Numbers 21 - Iñupiatun Mumiksat Uqalugiksuat

Akiisitkaich Canaan-miut

¹ Canaan-miuguruat umialgat Arad-mi kiluliñaaŋaniñ Canaan tusaagami iñuŋich Israel qaiñmugnivḷugich Atharim-kuaqłutik, akisaŋaniġaich suli tigutaaqtaksraqtaaġivlugich iḷaŋich.

² Tavraasii iñuŋich Israel unniqsuqłiiŋaniqsut Ataniġmun, “Pisaġipkaġupkich ukua iñuich uvaptignun, iluqaqpiuraŋisa nunaaqqiŋich suksraunġiġñiaġivut.”

³ Atanġum tusaavlugich ikayuŋagaich suli akimapkaqługich Canaan-miuguruaniñ. Tavra iñuŋisa Israel iluqaqpiuraŋisa suksraunġiŋagaich nunaaqqiŋiḷḷu, aasii atchiqł̣ugu taamna ini Hormah-mik.

Patukpagmiñ Piḷiaq Nimiġiaq

⁴ Iñuŋich Israel aullaŋarut Mount Hor-miñ siñaaguaqłutiŋ Red Sea-m naŋaqsaqługu nunaŋa Edom. Iglaullaġmiŋ aglaan iñuich manimmiḷguiḷiŋamarut;

⁵ aasii uqaaqsivḷutiŋ akiḷḷiġivlugu God suli Moses. Uqamayuŋarut, “Summan imña Egypt-miñ aullautiŋammiravsigut tuqutqusiññaqłuta maani nunagluktuami, niqaiḷami imġiḷamiḷu? Niqiqanŋuliqsugut uvva mattumiŋa niqigiitchuamik!”

⁶ Tavraasii Ataniq qaipkaiŋaruq tuqunalignik nimiġianik akunġannun iñuich, aasii iñugiaktuat iñuŋisa Israel kiipkaŋarut aasii tuquġaqhutiŋ.

⁷ Iñuich Moses ullakługu uqaġniqsut, “Piḷuusiqirugut uqaqapta akiḷḷiġivlugu Ataniq suli ilvich. Aŋaiyyutisigut Ataniġmun makkua nimiġiat piiqulugich.” Tavra Moses-gum aŋaiyyutiŋagai.

⁸ Tavraasii Atanġum tiliñiġaa Moses patugpagmik nimiġialiuquvlugu aasii iḷiḷugu napaqsramun, kiñapayaaq kiipkaqtuaq qiñiġumiuŋ maminniaġnivḷugu.

⁹ Tavra Moses patukpagmik nimiġialiuŋaruq aasii napaqsramukługu. Kiñapayaaq kiipkaŋaruaq qiviaqtuaq patukpagmun nimiġiamun maminŋaruq.

Mount Hor-miñ Moab-mun

¹⁰ Iñuŋisa Israel aullaqiŋarut aasii nullaqłutiŋ Oboth-mun.

¹¹ Oboth-miñ aullaqamiŋ, nullatqiŋarut Iye Abarim-mun nunagluktuami kivaliñaami Moab-miuguruat nunaŋata.

¹² Nullalgił̣ł̣utiŋ aasii Zered Valley-mun.

¹³ Tavraŋŋa aullalgiññamiŋ nutqaŋarut salliñaaŋagun Arnon River-m, nunagluktuaq iḷagivlugu Amor-miuguruat nunaŋat. (Arnon killiŋaniittuaq Moab-miullu Amor-miullu.)

¹⁴ Tainnaqługu Maqpiġaaq Atanġum Aŋuyagniŋigun quliaqtuaqaqtuq “nunaaqqiŋa Waheb Suphah-mi, suli natiġnaŋich; Arnon River,

¹⁵ suli aksraŋanaaŋich natiġnat nunaaqqiŋanuaglaan Ar-m suli tuŋaanun killiŋata Moab.”

¹⁶ Tavraŋŋa aasii inimuŋarut atiqaqtuamun Wells-mik Ataniq tavrani uqallaŋaruq Moses-mun, “Atautchimuktitkich iñuich, imiksriññiaġitka.”

¹⁷ Taimani Israel iñuŋich atuġniġaat una atuun: “Suvligitchi nivviat; Atuutigisiuŋ

¹⁸ nivviaq nivaaŋat umialgum iġñiŋisa aullarrauruat iñugnun, Nivaaq aullarrich tikkuaġautiŋich ataniġnaqutiqaqtuat Suli ayauppiaŋiññik.” Nunagluktuamiñ Mattanah-muŋaniqsut,

¹⁹ tavraŋŋaasii Nahaliel-mukhutiŋ, aasii Nahaliel-miñ Bamoth-mun,

²⁰ Bamoth-miñ natiġnaŋanuŋaniqsut nunaŋata Moab-miut, ataani qaaŋata Mount Pisgah-m, anmun qiñiqługu nunagluktuaq.

Akiisinmatigik Umialguruak Sihon-lu Og-lu

²¹ Tavraasii Israel iñuŋisa kivgatiŋ tiliŋagaich Amor-miut umialgannun Sihon inna uqautitquvlugu:

²² “Qaaŋiqsaaqtittigut nunagirakkun. Pamiqsaavullu apqun uniuġniaŋitkikput suli nunagnugluta naakkaunnii nautchiaqaġvigñun, suli imiġniaŋiñmiugut nivviaġiraġniñ; apqutikaavsiguaġniaqtugut qaaŋiġataġlugu nunagiran.”

²³ Aglaan Sihon-gum qaaŋiqsaaquŋiñŋagai iñuŋich Israel nunamigun. Katiłługich aŋuyaktini Jahaz-muŋaruq nunagluktuamun aasii aŋuyagiaŋagaich iñuŋich Israel.

²⁴ Israel-gum kiŋuvaaŋisa aglaan tuqunŋagaich iñugiaktuat uumigiritiŋ aŋuyakkamiŋ aasii nunannaktaaġivḷugu Arnon River-miñ salliñaamun Jabbok-muaglaan, Ammon-miut nunaŋannunaglaan, qanukkii killiŋat munaqsraukkaqłuni.

²⁵ Tavra Israel-gum iñuŋisa pisaġiŋagaich Amor-m iniqpaŋich, iḷagivlugu Heshbon suli iluqaisa avataaniittuat nunaaqqiŋich, aasii inillagvigivlugich.

²⁶ Heshbon una iniqpak nunaŋat Amor-miut. Tavrani umialiŋat Sihon aullarriuŋaruq. Aŋuyaqatiqaŋaruaq umialikkaluaŋanik Moab aasii pisaġivlugu iluqaan nunaŋa Arnon River-muaglaan.

²⁷ Tainnaqługu poets atuŋarut, “Qaisitchi Heshbon-mun, umialgum Sihon iniqpaŋanun! Nappatqiqugikput sivuani irrusiatun iḷiḷugu.

²⁸ Ikualaruatun Sihon-gum aŋuyaktiŋi aullaŋarut Heshbon-miñ; Suksraunġiŋagaat iniqpaŋa Ar-m Moab-mi, Maquŋagaa sunapayaaq qimiġaŋiññi Arnon River-m.

²⁹ Aḷakkaa ilivsi, iñugiraŋich Moab! Suksraunġiqsaurusi, nanġaqtaqsii Chemosh! God-igiravsi qimmaupkaġaich aŋutit, aasii-suli aġnat tigutaaqtaġiliutivlugich umialgata Amor-miut.

³⁰ Akiisinŋagivut, Heshbon-miñ-aglaan Dibon-mun, Nashim-miñ-aglaan Nophah-mun, qaniŋani Medeba-m.”

³¹ Tavraasii iñuŋich Israel inillaŋarut nunaŋanni Amor-miut,

³² Moses tilisiŋaniqsuq aŋutinik nalunaqtuakun qimilġusaqtuaquvlugu Jazer iniqpak. Iñuŋisa Israel pisaġiŋagaat Jazer iniqpak avataaniittuallu nunaaqqiuruat suli qimaktiłługich Amor-miuguruat.

³³ Tavra iñuŋisa Israel saquvlutiŋ Bashan-mugiakun apqutikun aullaġniqsut, aasii Umialgata Og-gum Bashan-mium aŋuyaktiŋisalu aŋuyagiaġniġaich iñuŋich Israel Edrei-mi.

³⁴ Ataniq uqallaktuq Moses-mun, “Iqsiginagu. Akimapkaġniaġikpiñ ilaaniñ, iñugipayaaqtaŋiññiḷḷu, suli nunaŋaniñ. Sihon-tun aŋalataġisaġmigiñ, Amor-miunun umialguŋaruaq Heshbon-mi.”

³⁵ Iñuŋisa Israel tuqunŋaniġaat Og, iġñiŋiḷu, iñugipayaaqtaŋiḷu, annaktuagiqł̣ugu, aasii piññaktaaġiŋagaat nunaŋa.