniġmun, Atanġum piraksriutaatun.

^42-46 Autaaġusiaŋat nunaaqqiuruat aktigiŋaruq tainnaptauq aŋuyaktauruatitun: 337,500-tun iñugiaktigiruat imnaiḷḷu nagrulgiḷḷu, 36,000 pamiqsaat, 30,500 kakaktit, suli 16,000 aġnat siñiqatiqaŋaitchuat aŋunmik.

⁴⁷ Taapkunaŋŋa autaaġusiaguruaniñ Moses piksraŋaniqsuq atausiḷḷaamik 50-iullaaruaniñ tigutaaqtaniñ niġrutiniḷḷu, Atanġum piraksriutaatun, qaił̣ł̣ugich Levi-m kiŋuvaaŋiññun qaunaksriuruanun Atanġum Tupqanik.

⁴⁸ Tavraasii qaukłiuruat aullarrivḷutiŋ aŋuyaktinik Moses-muŋarut

⁴⁹ aasii kilikługu, “Aŋuun, kisittavut aŋuyaktit aullatiravut aasii atausiuramik-unnii iḷaŋiŋaiññiqsut.

⁵⁰ Tainnamik qaġġisigivut kaviqsuat maniich qiñiyunaqutit, taliġutit, tayaġutit, qitiqłiaġutit, siutiġutit, suli quŋusiġutit piññaktaaġiŋaravut. Aitchuutigigivut Ataniġmun akiḷiutigivlugich iñuggutiptinnun munaġitquvluta.”

⁵¹ Moses-guvlu Eleazar-vlu akuqtuŋagaich kaviqsuat maniich, iluqaġmiŋ qiñiyunaqusiaguruat.

⁵² Katiłługich aitchuutiŋich qaukłiuruaniñ uqumaisilaaqaŋarut sipiłługu 400 pounds aitchuutausaqługich Ataniġmun.

⁵³ Tamatkua aasii qaukłiurauŋitchuat iliŋisa pigiŋagaich piññaktaatiŋ.

⁵⁴ Moses-guvlu Eleazar-vlu akuqtuŋaniġaich kaviqsuat maniich qaukłiuruaniñ 1,000-guruanun suli qaukłiuruaniñ 100-nun aasii Tupiġmuutivlugich Katitqataġviannun itqautausaqługich Israel kiŋuvaaŋi sivuġaani Atanġum.