Numbers 29 - Iñupiatun Mumiksat Uqalugiksuat

Aitchuutiksrat Ukiutchiami Niqinaqikpata

¹ Sivulliŋanni uvluat tallimat malġuŋata tatqich katillusi nanġautiqaġumausi, aasii sunik savakkaluaġnasi. Taaptumani uvlumi nipauqłuktautit nivliqsinniaġaich.

² Aitchuutiqaġlusi ikipkautikun Ataniġmun, tivraġiksuamik tipimik iviġaumagiraanik: atausimik immulivium aŋusalluayaaŋanik, atausimik aŋusallumik imnaimik, suli tallimat malġugnik imnaiyaanik aŋusallunik ukiuqaqtuat atausimik, iluqaġmiŋ surruutaitchuanik.

³ Palauvaksramun aitchuutausaġlugu aitchuiḷusi palauvagmik akunŋaruamik olive uqsruanik: itchaksratun pounds-tun uqumaisigilugu palauvak aŋusallumun, sisamatun pounds-tullu uqumaisigiruamik aŋusallumun imnaimun,

⁴ aasii malġuk pounds-tun uqumaisigiruamik imnaiyaallaamun.

⁵ Suli aitchuiḷusi atausimik aŋusallumik nagruligmik aitchuutausaġlugu piḷuutinun, tainna piguvsi piraġausiq nalaunniaġiksi salumasiñiksraŋannun iñuich.

⁶ Aitchuutauruat taapkua iḷḷatilugich ikipkautikun aitchuutauruanun sivulliŋanni uvluŋisa tatqim piqatigilugich palauvaksrat aitchuutit, suli uvlutuaġman ikipkautikun aitchuutauruanun palauvaksranun imiksraŋiḷḷu aitchuutauruat. Tamatkua niqit aitchuutauruat tipaat iviġaumagigaa Atanġum.

Aitchuutauruksrat Tasuqsaqtauniġum Uvluani

⁷ Katitkisirusi nanġaisaġlusi quliŋanni uvluŋisa tallimat malġuanni tatqich; niġiŋaiḷḷaġlusi suli sunik savakkaluaġnasi.

⁸ Aitchuutiqaġlusi ikipkautikun Ataniġmun, tipaa iviġaumagiraŋanik ilaata: atausimik aŋusallumik nutauruamik, atausimik imnaimik aŋusallumik, suli tallimat malġugnik aŋusallunik imnaiyaanik atausimik ukiuqaqtuanik, iluqaġmiŋ surruutaitchuanik.

⁹ Aitchuutiqaġlusi palauvaksramik, palauvak akunŋaruamik olive uqsruanik: itchaksratun pounds-tun uqumaisigilugu palauvak iḷaksraŋa aŋusallum, sisamatun pounds-tun uqumaisigilugu iḷaksraŋa imnaim aŋusallum,

¹⁰ suli malġuktun pounds-tun uqumaisigilugu imnaiyaallaamun.

¹¹ Suli atausimik aŋusallumik nagruligmik piḷuutit pisigilugich aitchuutausaġlugu, iḷḷatilugu nagruligmun aitchuutauruamun tasuqsautausaġlugu iñugnun, suli uvlutuaġman ikipkautikun aitchuutauruamun iḷaqaġlugu palauvaksranun aitchuutinun, imiksranullu aitchuutauruanun.

Aitchuutiksrat Niqinaqutigikpatigik Tupqich

¹² Katillusi nanġaiyumausi uvlut akimiaŋanni (15th) tatqich tallimat malġuanni. Quvianġuvigilugu taamna niqinaqiniq qutchiksiḷiġutaulugu Ataniġmun tallimat malġugni uvluni suli sunik savakkaluaġnasi.

¹³ Taaptumani sivullianni uvlut aitchuiḷusi niqinik aitchuutinik Ataniġmun, tipaat iviġaumagiraŋanik Ilaata: qulit piŋasunik (13) nutauruanik aŋusallunik, malġugnik aŋusallugnik imnaigñik, suli akimiaġutaiḷanik (14) imnaiyaanik aŋusallunik atausimik ukiuqaqtuanik, iluqaġmiŋ surruutaitchuanik.

¹⁴ Niqit aitchuutiksraŋich palauvaksraq akunŋalugu olive uqsruanik: itchaksratun pounds-tun uqumaisigilugu palauvak aŋusallullaamun, sisamatun pounds-tun uqumaisigilugu imnaiñun aŋusallullaanun,

¹⁵ malġuk pounds-tun uqumaisigilugu imnaiyaallaanun, akimiaġutaiḷauruanun (14).

¹⁶ Suli aitchuiḷusi atausimik aŋusallumik nagruligmik piḷuutit pisigilugich aitchuunmik. Taapkua aitchuutit iḷḷatilugich uvlutuaġman ikipkautikun aitchuutauruanun iḷaulugich palauvaksranun aitchuutinun suli wine-nun.

¹⁷ Tuglianni uvlut aitchuiḷusi qulit malġugnik (12) nutauruanik aŋusallunik, malġugnik imnaigñik aŋusallugnik, suli akimiaġutaiḷanik (14) aŋusallunik imnaiyaanik atausimik ukiuqaqtuanik, iluqaġmiŋ surruutaitchuanik.

¹⁸ Piqatiksraŋich aŋusallullu, imnaiḷḷu aŋusallut imnaiyaallu, itqanaiġḷugich palauvaksrat aitchuutiksrat suli imiksrat aitchuutauniaqtuat iñugiaktilaaksrautiŋatitun.

¹⁹ Iḷaqaġlugisuli atausimik aŋusallumik nagruligmik piḷuutit pisigilugich aitchuutiksramik, iḷḷatilugich aitchuutikaaguruanun ikipkautikun palauvaksrallu iḷagilugich, suli imiksrat aitchuutauniaqtuat.

²⁰ Piŋayuanni uvlut aitchuiḷusi qulit atausimik (11) nutauruanik aŋusallunik, malġugnik imnaigñik aŋusallugnik, suli akimiaġutaiḷanik (14) imnaiyaanik atausimik ukiuqaqtuanik, iluqaġmiŋ surruutaitchuanik.

²¹ Aŋusallunun, imnaiñun aŋusallunun suli imnaiyaanun, itqanaiyaġlugich palauvaksrat aitchuutiksrat suli imiksraŋich aitchuutit iñugiaktilaaksraŋigun.

²² Iḷagilugu atausiq aŋusalluq nagrulik piḷuutit pisigilugich aitchuutiksraq, iḷḷatilugu ataramik ikipkautikun aitchuutauruanun palauvaksrallu imiksrallu aitchuutiksrat piqatigilugich.

²³ Uvlut sisamaŋanni aitchuutiqaġlusi qulinik nutauruanik aŋusallunik, malġugnik imnaigñik aŋusallugnik, suli akimiaġutaiḷanik (14) atausimik ukiuqaqtuanik aŋusallunik imnaiyaanik, iluqaġmiŋ surruutaitchuanik.

²⁴ Piqatigilugich aŋusallut, imnaich aŋusallut imnaiyaallu, itqanaiġḷugich palauvaksrat aitchuutiksrat suli imiksrat aitchuutauniaqtuat iñugiaktilaaksraŋatigun.

²⁵ Iḷaqaġlugich atausimik aŋusallumik nagruligmik piḷuutit pisigilugich aitchuutiksramik, iḷḷatilugich aitchuutikaaguruanun ikipkautikun palauvaksrallu aitchuutit suli imiksrat aitchuutauniaqtuat.

²⁶ Tallimaŋanni uvlut aitchuutiqaġlusi quliŋŋuġutaiḷanik nutauruanik aŋusallunik, malġugnik imnaigñik aŋusallugnik, suli akimiaġutaiḷanik (14) imnaiyaanik atausimik ukiuqaqtuanik, iluqaġmiŋ surruutaitchuanik.

²⁷ Piqatigilugich aŋusallut, imnaich aŋusallut suli imnaiyaat, itqanaiġḷugich palauvaksrat aitchuutauniaqtuat suli imiksrat aitchuutit iñugiaktilaaksraŋatigun.

²⁸ Iḷaqaġlugich atausimik aŋusallumik nagruligmik piḷuutit pisigilugich aitchuutiksramik, iḷḷatilugu aitchuutikaaguruanun ikipkautikun piqatigilugich palauvaksrat aitchuutauniaqtuat suli imiksrat aitchuutit.

²⁹ Itchaksraŋanni uvlut aitchuiḷusi tallimat piŋasunik nutauruanik aŋusallunik, malġugnik imnaigñik aŋusallugnik, suli akimiaġutaiḷanik (14) aŋusallunik imnaiyaanik atausimik ukiuqaqtuanik, iluqaisa surruutaitchuanik.

³⁰ Piqatigilugich aŋusallut, imnaich aŋusallullu imnaiyaallu, itqanaiyaġlugich palauvaksrat aitchuutiksrat suli imiksrat aitchuutauniaqtuat iñugiaktilaaksraŋatigun.

³¹ Iḷagilugu atausiq aŋusalluq nagrulik piḷuutit pisigilugich aitchuutauruksraq, taapkunuŋa aitchuutikaaguruanun ikipkautikun palauvaksrat aitchuutillu suli imiksrat aitchuutit.

³² Tallimat malġuŋanni uvlut aitchuutiqaġlusi tallimat malġugnik nutauruanik aŋusallunik, malġugnik imnaigñik aŋusallugnik, suli akimiaġutaiḷanik (14) imnaiyaanik atausimik ukiuqaqtuanik, iluqaisa surruutaitchuanik.

³³ Iḷaqaġlugich aŋusallut, imnaiñik aŋusallunik, imnaiyaaniglu, aitchuutigilugich palauvaksrat aitchuutiksrat suli imiksraŋich aitchuutauniaqtuat iñugiaktilaaksrallaaŋatitun.

³⁴ Iḷalugich atausimik aŋusallumik nagruligmik piḷuutit pisigilugich aitchuutiksramik, iḷḷatilugich aitchuutikaaguruanun ikipkautikun palauvaksrat aitchuutit piqatigilugich suli imiksrat aitchuutauniaqtuat.

³⁵ Tallimat piŋayuanni uvlut katillusi nanġaiḷusi suli sunik savaaksranik savakkaluaġnasi.

³⁶ Aitchuutiqaġlusi ikipkautikun niqinik Ataniġmun, tipaa iviġaumanaqtuamik ilaanun: atausimik nutauruamik aŋusallumik, atausimik imnaimik aŋusallumik, suli tallimat malġugnik imnaiyaanik atausimik ukiuqaqtuanik, iluqaġmiŋ surruutaitchuanik.

³⁷ Iḷaqaġlugu aŋusalluq, imnaiq aŋusalluq, imnaiyaaniglu, itqanaiġḷugich palauvaksrat aitchuutiksrat suli imiksraŋich aitchuutauniaqtuat iñugiaktilaaksraŋisigun.

³⁸ Iḷaqaġlugich atausimik aŋusallumik nagruligmik piḷuutit pisigilugich aitchuutiksramik, iḷḷatilugich aitchuutikaaguruanun ikipkautikun palauvaksrallu aitchuutit suli imiksrat aitchuutauniaqtuat.

³⁹ Tavra tamatkua maliġiraksrasi ikipkautikun aitchuutitigun, palauvaksratigun aitchuutitigun, imiksrat aitchuutit, suli iḷammiuġutikun aitchuutauruat aitchuutiginiaqtasi Ataniġmun niqinaqiniġich tikitchaġikpata. Tavra taapkua iḷaginiaġisi aitchuutivsiññi taŋŋiqsaġlugu unniqsuqłiutiksi naagga piyummatiqaġlusi aitchuiguvsi.

⁴⁰ Tavraasii Moses-gum uqautiŋagaich Israel-gum kiŋuvaaŋich supayaanik Atanġum piraksriutiŋiñik.