Numbers 22 - Iñupiatun Mumiksat Uqalugiksuat

Umialgata Moab Qanniqsruġaa Balaam

¹ Iñuŋisa Israel aullatqiŋarut aasii nullaqhutiŋ qaiqsuamun Moab-mi kivaliñaaŋani kuuŋata Jordan suli akiani Jericho-m.

² Moab-gum Umialiŋa Balak, Zippor-m iġñiŋa, tusaagami iñuŋisa Israel suŋatilaaŋich Amor-miut suli iñugiaktilaaŋich Israel-gum iñuŋich,

³ ilaa iñuŋiḷu iqsittualaŋarut.

⁴ Moab-miut uqaŋarut aullarriŋiñun Midian-miut, “Ukua iñuich iñugiaktuat suksraunġiġñiaġaat supayaaq avatiptinni, qimukti aŋusalluq niġimmatun ivigaanik nunami.” Aasii Balak Umialik

⁵ tilisiŋaruq kivganik qaitquvlugu Balaam, iġñiŋa Beor-m, Pethor-miittuaq qaniŋani Euphrates River-m Amaw-m nunaŋani. Kiligiaŋagaat uumiŋa Balak-miñ: “Iḷisimatqugikpiñ uvva iñusalaich qaiŋarut Egypt-miñ; iñuŋich marra siaminŋarut sumipayaaq inillakhutiŋ nunaiġukłuta.

⁶ Iñugiakpaktut, qaiḷutin pigiitchuaq tuttirruŋ iliŋiññun; suagguuq akiisillasigivut aasii qimaktillugich nunamiñ. Iḷisimaruŋa uqallakkavich ikayuunmik, iñuich ikayuusiaqaġuurut, aasii-suli uqallakkavich pigiitchuamik, pigiitchuami ittut.”

⁷ Tavra Moab-miullu Midian-miullu aullarriŋich akiḷiutiksraligaaqłutiŋ pigiinniġmun Balaam-mugniqsut, aasii aitchuqługu Balak-gum kiliktuutaanik.

⁸ Balaam-gum uqallautiniġaich, “Siñiktaġitchi maani, aasii uvlaaku kiligniaġivsi qanuq Atanġum uqallautikpaŋa.” Moab-miuguruat tavra aullarriŋich Balaam-miinŋarut.

⁹ God-im ullaŋagaa Balaam aasii apiqsruqługu, “Kitkut marra makua iñuich iligni ittuat?”

¹⁰ Balaam uqallaktuq “Balak-gum uqallautipkaġiaŋagaaŋa

¹¹ iñuich amma qaiŋanivḷugich Egypt-miñ nuna iluqaan siḷviłługu. Pigiitchuamik aitchuqugai uvamniñ, aŋuyallasukługich aasii aullaqtillugich.”

¹² God-im uqautiniġaa Balaam, “Aullaqatiginagich, suli pigiitchuamik aitchuġnagich iñuŋich Israel, qanukkii quviasaaġusiaqaqtut uvamniñ.”

¹³ Uvlaaġmagu Balaam-gum ullaŋagaich Balak-gum kivgaŋich aasii uqallautivlugich, “Aisitchi; Atanġum aullaqatigitquŋitkaasi.”

¹⁴ Tavraasii utiŋarut Balak-mun aasii uqallautivlugu Balaam qaisuŋiññivḷugu.

¹⁵ Tavra Balak tilisiŋaruq iñugiałhaaqtuanik aullarrinik, qiksiñałhaaqtuanik sivulliġñiñ.

¹⁶ Balaam-muŋarut aasii uqaluanik qaaŋiqsiłługu Balak-gum: “Sumun-unnii qaipkatchaiḷiñak uvamnun!

¹⁷ Qutchiksiḷiġlutin akiḷiḷḷuataġniaġikpiñ suli kamagilutin qanuq uqallapayaaġuvich. Qaiḷutin pigiitchuamik aitchuġiakkich ukua iñuich.”

¹⁸ Aglaan Balaam-gum kiugaa, “Balak-gum aitchuġaluaqpaŋa qatiqtuanik manigñik suli kaviqsuanik manigñik igluqpamiñiñ, kamagiŋitchumiñaitkiga piraksriutaa Atanġum God-igiraġma mikiruurakkaluakun-unnii.

¹⁹ Siñiktallagitchi, taipkunatuttauq, iḷitchuġiyumauŋa qanuq Ataniq uqallautiksraqaġniaqtilaaŋa uvamnun.”

²⁰ Unnuaġman tavrani God-im ullaŋagaa Balaam aasii uqallautivlugu, “Ukua aŋutit apiqsruqpatin aullautisuglutin, itqanaiyaġumautin, aglaan kisian sutqugupkiñ kamagiluŋa.”

²¹ Tavraasii uvlaaġmagu Balaam-gum nanmausiqł̣ugu kakaktini aullaqatigiŋagaich Moab-miut aullarriŋich.

Balaam Kakaktiŋalu

²² God qinnaliŋaruq Balaam aullaqimman, aasii Balaam usiaqsiqtillugu kakaktimiñi, piqatiqaqhuni malġugnik kivgamiñik, isaġuliŋa Atanġum makinŋaruq apqunmun sapisaqługu.

²³ Kakaktim tautukkamiuŋ isaġulik makitaruaq savikpaqaqhuni, apqunmiñ saquŋaruq nunanun nautchiivigñun. Balaam-gum anaullaŋagaa kakakti aasii apqunmuktitqikł̣ugu.

²⁴ Tavraasii isaġulik makitaŋaruq apqutim amigḷisaġniŋanun akunġagnun malġuuk siiġñanik nautchiiviik aasii uyaġagmik katchiqaqhutiŋ akiḷḷiġiigñik.

²⁵ Kakaktim tautulgiññamiuŋ isaġulik, igliġniqsuq katchimun aasii karruutivlugu Balaam isigaŋa. Balaam-gum anaullavsaaġaa kakakti.

²⁶ Isaġulik iglauruq sivunmun; makiłłuniasii amitchuamun qaaŋiqsaaġviksraiḷaamun taliqpiñmun naakka saumium tuŋaanun.

²⁷ Tavraniasii, kakaktim tautulgiññamiuŋ isaġulik, nallaŋaruq. Balaam qinnaliqhuni anaullanagutiniġaa ayauppiamiñik.

²⁸ Tavraasii Atanġum suaŋŋatiksriñŋagaa kakakti uqallasivḷugu, aasii uqallaŋaruq Balaam-mun, “Qanuq aŋalanŋaraqpiñ? Summan uvva piyuaqpiŋa piŋasuiqsuaqhutin?”

²⁹ Balaam-gum kiugaa, “Kipagigiŋmakii uvva! Savikpaqaġuma tavra, tuqunnayaġikpiñ.”

³⁰ Kakaktim kiugaa, “Tavrauvaŋa kakaktiuŋitpik usiaqsiġviiñ iñuuniqtutilaaġni? Qaŋaunnii tainna aŋalanŋavigiñ?” “Naumi,” kiugaa.

³¹ Tavraasii Atanġum tautuktinŋagaa Balaam-mun isaġulik makitaruaq savikpaqaqhuni; aasii Balaam punŋaruq kiiñani kurrautivlugu nunamun.

³² Isaġulgam apiġigaa, “Summan uvva piyukpiuŋ kakaktin piŋasuiqsuaqługu? Qaiŋaruŋa uvva nutqaqtitchaqtuaqhutin, qanuq uvva sutilaan iłuaŋitchuq uvamni.

³³ Kakaktikpich aglaan tautukłuŋa saquŋaruq piŋasuni. Tainna piŋisuaqpan, tuqunnayaġikpiñ aasii iñuupkaġlugu kakakti.”

³⁴ Balaam-gum kiugaa, “Piḷuusiqiniqsuŋa. Naluniqsuŋa makitatilaaġnik apqunmi nutqaquvluŋa; aglaan iłuaġiŋitkupku sivunmun iglauguma, utiġniaqtuŋa.”

³⁵ Isaġulgam aglaan uqallautiŋagaa, “Aullaqatigisaġitin taapkua aŋutit, aglaan kisian uqallautigilugu qanuq uqallaqugupkiñ.” Tavraasii Balaam-gum aullaqatigiŋagaich.

Balak-gum Kasuġiaġaa Balaam

³⁶ Balak tusaagami Balaam qaisaġnivḷugu, kasuġiaŋagaa Ar-mi, iniqpauruami siñaani Arnon River-m killiŋani nunaŋata Moab.

³⁷ Balak-gum uqallautigaa, “Summan qaiŋitchuatin sivulliġmi qanniqapkiñ? Akiḷiutiksrakiññasugiraġma iliŋnun?”

³⁸ Balaam-gum kiugaa, “Qaiŋitpigmiuvva? Aglaan uvva, sumik suaŋŋanmik uvaŋa piqaqpik? Uqallakkumiñatualuktuŋa kisianik God-im uqaluksrirrutaanik.”

³⁹ Tavra Balaam-gum aullaqasiŋagaa Balak nunaaqqiŋanun Huzoth,

⁴⁰ tavrani Balak tuqutchiŋaruq pamiqsaanik suli imnaiñik aasii aitchuqługulu Balaam iḷaŋiññik aullarriḷḷu piqatigiraŋi.

Balaam-gum Sivulliq Nalautinniaġnikkaŋaa

⁴¹ Uvlaakumman uvlaami Balak-gum Balaam Bamoth Baal-muutiŋagaa, tavraniasii iḷaŋich Israel iñuŋisa Balaam-gum tautukkai.