Numbers 3 - Iñupiatun Mumiksat Uqalugiksuat

Aaron Iġñiŋich

¹ Ukua qitunġaġiŋagaich Aaron-guvlu Moses-guvlu taimani Atanġum uqautimmauŋ Moses Mount Sinai-mi.

² Aaron iġñiqaŋaruq sisamanik: Nadab, aŋayukłiq, Abihu, Eleazar, suli Ithamar.

³ Nalunaiqsauŋarullu ilaaguaqtauŋarullu aŋaiyyuliqsiqpauniġmun,

⁴ aglaan Nadab-lu Abihu-lu tuqutauŋaruk aitchuutiqaqamiŋ salumaitchuamik igniġmik Ataniġmun Sinai-m Nunagluktuaŋani. Miqłiqtuqaŋaitchuk, tavraasii Eleazar-lu Ithamar-lu aŋaiyyuliqsiqpauŋaruk Aaron-gum iñuuniqtutilaaŋani.

⁵ Atanġum uqallautigaa Moses,

⁶ “Sarvaqtillugich maŋŋuuruat Levi-mun aasii kivgaksraqtaaġilugich Aaron-mun, aŋaiyyuliqsiqpagmun.

⁷ Savaaġiniaġaich savaaguruksrauruat Tupqani nayuqtauvigma savautilugiḷḷu Aaron-lu nunaaqqipayaallu.

⁸ Qaunaksrauniaqtut iluqaiññun suġautaŋiññun Tupiqpaum nayuqtauvimñun aasii piraksrauruat savaaġilugich Israel-gum kiŋuvaaŋiññun.

⁹ Piraksratualuginiaġaat tavra Levi-m kiŋuvaaŋich savautilugu Aaron iġñiŋiḷḷu.

¹⁰ Nalunaiġñiaġiñ piksraqtaaġilugu Aaron iġñiŋiḷḷu savaaġitqulugich savaaŋich aŋaiyyuliqsiqpauniġum; kiña alla tainna pisaaruaq tuqutauniaqtuq.”

¹¹ Atanġum uqallautigaa Moses,

^12-13 “Piginiaġitka Levi-m kiŋuvaaŋich. Tuqunnapkich aŋayukłiupayaaqtuat Egypt-miut, ilaaguaqtaġiŋagitka aŋayukłipayaat iġñiŋich qitunġaġiiguruani Israel kiŋuvaaŋiññi suli aŋayukłipayaaŋich niġrutit. Aasiuvva, uvaŋa simmausiutiginiaġitka Levi-m kiŋuvaaŋich aŋayukłipayaaŋiññun Israel-gum kiŋuvaaksraŋisa; iliŋich uvaŋa pigigitka. Uvaŋa Atanġuruŋa.”

Kisitaummata Levi-m Kiŋuvaaŋich

¹⁴ Sinai Desert-mi Atanġum uqallautigaa Moses

¹⁵ agliutitquvlugich Levi-m kiŋuvaaŋich iḷagiiksuatigullu, qitunġaġiiksuatigullu, iġñipayauraŋiḷḷu iñuuganiktuat tatqiq naałługu sippiqł̣ugulu,

¹⁶ tavraasii Moses tainna piŋaruq.

^17-20 Levi piŋasunik iġñiqaqtuaq: Gershon, Kohath, suli Merari, kiŋuniiguruat iḷagiiñun atimignik atiqaqtuanun. Gershon iġñiqaqtuaq malġugnik: Libni-ḷu Shimei-ḷu; Kohath iġñiqaqtuaq sisamanik: Amram-lu, Izhar-lu, Hebron-lu, suli Uzziel; Merari iġñiqaqtuaq malġugnik: Mahli-ḷu Mushi-ḷu. Kiŋunġuruak qitunġaġiiñun atiqaqtuanun taapkuak atiŋigñik.

²¹ Iḷagiraŋich Gershon-gum qitunġaġiŋagaich Libni-vḷu Shimei-vḷu.

²² Iġñiġuruat, tatqimi iñuuganiktuat sippiqł̣ugulu agliutiŋaruat iñugiaktilaaqaŋarut 7,500-tun.

²³ Taapkua iḷagiich nullaqtuksrauŋarut ualiñaaŋanun Tupqum tunuani,

²⁴ Eliasaph iġñiŋa Lael-gum qaukłiġivlugu iḷagiiksuat.

²⁵ Qaunagiŋagaalli Tupiq, iḷulliq taluŋa, siḷalliġḷu taluŋa, talukiyaaŋalu paaŋata,

²⁶ talukiyaaŋich siḷataata avataaniittuat Tupquvlu ikipkaiviuvlu, talukiyaaŋa paaŋata siḷalliġuam, qiluŋiḷḷu. Savaaġiniaġaich savaaksrauruat taapkunaŋŋa.

²⁷ Iḷaŋich Kohath-gum qitunġaġiŋagaich Amram-gum, Izhar-m, Hebron-gum, suli Uzziel.

²⁸ Iġñiġuruat, tatqimi iñuuganiktuat sippiqł̣ugulu agliutiŋaruat iñugiaktilaaqaŋarut 8,600-tun.

²⁹ Taapkuali iḷagiich nullaqtuksrauŋarut kiluani Tupqum,

³⁰ Elizaphan iġñiŋa Uzziel-gum qaukłiġivlugu iḷagiiksuat.

³¹ Savaaksriusiaġiŋagaat Sivunniuġutim Kiguunniŋa, niġġivigḷu, naparuaġlu naniqaġvik, ikipkaiviich, suġauttat aŋaiyyuliqsiqpaich atuġuuraŋich Salumaruami Inimi, talukiyaaġlu paaŋaniittuaq Salumaniqtauruam Inim. Savaaġiniaġaich savaaksrauruat taapkunaŋŋa.

³² Qaukłiġiŋagaat Levi-m kiŋuvaaŋich Eleazar iġñiŋa Aaron-gum aŋŋaiyyuliqsiqpaum. Qaukłiuŋaruq savaaqaqtuanun savaaksranik Salumaruami Inimi.

³³ Iḷagiraŋich Merari-m qitunġaŋich Mahli-vḷu Mushi-vḷu.

³⁴ Iġñiġuruat, tatqimi iñuuganiktuat sippiqł̣ugulu agliutiŋaruat iñugiaktilaaqaŋarut 6,200-tun.

³⁵ Taapkua iḷagiich nullaqtuksrauŋarut salliñaaŋanun Tupqum, Zuriel iġñiŋa Abihail-gum qaukłiġivlugu iḷagiiksuat.

³⁶ Savaaksriusiaqaŋarulli avaluŋiññik Tupqum, sanniġutaŋiññik, napaqsraŋiññik, tunŋaviŋiññik, iluqaiññiglu savalġutiŋiññik, Savaaġiniaġaich savaaksrauruat taapkunaŋŋa.

³⁷ Savaaġiŋammigaich napaqsraŋich, tunŋaviŋich, paugaŋich, qiluŋiḷḷu siḷalliata.

³⁸ Moses-lu Aaron-lu, Aaron-guvlu iġñiŋich nullaqtuksrauŋarut sivuġaanun Tupqum kivaliñaaŋata. Savaaġiŋagaiḷḷi savaaksrautitiŋ Salumaruami Inimi Israel-gum kiŋuvaaŋiññun. Kiña alla iñuk savaksaaruaq tavrani tuqutauniaqtuq.

³⁹ Katiłługich iñugiaktilaaŋat Levi-m kiŋuvaaŋich iġñiŋich tatqimi iñuuganiktuat sippiqł̣ugulu, Moses-gum agliutiŋaraŋich iḷagiiksuatigun piraksriutaagun Atanġum iñugiaktigiŋarut 22,000-tun.

Levi-m Kiŋuvaaŋich Inaŋiutaurut Iġñiqqaaguruanun

^40-41 Atanġum uqallautigaa Moses, “Iluqaisa Israel-gum kiŋuvaaŋich iġñiqqaaguruat uvaŋa pigigitka. Tavraasii agliutikkich atiŋisigun iġñiqqaaguruat Israel-gum kiŋuvaaŋich, iñuuŋaruat tatqimi naaggaunnii sippiqł̣ugu. Aglaan inaŋiutivlugich piksraqtaaġigitka Levi-m kiŋuvaaŋich uvamnun! Uvaŋa Atanġuruŋa! Piksraqtaaġimmigitka iluqaisa pamiqsaaŋich Levi-m kiŋuvaaŋisa inaŋiutivlugich aniqqaaŋaruanun pamiqsaaŋiññun Israel-gum kiŋuvaaŋisa.”

⁴² Moses kamaksrivḷuni, agliutiŋagaich iluqaisa iġñiqqaaguruat

⁴³ iñuuŋaruat tatqiq naałługu naaggaunnii sippiqł̣ugu; katinmagich iñugiaktilaaqaŋarut 22,273-tun.

⁴⁴ Atanġum uqallautigaa Moses,

⁴⁵ “Ilaaguaqtaġilugich Levi-m kiŋuvaaŋich piksratka, inaŋiutilugich iluqaiññun iġñiqqaaguruanun Israel-gum kiŋuvaaŋiññun, suli ilaaguaqtaġilugich pamiqsaaŋich Levi-m kiŋuvaaŋisa inaŋiutilugich aniqqaaŋaruanun pamiqsaaŋiññun Israel-gum kiŋuvaaŋisa. Levi-m kiŋuvaaŋich uvaŋa piginiaġitka. Uvaŋa Atanġuruŋa.

⁴⁶ Israel-gum kiŋuvaaŋich iġñiqqaaŋich iñugiałhaaniġmata Levi-m kiŋuvaaŋiññiñ 273-tun iñugiałhaaqtigivlutiŋ, tauqsiqtuksrauniaqtutin atisisaġlugik.

⁴⁷ Atausiḷḷaa tallimanik qatiqtuanik manigñik tauqsiḷḷaalugu, maliġilugu inillaŋaruaq,

⁴⁸ aasii qaiḷḷugu manik taamna Aaron-mullu iġñiŋiñullu.”

⁴⁹ Moses kamaksriŋaruq tigusivḷuni

⁵⁰ 1,365-tun iñugiaktigiruanik qatiqtuanik manigñik

⁵¹ aasiiñ qaił̣ł̣ugich Aaron-mullu iġñiŋiñullu Atanġum piraksriutaatullu uqaluatullu.