Numbers 27 - Iñupiatun Mumiksat Uqalugiksuat

Paniŋich Zelophehad-gum

¹ Mahlah, Noah, Hoglah, Milcah, suli Tirzah panigiraŋich taapkua Zelophehad-gum iġñiŋata Hepher-m iġñiŋata Gilead-gum, iġñiŋata Machir-m, iġñiŋata Manasseh-m, iġñiŋata Joseph-gum.

² Ullautiŋarut sivuġaagnun Moses-gum, Eleazar-vlu aŋaiyyuliqsiqpaum, aullarriḷḷu, iluqaġmiglu nunaaqqiuruat paaŋanun Tupqum Atanġum Nayuqtauviata aasii uqallakłutiŋ,

³ “Aapagiraqput tuquŋaruq nunagluktuami iġñiqaġaluaġnani. Maliġuaqtigiraŋiññi Korah-m iḷauŋaiñmiuq, akiḷḷiqsruiruani Ataniġmik; tuquŋaruq pisigivlugu ilaata piḷuutini.

⁴ Iġñiqaŋaisiññaġnivḷugu, summan aapagirapta atqa tammaġniaqpa Israel-miñ? Nunaksritchigulli akunġannun aapapta nanmiñiq iḷaŋisa.”

⁵ Moses-gum qaisaġiŋagaa apiqqutaat Ataniġmun,

⁶ aasii Atanġum uqallautigaa,

⁷ “Panigiraŋisa Zelophehad apiqqutaat iłuaqtuq; nunaksritchigik akunġannun aapaŋata iḷaŋisa. Kiŋuvaannaktaaŋa pigiyumagaat iliŋisa.

⁸ Uqallautigisigitin Israel-gum kiŋuvaaŋich iñuk tuqukpan iġñiqaġaluaġnani, paniata kiŋuvaannaktaaġiniaġaa nunaŋa.

⁹ Paniqaŋaiññiqpan aasii, aniqatiiŋisa aŋutit kiŋuvaannaktaaġiniaġaat.

¹⁰ Aniqataiññiqpan aasii aŋutinik, aapaŋata aniqatiiŋisa aŋutit kiŋuvaannaktaaġiniaġaat.

¹¹ Aniqataiññiqpan aŋutinik naagga aŋaaluiḷḷuni, qaninniqtauruam iḷaŋata kiŋuvaannaktaaġigisigaa pimisun iḷiḷugu. Israel-gum kiŋuvaaŋisa taamna maliġuaġisigaat pitquraulugu, uvaŋa Atanġuruam, piraksriutaatun Moses-mun.”

Joshua Naliġaagumman Akiaġutausaqługu Moses-mun

¹² Atanġum uqallautigaa Moses, “Mayuġlutin Abarim Mountains-nun qiñiġaaġuŋ nuna qaitchaqtaġa Israel-gum kiŋuvaaŋiññun.

¹³ Tautuanikkupkuasii, iñuuŋaiġñiaġmiutin, aniqatiktuttauq Aaron-tun,

¹⁴ qanuq iluqasik akiḷḷiqsruŋarusik pitqurriutimnik nunagluktuaŋani Zin. Iluqaġmiŋ nunaaqqiuruat uqamayugmata akiḷḷiġivluŋa Meribah-mi, iḷisimapkaġuŋiñŋagiksik salumaruaq suaŋŋatiga sivuġaanni.” (Meribah tavra suvliktuaq imiq Kadesh-mi nunagluktuaŋani Zin.)

¹⁵ Moses uqallaktuq Ataniġmun,

¹⁶ “Ataniiq God, iñuggusiqsimaaġiñ sunapayaaq, aŋaiyyuruŋa nalunaiqsiiñ iñugmik aullarriyumiñaqtuamik

¹⁷ aullaġumiñaqtuamik sivuanni utiġluniḷu, aullatilugiḷḷu aŋuyaktuanun suli utqutilugich Atanġum iñuŋich imnaiḷiqiraitchuatun inŋitchumaut.”

¹⁸ Ataniq uqallaktuq Moses-mun, “Joshua piḷugu iġñiŋa Nun-gum, iñuk iḷitqusimnik piqaqtuaq, aasii argatin niaquanuglugich.

¹⁹ Makitillugu sivuġaanun Eleazar-m aŋaiyyuliqsiqpaum katillugiḷḷu iluqaisa iñuich, takkuanni quliaġlugu savaaġiniaqtaŋa akiaġutaugumi.

²⁰ Ataniġnaqutigiraqpich iḷaŋa qaiḷḷugu ilaanun, Israel-gum kiŋuvaaŋich iñuŋisa kamagiyumagaat.

²¹ Joshua sivuġaani Eleazar-m inniaqtuq aŋaiyyuliqsiqpauruam, qanuq piñiaqtilaaŋiñik iḷitchuġillaaniaqtuam apiqsriḷuni Urim atuġlugu sivuġaani Atanġum. Piraksriiraġikpan iluqani nunaaqqiŋa Israel aullallaaniaqtuq, suli piraksriikpan qaimmiḷutiŋ.”

²² Moses savaŋaruq piraksriutaa nalaułługu Atanġum. Joshua makinŋaruk sivuġaanun aŋaiyyuliqsiqpaum Eleazar-m iñupayaanullu.

²³ Piraksriutaatun Atanġum, Moses-gum argagni Joshua-m niaquanuŋagaik aasii ataniġnaqusiqł̣ugu inaŋiutillasivḷugu ilimiñun.