Numbers 20 - Iñupiatun Mumiksat Uqalugiksuat

Sut Nalautittuat Kadesh-mi

¹ Sivulliġmi tatqimi iluqaġmi nunaaqqiŋat Israel nunagluktuaŋanuŋarut Zin aasii nullaqłutiŋ Kadesh-mun. Tavrani Miriam tuquŋaruq suli tavrani iḷuviqługu.

² Nullaġvianni tavrani imġiñŋaruq, tavraasii iñuich katinŋarut akiḷḷiqsruqługik Moses-lu Aaron-lu

³ uqamayukłutiŋ: “Nakuułhaaŋanayaġniqsuq imma tuquaŋagupta sivuġaani Atanġum Tupqata piqatigilugich allat Israel kiŋuvaaŋich.

⁴ Summan taimma mauŋautiŋaniqpisigut nunagluktuamun? Tuqutqusiññaqhuta tamaani niġrutivullu?

⁵ Summan Egypt-miñ aullautiŋaraptigut inigiitchuamun nauriḷaiḷamun? Palauvaksraitchuq, fig-gitchuq, grape-gitchuq, pomegranate-giñmiuq. Imġitchuq unnii imma imiksramik!”

⁶ Moses-lu Aaron-lu uŋasiksiḷaaqhutiŋ iñugniñ makinŋaruk paaŋanun Tupqum. Punŋaruk kiiñatik nunamukługik, aasii qaumanġata Atanġum niptaġvigiŋaniġaik.

⁷ Atanġum uqallautigaa Moses,

⁸ “Ayauppiaq piḷugu sivuġaaniittuaq Sivunniuġutim Kiguunniŋata, aasii iluqasik Aaron-lu atautchimuktillugich iñuich. Tavrani aasii sivuġaanni iñuich uqallautilugu uyaġak igña, aasii imiq maqiniaqtuq tavraŋŋa. Imiq maqipkaġniaġiñ uyaġagmiñ, iñuiḷḷu niġrutiŋiḷḷu imiġumaut.”

⁹ Moses-gum isagiaŋagaa ayauppiaq, piraksriutaatun Atanġum.

¹⁰ Ilaatalu Aaron-guvlu atautchimuktinŋagaich iluqaisa iñuich sivuġaanun uyaġaum, aasii Moses uqallakłuni, “Naalaġnisiñŋa, paaqłaŋalaiḷauruasii! Imiksraqtuksrauvisigiñ tavra uumaŋŋa uyaġagmiñ?”

¹¹ Tavraasii Moses-gum ayauppiamik anaugaa uyaġak malġuiqsuaqługu, aasii atqunapiaġataqłuni imiq maqiŋaruq tavraŋŋa, iñupayaurallu niġrutillu imiŋarut.

¹² Atanġum aglaan suaŋagaik Moses-lu Aaron-lu. Uqallautigaik, “Ukpiqsrapiaŋiññavsik salumaruaq suaŋŋatiga qiñiqtillaraġa sivuġaanni Israel-gum kiŋuvaaŋiññun, aullatiniaŋitkisik nunamun unniqsuqłiisigiŋaramnun iliŋiññun.”

¹³ Taamna nalautinŋaruq Meribah-mi, Israel-gum kiŋuvaaŋich uqamayugmata akiḷḷiġivlugu Ataniq suli qiñiqtillammagich ilaa qanutun salumaruagutilaamiñik.

Edom Umialgata Qaaŋiqsaaqtitchaiḷigaa Israel

¹⁴ Moses aullaqtitchiŋaruq kiliktuiriñik Kadesh-miñ uqautisaqtuquvlugu umialga Edom. Uqaqtut, “Uqaluk una qairuaq iḷagiraġniñ, kiŋuvaaŋinniñ Israel. Iḷisimagitin siġġaġniuġutit igḷutuŋaravut,

¹⁵ maŋŋuuvut Egypt-muŋatilaaŋat, iñuuniaqhuta taavani iñugiaktuani ukiuni. Egypt-miut aŋalamaqłuŋagaich maŋŋuuvut uvagullu,

¹⁶ ququulaŋarugut Ataniġmun ikayuquvluta. Tusaaŋagaatigut aasii qaipkaivḷuni isaġuligmik, aullarrigiŋagikput aullaqapta Egypt-miñ. Uvvaasii Kadesh-miittugut, nunaaqqimi siñaani nunagiraqpich.

¹⁷ Apiġigiptigiñ apqusiqsigut nunagirakkun. Pamiqsaavullu apqun uniuġniaŋitkikput naaggaunnii nunagnun naakka nautchiaqaġvigñugluta, suli imiġniaŋitchugut nivviaġiraġniñ. Apqutikuaġniaqtugut qaaŋiġataġlugu nunagiran.”

¹⁸ Edom-miut aglaan kiuŋagaat, “Nunaptiguaquŋitkiptigiñ! Uuktuaqsaġaluaġuvsi, aŋuyagiaġniaġivsigiñ.”

¹⁹ Iñuŋisa Israel kiuŋagaat, “Apqutikuaġniaqtugut, aasii niġrutivut imiġniqpata imġutiŋnik, akiḷiġñiaġikput—qaaŋiqsaaġuksiññaqtugut uvva.”

²⁰ Edom-miut uqallatqiksiññaqtut, “Tamaunnaaġumiñaitchusi!” aasii iñugiakpakhutiŋ aŋuyaktiŋisa aŋuyagiaġniġaich iñuŋich Israel.

²¹ Edom-miuyaat apqusaaquŋiñmatiŋ nunamiktigun iñuŋich Israel, saquvlutiŋ allakuaġiaŋarut.

Aaron Tuquruq

²² Iluqaġmiŋ iñuŋich Israel-gum aullaŋarut Kadesh-miñ aasii tikił̣ł̣utiŋ Mount Hor-mun,

²³ siñaani nunaŋata Edom, tavrani Atanġum uqallautiŋagaik Moses-lu Aaron-lu,

²⁴ “Aaron nunamugniaŋitchuq unniqsuqłiisigiŋaramnun Israel-mun; tuquniaqtuq, qanukkii iluqasik paaqłaŋavlugu piraksriutiga Meribah-mi.

²⁵ Mayuutikkik Aaron-lu iġñiŋalu Eleazar Mount Hor-mun,

²⁶ aasii mattaqtillugich Aaron aŋaiyyuliqsiqpaukami qaliġuaŋich aasii atipkaġlugich Eleazar-mun. Aaron tavrani tuquniaqtuq.”

²⁷ Moses savaŋaruq Atanġum piraksriutaatun. Mount Hor mayuŋagaat takkuanni iluqaġmiŋ nunaaqqiuruat,

²⁸ tavra Moses-gum mattaqtinŋagai Aaron aŋaiyyuliqsiqpaukami qaliġuaŋich aasii atipkaqługich Eleazar-mun. Iġġim qaaŋaniillaġmiŋ Aaron tuquŋaruq, aasii Moses-lu Eleazar-lu atqaŋaniqsuk.

²⁹ Iluqaġmiŋ nunaaqqim iñuŋich iḷitchuġiŋarut Aaron tuqutilaaŋanik, aasii qivġuŋarut iluqaġmiŋ iñuiññaq qulini (30) uvluni.