Numbers 24 - Iñupiatun Mumiksat Uqalugiksuat

¹ Balaam puttuqsriruq Atanġum quviasaaġunmik aitchuqummagich iñuŋich Israel, aŋatkuaġaŋitchuq, sivuani piusimisun. Saanŋagaa nunagluktuaq

² aasii tautukługich iñuŋich Israel nullaŋaruat maŋŋuġillaaramiktigun. Suli iḷitqusiŋa God-im tunŋaruq ilaanun,

³ aasii nivliŋaruq uumiŋa nalautittuksramik: “Kiliktutaa Balaam iġñiŋata Beor-m: Uqaluŋich aŋutim tautullaruaq nalupqisuktuaŋiḷḷuni,

⁴ tusaallaruaq sumik God uqallaktilaaŋanik. Tautuktuuraaqtuŋa God-miñ kamanaqtigiruamiñ. Puttuŋa ilaanun aasii irrakak agmaqtuk.

⁵ Qanutun qiññaġiktigivat tupitin, Jacob, inauvigirasi, Israel!

⁶ Ittuat natiġnaqpaktun, ittuat nautchiaqaġviktun saniġaani kuugum, ittuat nauriatun aloe-tun Atanġum nautchirriutaatun, ittuat cedar-m napaaqtuŋatun saniġaanni immat.

⁷ Imiq maqiugaġniaġmiuq utkusiŋiñiñ, nautchiaksraŋich imaksraiḷḷiuġniaŋiñmiut. Umialiŋat qutchił̣haaġniaġmiuq Agag-miñ, umialgutaat iliŋisa qutchiksiḷiqtauniaqtuq.

⁸ God-im Egypt-minŋautiŋagai; suaŋŋatiqaqtigiruq qimuktiġruatun, Suksraunġiġñiaġai nunaqpaich akiḷḷiiriñi, suli navguġlugich sauniŋich kanuqqiḷugich, tapiglakługich qaġrumigñik.

⁹ Israel lion-ruatun ittuq; Siñigman, kia unnii itiqsaġniaŋitkaa. Kia quviasaaġunmik Israel aitchuqpauŋ quviasaaqtauniaġmiuq, Aasii kia pigiitchuamik Israel aitchuqpauŋ pigiitchuamik piññagniaġmiuq.”

¹⁰ Balak-gum qinnaliutiŋagaa Balaam, patiutiłłagniġaik argagni; aasii Balak-gum uqallautigaa Balaam, “Ququaŋaraqpiñ uqamaqłuunmik uqallaquvlutin akiḷḷiimnun, aasiuvva, ikayuunmik qaitchisiññaġitin piŋasuiqsuaqługich.

¹¹ Tainnainniġman aisauraġiñ inignun; Uqallaŋagaluaqtuaŋa, akiḷiḷḷuataġniaġnivḷutin, aglaan Atanġum akiḷisinŋitkaatin.”

¹² Aasii Balaam-gum uqallautigaa Balak, “Uqallautiŋaitpigmiipkua kivgatin uvamnuktittatin,

¹³ Balak-gum aitchuġaluaqpaŋaunnii igluqpamiñik siḷiviñŋaruamik qatiqtuanik manigñik suli kaviqsuanik manigñik, kamaginiaġigasuli Ataniq. Uvaptuġruiññaq piyumiñaitchuŋa nakuuruamik nakuuŋitchuamiglu. Qanuq Ataniq uqallakpan, tavra uqallautiginiaġiga.”

Balaam-gum Aqulliich Nalautinniaġnikkaŋii

¹⁴ “Aasiuvva, iḷitchuġiiñ, iñugiramnugniaqtuŋa; qaiñ, iḷitchuġipkaġniaġikpiñ ukua iñuich qanuq aŋalatchiñiaqtilaaŋannik iñugiraġnik uvluni tikittuksrani.”

¹⁵ Aasii nivliŋaruq uumiŋa nalautittuksramik: “Kiliktutaa Balaam iġñiŋata Beor-m: Uqaluŋich aŋutim tautullaruaq nalupqisuktuaŋiḷḷuni,

¹⁶ tusaallaruaq sumik God uqallaktilaaŋanik suli iḷisimaruam iḷisimmataanik Qutchigñiqtauruam. Tautuktuuraaqtuŋa God-miñ kamanaqtigiruamiñ. Puttuŋa ilaanun aasii irrakak agmaqtuk.

¹⁷ Tautugniaġiga, aglaan akkupaŋiḷaaq; Qiñiġaluaġiga, aglaan qanitkaluaġnagu: aullarri qaiñiaqtuq Jacob-miñ, umialik makinniaqtuq Israel-miñ. Siqummaaġniaġaich qauŋich Moab, suksraunġiġḷugiḷḷu iñuŋich Seth-gum.

¹⁸ Edom pisaġirauniaqtuq, Seir-ptauq piññaktaaġiniaġmigaat akiḷḷiiŋisa, aasii Israel akimmatiqaġluni.

¹⁹ Umialik qaiñiaqtuq Jacob-miñ, aasii suksraunġiġḷugich kisiŋŋuqtauruat inimi!”

²⁰ Tavraasii tautukkamigich Amalek-miut, uqallautiksrani uqallautiginiġaa, “Amalek sivulliuŋagaluaqtuq nunaqpauruani, aglaan aquvatigun suksraunġiqsauniaqtuq.”

²¹ Aasii qiviaqługich Ken-miut, uqallautiksrani uqallautigiŋagaa, “Inauvigiran anayanaitchuaguruq, suli uglun inillaŋammigin uyaġagmun.

²² Tainnaitkaluaġniŋani Ken-miuguruasi suksraunġiqsauniaqtusi, Assyria-m tigutaaqpasi.”

²³ Uqaluksrautini uqallautigiŋagaa, “Arraa, kiña iñuuyumiñaġniaqpa God-im taamna savakpauŋ?

²⁴ Umiaqpaich aglaan qaiñiaqtut Kittim-miñ aasii nagliksaaqtitaġilugik Ashur-lu Eber-lu; aasii ilaaptauq Kittim suksraunġiqsauniaġmiuq.”

²⁵ Tavraasii Balaam makiłłuni, utiġniqsuq inauvimiñun; Balak-tauq aullaqsimammiuq.