Numbers 23 - Iñupiatun Mumiksat Uqalugiksuat

¹ Balaam-gum uqallautigaa Balak, “Tallimat malġugnik ikipkaiviḷiuġutiŋŋa uvuŋa, itqanaiqsiḷutin tallimat malġugnik aŋusalluġruanik suli tallimat malġugnik aŋusallunik imnaiñik.”

² Balak piraksriusiamisun piŋaruq, aasii iluqatik Balaam-lu aitchuiŋaruk aŋusalluġruamiglu aŋusallumiglu imnaimik ikipkaiviḷḷaami.

³ Tavra Balaam-gum uqallautiŋagaa Balak, “Uumani makitallagiñ aitchuutikpich saniġaanni, avuŋaqtaallagluŋa Ataniġmun kasuġniaġmagaaġiaqtilluŋa. Uqallautiniaġikpiñ qanuq sumik iḷitchuġipkaqpaŋa.” Tavraasii kisimi qaaŋanuŋaruq qimiqqam,

⁴ aasii God-im kasuŋagaa. Balaam-gum uqallautigaa, “Ikipkaiviḷiuŋaruŋa tallimat malġugnik aasii aitchuivḷuŋa aŋusalluġruamik suli aŋusallumik imnaimik ikipkaiviḷḷaami.”

⁵ Atanġum uqallautigaa Balaam uqaluksraŋanik aasii tilivḷugu Balak-mun kiligiaquvlugu.

⁶ Tavraasii utiqami paqitkaa Balak makitaruaqsuli saniġaanni aitchuutigmi piqatigivlugich aullarripayaaŋich Moab.

⁷ Balaam nalautinniaġnivḷugu uqallaktuq uumiŋa: “Balak Moab-gum umialgata qaġġisiŋagaaŋa Aram-miñ, kivalliġñiñ iġġiñiñ ittuaq. ‘Qaiḷutin pigiitchuamik aitchukkich iñuŋich Israel. Qaiḷutin uqallautilugich suksraunġiġñiaġniḷugich iñuŋich Israel’

⁸ Qanuġluŋa pigiitchuamik qaitchiñiaqtuaŋa God-im qaiñŋaisaŋanik, Naakkaunnii uqaġluŋa suksraunġiunmik Atanġum suksraaŋaitchaŋanun?

⁹ Qaaŋiññiñ uyaġaich tautullagitka; Qimiqqaniñ qiñillagitka. Nunaqpaurut ilimiktigun; Isummatigiŋitchut iḷaunasugilutiŋ allanun nunaqpauruanun.

¹⁰ Kiŋuniiŋich Israel avyutun ittut Iñugiakpaił̣ł̣utiŋ kisinnaġumiñaitchut. Tuqullaglaŋa tutqiunmi nalaunŋaruatitun. Isukłiḷḷaglaŋa iḷaŋatitun God-im iñuŋisa.”

¹¹ Tavraasii Balak uqallaŋaruq Balaam-mun, “Qanuq imña aŋalatpiŋa? Mauŋautiraqpiñ uvva pigiitchuamik aitchuquvlugich akiḷḷiitka, aglaan uvva quviasaaġunmik aitchuqsiññaŋagitin.”

¹² Ilaata kiugaa, “Uqallakkumiñatualuktuŋa Atanġum qanuq uqaqukpaŋa.”

Balaam-gum Tugliq Nalautinniaġnikkaŋaa

¹³ Balak-gum aasii uqallautigaa Balaam, “Allamun inimuqasiŋŋa tautugnaġlugich iḷałhiñaŋich iñuŋich Israel. Pigiitchuamik aitchuqsaġitin taamaŋŋa.”

¹⁴ Nunamun naurivianuutigaa Zophim-gum qaaŋani Mount Pisgah-m. Tavraniasii ikipkaiviḷiuġniqsuq tallimat malġugnik aasii aitchuivḷuni aŋusalluġruamik aŋusallumiglu imnaimik ikipkaiviḷḷaami.

¹⁵ Balaam-gum uqallautigaa Balak, “Makitauraallagiñ ikipkaivigñi, kasuġiaġniaġiga God avani.”

¹⁶ Atanġum kasuŋagaa Balaam, uqallautivlugu qanuq uqaluksraŋiñik, aasii Balak-muktitqikł̣ugu uqautitquvlugu.

¹⁷ Utiŋaruq Balak-mun makitaruamun ikipkaivigmiñi, piqatigivlugich aullarriŋich Moab. Balak apiqsriruq qanuq Ataniq uqallaktilaaŋanik.

¹⁸ Balaam nalautinniaġnivḷugu uqallaktuq uumiŋa: “Qaiḷutin, Balak iġñiŋa Zippor-m, Naalaġniŋŋa uqaġuma.

¹⁹ God una iñuktun inŋitchuq, saglusuuruatun; Naaggaunnii iñugruiññatun isumalitqigaġluni. Unniqsuqłiigami sumik, pisuugaa; Uqallautaa nalautitchuuruq.

²⁰ Piraksriusiaqaŋaruŋa qaitchitquvluŋa quviasaaġutauruamik, aasii God quviasaaġunmik qaitchimman, allaŋŋuġumiñaitkiga.

²¹ Jacob-gum kiŋuniiŋi anniqsauniaŋitchut, qiñiġnaitchuq isumaaluunmik Israel-mi. Atanġum God-iŋatta itqatigigai; Nipatuvlutiŋ quliaġaat umialiginivḷugu.

²² God-im qaġġisiŋagaich Egypt-miñ; Suaŋŋatiqaqtigiruq God qimuktiġruatun.

²³ Aanġuaqtuutaitchuq, aŋatkularuanik, Suaŋŋataitchut anniġuġlugu Israel. Tavra iñuich uqaġniaqtut Israel-kun, ‘Qiñiqsiuŋ qanuq God savaŋatilaaŋa!’

²⁴ Iñuŋich Israel lion-ruatun ittut: Unaŋuiqsialaitchuatun aliktuiganikkaluaġnani suli niġianikkaluaġnani, Imianiqqaaŋaunnagu auŋat tuquttaġmi.”

²⁵ Tavraasii Balak uqallaktuq Balaam-mun, “Pigiitchuamik aitchuġuŋitkitin iñuŋich Israel, aglaantauq quviasaaġunmik aitchuġnagich!”

²⁶ “Uqallautianiŋagikpiñ,” Balaam-gum kiugaa. Uqallatualugniaqtuŋa sumik uqallautikpaŋa Atanġum.

Balaam-gum Piŋayuat Nalautinniaġnikkaŋaa

²⁷ Balak uqallaktuq, “Qaiñ maliŋŋa, allamun inimuutiniaġikpiñ. Uvamnun suagguuq God-im pigiitchuamik pipkaġumiñaġniaġaatin taikaŋŋa.”

²⁸ Tavra Balaam qaaŋanuutiŋagaa Mount Peor-m anmun qiñiġnaqtuaq nunagluktuaŋa.

²⁹ Balaam-gum uqallautigaa, “Ikipkaiviḷiuġiñ tallimat malġugnik uvuŋa aasii qaġġirriḷutin tallimat malġugnik aŋusalluġruagnik suli tallimat malġugnik aŋusallugnik imnaiñik.”

³⁰ Balak kamaksriñiqsuq uqaurrusiamisun, aasii aitchuivḷuni aŋusalluġruamik aŋusallumiglu imnaimik ikipkaiviḷḷaami.