Numbers 30 - Iñupiatun Mumiksat Uqalugiksuat

Maliġiraksrat Unniqsuqłiisauruatigun

¹ Moses-gum uqautiŋagaich qaukłiuruat maŋŋuuruanun Israel-mi ukuniŋa piraksriutiŋiñik Atanġum.

² Iñuk unniqsuqłiikami aitchuisugluni sumik Ataniġmun naagga uqallaŋaluni atuŋisaallagniaġniḷugu suna, naviktaksraġiŋitkaa unniqsuqłiisiñi, aglaan taŋŋiġḷugu iluqaan piñiaġnirani.

³ Niviaqsiaq iñuuniallaġmisuli aapami igluani unniqsuqłiiŋagumi sumik aitchuiñiaġniḷuni Ataniġmun naagga unniqsuqłiiḷuni suna atuŋisaallaguglugu,

⁴ aasii aapaŋata tusaakpauŋ sunik unniqsuqłiitilaaŋanik aglaan qanuq uqallautiŋiḷḷugu, tavra iluqaisa unniqsuqłiisigiraŋich tainna inniaqtut.

⁵ Aglaan aapaŋata tainna pitquŋisaŋa tusaagumi, unniqsuqłiisigirani piŋitchumiñaġaich. Atanġum suliqutigiŋaiġñiaġaa, qanukkii aapaŋata pitquŋitkaa tainna.

⁶ Uiñiŋaitchuaq aġnaq unniqsuqłiigumi, pisaaġiluni naagga isumalaaġaluaġnani, naakka unniqsuqłiiḷuni suna atugaġisuŋiḷḷugu, aasii uiñigluni,

⁷ aasii uiŋa tusaagumi taaptumiŋa suli uqallaŋił̣ł̣uniunnii ilaanun, tavra tamatkua unniqsuqłiisigiŋaraŋich tainna inniaqtut.

⁸ Aglaan uiŋata pitquŋitpagu unniqsuqłiisigiŋaraŋa tusaagumiuŋ, nalautinŋitchumiñaġaa. Atanġum suliqutigiŋaiġñiaġaa.

⁹ Uiḷgaŋaruam naakka avinŋaruam aġnam taŋŋiqsaksraġigaa unniqsuqłiisipayaani suna atuŋisaaġuglugu.

¹⁰ Uiqaqtuaq aġnaq unniqsuqłiiŋagumi naagga unniqsuqłiiḷuni suna atuŋisaaġuglugu,

¹¹ aasii uiŋata tusaagaluaġlugu aglaan qanuq uqallautiŋitpagu, tavra iluqaġmiŋ unniqsuqłiisigiraŋich tainna inniaqtut.

¹² Aglaan uiŋata tainna pitquŋitpagu unniqsuqłiisigiŋaraŋich atuquŋiḷḷugich tusaagumiuŋ, atuŋitchumiñaġaich. Atanġum suliqutigiŋaiġñiaġaa, qanukkii uiŋata atuquŋitkaa unniqsuqłiisaa.

¹³ Uiŋata tunulliḷiqsuġumiñaġaa naakka naviglugu unniqsuqłiutikkaluaŋa.

¹⁴ Aglaan, uvlitqiŋakpan tusaaqqaaqtillugu unniqsuqłiisaanik, aasii qanuq nivliutiŋaiḷḷugu, unniqsuqłiisipayaani taŋŋiqsaksraġigaich. Tavra nalupqinaiġaa unniqsuqłiisaa qanuq uqallaŋiññami uvlumi tusaaqqaaqamiuŋ.

¹⁵ Aglaan aquvatigun navikkumiuŋ unniqsuqłiisigiŋaraa, ilaanun tunniaqtuq pasirauniŋa unniqsuqłiisauruaq taŋŋiŋiñmagu.

¹⁶ Tavra taapkua maliġiraksrat Atanġum qaiñŋaraŋich Moses-mun unniqsuqłiiñiŋagun uiñiŋaitchuam aġnam iñuullaġmi aapami igluani naakka uiqaqtuam aġnam.