Numbers 28 - Iñupiatun Mumiksat Uqalugiksuat

Aitchuutausuuruat

¹ Atanġum piraksriŋagaa Moses

² piraksriquvlugich Israel-gum kiŋuvaaŋi aitchuiḷḷaatqulugich piviksraq tikitchaġikpan niqinik aitchuutauruksrauruanik tivraġiksuanik iviġaumagiraŋiñik Ilaata.

³ Ukua uvva niqit aitchuutauruksrat Ataniġmun: uvlutuaġaġikpan aitchuutiksrat, malġugnik atausimik ukiuqaqtuagnik imnaiyaagnik surruutaitchuagnik.

⁴ Aitchuutigilugu sivulliq imnaiyaaq uvlaami, aasii tuglia anaqakpagu,

⁵ iḷaqallaalugik palauvaksranik aitchuutinik uqumaisilaaqaqtuamik malġuktun pounds-tun, akurrutiŋalugu malġuk pints-tun aktigilugu uqsruġiksuamik olive uqsruanik.

⁶ Tavra taamna uvlutuaqpan aitchuutiksraun ikipkautikun, aitchuutauqqaaŋaruaq Mount Sinai-mi niqitigun aitchuun, tipaa iviġaumanaqtuaq Ataniġmun.

⁷ Wine aitchuutauruaq sivullikun imnaiyaakun kuviḷugu ikipkaivigmun malġuktun pints-tun imaqtutigiruaq.

⁸ Anaqakpagu aitchuutigilugu tuglia imnaiyaaq tainnaptauq uvlaami aitchuutauruatun, iḷagilugu palauvaksraq aitchuun suli wine iḷaŋa aitchuutim. Niqitigun aitchuutaummiuq, tipaa iviġaumanaqtuaq Ataniġmun.

Sabbath-tuani Aitchuutauruaq

⁹ Sabbath-mi aitchuutiqaġlusi malġugnik imnaiyaagnik atausimik ukiuqaqtuagnik surruutaiḷaagnik, sisamat pounds-tullu palauvagmik olive uqsrua akurrutiŋalugu aitchuutausaġlugu palauvaksramun, suli wine-mun aitchuunmun.

¹⁰ Taamna ikipkautikun aitchuutauruaq aitchuutiginiaġiksi Sabbath tikitchaġikpan uvlutuaġman aitchuutauruamun iḷagilugu wine.

Aitchuutiksraq Uvlut Sivullianni Tatqimi

¹¹ Qaitchiḷusi ikipkautikun aitchuunmik Ataniġmun aullaqisaaŋani tatqiḷḷaam: malġugnik nutauruagnik aŋusallugnik, atausimik aŋusallumik imnaimik, tallimat malġugnik aŋusallunik imnaiyaanik atausimik ukiuqaqtuanik, iluqaġmiŋ surruutaiḷḷugich.

¹² Palauvaksramun aitchuutiksraq, palauvak akunŋaruaq olive uqsruanik: aŋusallullaamun, itchaksrat pounds-tun uqumaisigilugu palauvak; aŋusallumun imnaimun, sisamat pounds-tun uqumaisigilugu;

¹³ aasii imnaiyaallaamun, malġuk pounds-tun uqumaisigilugu. Taapkua ikipkautikun aitchuutauruat niqauvlugich aitchuutaurut, tipaat iviġaumanaqtuaq Ataniġmun.

¹⁴ Sisamat pints-tun aktigilugu aŋusallullaamun wine aitchuutiksraq, piŋasut pints-tun aktigilugu aŋusallumun imnaimun, aasii malġuk pints-tun aktigilugu imnaiyaanun. Tavra taamna maliġiraksraq ikipkautikun aitchuutauruatigun sivulliġmi uvluani tatqiḷḷaam ukiuq naallugu.

¹⁵ Suli iḷḷatilugu uvlutuaġman ikipkautikun aitchuutauruanun iḷagilugu wine aitchuun, aitchuiḷusiḷu atausimik aŋusallumik nagruligmik piḷuutinun aitchuutiksramik Ataniġmun.

Aitchuutiksrat Niqinaqutigikparruŋ Imaksraiḷaaq Punniq

¹⁶ Qulaurrusiqinikun Niqinaqiniq Ataniġmun atuġniaġiksi akimiaġutaiḷaŋanni (14th) uvlut sivulliġmi tatqimi.

¹⁷ Akimiaŋanni (15th) aasii uvlut niqinaqiniq atuġniaġiksi tallimat malġugni uvluni, tavrani kisian imaksraiḷaaqługu punniliaq niġigisigiksi.

¹⁸ Sivulliġmi uvluŋani niqinaqiniġum katitkisirusi nanġautiqaġlusi, suli sunik savakkaluaġnasi.

¹⁹ Aitchuutiqaġlusi ikipkautikun niqitigun aitchuunmik Ataniġmun: malġugnik nutauruagnik aŋusallugnik, atausimik aŋusallumik imnaimik, suli tallimat malġugnik aŋusallunik imnaiyaanik atausimik ukiuqaqtuanik, iluqaġmiŋ surruutaiḷḷugich.

²⁰ Aitchuutigilugu palauvaksraq, palauvak akunŋaruaq olive uqsruanik: aŋusallullaamun, itchaksrat pounds-tun uqumaisigilugu palauvak; aŋusallumun imnaimun, sisamat pounds-tun uqumaisigilugu;

²¹ aasii malġuk pounds-tun uqumaisigilugu imnaiyaallaamun.

²² Suli aitchuiḷusi aŋusallumik nagruligmik piḷuutinun aitchuutausaġlugu, tainna piguvsi nalaunniaġiksi piraġausiq salumasisaġniŋannun iñuich.

²³ Taapkua iḷagilugich aitchuutinun uvlaami ikipkautitigun aitchuutausuuruanun.

²⁴ Tainnatunsuli, tallimat malġugni uvluni aitchuutigilugich Ataniġmun niqit aitchuutiksrat, tipaat iviġaumanaqtuaq ilaanun. Taamna aitchuutigilugu iḷagilugu uvlutuaġman ikipkautikun aitchuutauruanun suli wine iḷagilugu.

²⁵ Tallimat malġuanni uvlut katillusi aasii nanġautiqaġlusi, suli sunik savakkaluaġnasi.

Aitchuutauruksrat Kivluivigmi Niqinaqikpata

²⁶ Sivulliŋanni uvlut Kivluivigmi niqinaqikpata, qaitchiguvsi nutauruanik palauvaksranik Ataniġmun, katillusi nanġaigisirusi, suli sunik savakkaluaġnasi.

²⁷ Aitchuiḷusi ikipkautikun tipimik iviġaumagiraŋanik Atanġum: malġugnik aŋusalluayaagnik, atausimik aŋusallumik imnaimik, suli tallimat malġugnik aŋusallunik imnaiyaanik atausimik ukiuqaqtuanik.

²⁸ Palauvaksraq aitchuutigilugu akunŋaruaq olive uqsruanik: itchaksrat pounds-tun uqumaisigilugu aŋusallullaamun, sisamat pounds-tun uqumaisigilugu aŋusallumun imnaimun,

²⁹ aasii malġuk pounds-tun uqumaisigilugu imnaiyaallaamun.

³⁰ Suli aitchuiḷusi atausimik aŋusallumik nagruligmik piḷuutinun aitchuutausaġlugu, tavra tainna piguvsi atuġniaġiksi piraġausikun salummaġniksraŋat iñuich.

³¹ Aitchuutigilugich taapkua wine iḷagilugu uvlutuaġman aitchuutauruanun ikipkautikun suli palauvaksranun. Niġrutit surruutaitchuksraurut.