Numbers 25 - Iñupiatun Mumiksat Uqalugiksuat

Moab-miut Maliksuktitkai Israel-gum Kiŋuvaaŋich

¹ Israel-gum kiŋuvaaŋich Shittim-miillaġmiŋ, aŋutit allatuqatiqanagutiŋarut aġnaŋiññik Moab-miut.

² Tamatkua aiyugaaqłiqhutiŋ iñugnik ikipkaivigmignun god-igiramignun aasii iñuich niġiŋarut suli purvigivlugich god-iŋich.

³ Israel-gum kiŋuvaaŋich iḷḷatiŋarut aŋaiyyuruanun Baal Peor-mun. Aasii Atanġum qinnautiŋagaich

⁴ uqallakłuni-aasii Moses-mun, “Aullarripayaaŋich Israel piḷugich, niviŋŋaġlugich tuqullugich uvlutchaurauŋŋaan takkuani Atanġum, qinnautiqpaŋa Atanġum piiġumauq Israel-guruaniñ.”

⁵ Tavraasii Moses uqallaŋaruq Israel-gum kiŋuvaaŋich isivġiqsiŋiñun, “Tuquttaġisigisi iñugipayaaqtasi iḷḷatiŋaruat aŋaiyyuruanun Baal Peor-mun.”

⁶ Tavraasii iḷaŋat Israel-gum kiŋuvaaŋich qaġġirriŋaruq Midian-miuguruamik aġnamik takkuanni Moses-guvlu iluqaġmiglu nunaaqqiuruat, isumaaġutimigni qirruktillugich paaŋani Tupqum Atanġum Nayuqtauviata.

⁷ Phinehas-gum, iġñiŋata Eleazar-m suli tutaaluŋata Aaron aŋaiyyuliqsiqpaum, tautukkamiuŋ, makiłłuni kasimaruaniñ aniñiqsuq. Nauliksraqhuni,

⁸ maliŋagaik aŋullu aġnaġlu tupiġmun, aasii nauligmik kapivlugik iluqaaktun, tapitaallaan aqiaġua aġnam. Tainnaqłuni iłuiḷḷiuġutiqpak Israel-gum kiŋuvaaŋiññik maqutchiruaq nutqaŋaruq,

⁹ aglaan iłuiḷḷiuġutiqpakun tuquruat iñugiaktilaaqaŋarut 24,000-tun.

¹⁰ Ataniq uqallaktuq Moses-mun,

¹¹ “Phinehas tainna savaanigniġman, qinnautiŋaiġitka iñuŋich Israel-gum kiŋuvaaŋich. Ilaan iḷatchiġumiñaił̣ł̣ugich aŋaiyyuruat allanun god-inun aglaan uvamnun, tavraasii tainnamik suksraunġiŋitkitka qinnautimni.

¹² Tainnamik uqallautisaġiñ, Uvaŋa inillairuŋa sivunniuġutikun tutqiunmik ilaanun.

¹³ Ilaalu kiŋuniiŋiḷḷu inillaktaurut aŋaiyyuliqsausaġataġniġmun, qanuq ilaa manimmisaił̣ł̣uni akiḷḷiqsruiruanun uvamnik suli suliqutigiŋaiḷḷasipkaqługich iñuich piḷuutiŋich.”

¹⁴ Israel kiŋuvaaŋa tuqutauruaq igḷuqaŋaruq Midian-miuguruamik aġnamik, atiqaqtuaq Zimri-mik, iġñiŋa Salu-m, qaukłiġiraŋat iḷaġiich maŋŋuqaqłutiŋ Simeon-mik.

¹⁵ Aġnam atiŋa Cozbi. Aapaŋa Zur, qaukłiuŋaruaq Midian-miunun iḷagiiksuanun.

¹⁶ Atanġum piraksriŋagaa Moses,

¹⁷ “Aŋuyaksigik Midian-miut suli suksraunġiġḷugich,

¹⁸ pigiitchuamik savaktinmasi sagluqivlusi Peor-mi, suli pisigivlugu Cozbi, tuqutauŋaruaq iłuiḷḷiuġutiqpak inŋaansuli Peor-mi.”