Numbers 19 - Iñupiatun Mumiksat Uqalugiksuat

Aġraŋich Kaviqsuam Immulivium

¹ Atanġum uqallautiŋagaik Moses-lu Aaron-lu,

² “Pitquraq maliġuagaksrauruaq Atanġum piraksriutaa: Uqallautikkich iñuŋich Israel qaġġirrigisigaatin kaviqsuamik immulivigmik ivaŋaitchuamik surruutaitchuamik qimuktiuŋaitchuamiglu.

³ Aasii qaiḷḷugu Eleazar-mun aŋaiyyuliqsiqpamun. Siḷataanuutilugu nullaummiviuruam aasii tuqullugu takkuani Eleazar-m.

⁴ Tavraasii Eleazar auksraġluni argagmiñik tallimat malġugni siqił̣ł̣aktautigilugu tuŋaanun sivuġaata Tupqum.

⁵ Iluqaqpiuraŋa niġrun, amiqtuummaan, niqaa, auŋa, suli iŋaluaŋich, ikipkaqtuksrauruq takkuani aŋaiyyuliqsiqpaum.

⁶ Qiruksraġluni cedar-mik, hyssop-miglu, suli kaviqsuamik ukił̣haamik aasii miḷuqsautilugich ikualaruamun.

⁷ Taaptuma aquagun, iqaġigisigaich annuġaani aasii imiġmik ivvaġluni, tavra isiġisiruq nullaummivigmun; aglaan piraġausiq nalaullugu salumaitchuaguniaqtuq anaqalġataqtillugu.

⁸ Ikipkairuam immulivigmik iqaġiruksraġimmigaich annuġaani suli imiġmik kuviḷuni inmiñun, aglaan salumaitchuaguniaqtuq anaqalġataqtillugu.

⁹ Iñuk aasii piraġausiq nalaullugu salumaruaguruaq katitchiñiaqtuq aġraŋiñik immulivium aasii iḷiḷugich piraġausiq nalaullugu salumaruamun inimun siḷataani nullaummiviuruam. Aġrat tavrani inniaqtut aasii Israel-gum kiŋuvaaŋich atugaksraŋich imiġmik itqanaiyaġumiŋ salummautiksramik piraġausiq nalaullugu salumaitchuaguruam. Taamna piraġausiq atuġniaġaat piḷuutaiqsaġlugu.

¹⁰ Katitchiruaq aġranik iqaqsriruksraummiuq annuġaamiñik, aglaan salumaitchuaguniaqtuq anaqalġataqtillugu. Taamna maliġiraksraq inillaktauniaqtuq taimuŋaaglaan, Israel-gum kiŋuvaaŋiññullu suli allaniñ nunaniŋŋaqtauruanun iñuuniaqtuat akunġanni.

Aksiksiruat Tuquŋaruamik

¹¹ “Tuquŋaram timaa aksikpauŋ iñuum, salumaiññiaqtuq tallimat malġugni uvluni.

¹² Salummaqtuksrauruq imiġmik salummautiksraunmik piŋayuanni uvlut suli tallimat malġuk uvluanni, aasii salumasiñiaqtuq. Salummaŋitkumi aglaan piŋayuanniḷu suli uvlut tallimat malġuanni, salumasiñiaŋitchuq.

¹³ Kisut aksiŋagumiŋ tuquŋaruamik aasii salummaŋiḷḷutiŋ tainna salumaiññiaqtut. Qanukkii imġa salummautim siqił̣ł̣aktuutauŋaitchuq iliŋiññun salumaiḷiñiaġaat Atanġum Tupiŋa, suli anitauniaqtut Israel-miñ.

¹⁴ “Iñuk aasii tuquniqpan tupqum iḷuani, kiñapayaaq isiġmiuruaq tavrani tuqumman naakkaunnii isiqtuaq salumaiññiaqtuq tallimat malġugni uvluni.

¹⁵ Misuġuqtuutipayaat suli utkusipayaat tupiġmi matuagiḷaaqtuattauq salumaiḷiñiaġmiut.

¹⁶ Iñuum aksiksimagumiuŋ iñuk tuqutauŋaruaq naakka tuquliqtuaq ilimisun siḷami naakkaunnii kia iñuum aksigñiġumiuŋ tuquŋaruam sauniŋa naagga iḷuviŋa, salumaiññiaqtuq tallimat malġugni uvluni.

¹⁷ “Salumaitchuaq salumasisaġlugu, aġraksraġlutiŋ kaviqsuamiñ immulivigmiñ ikipkaŋaruamiñ piḷuun piiqsaqługu, aasii utkusigmuglugu, suli imilluatamik iḷalugu.

¹⁸ Sivulliġmi, iñuk piraġausiq nalaullugu salumaruaguruaq hyssop-mik pigisiruq, misuglugu immamun, aasii siqił̣ł̣aglugu tupiq, supayaat, suli iñuich tavraniittuat. Tuglia aasii, iñuum piraġausiq nalaullugu salumaruaguruam siqił̣ł̣autigisigaa imiq aksiŋaruanun tuquŋaruam iñuum sauniŋanik naakka tuquŋaruam timaanik naakka iḷuviġmik.

¹⁹ Uvlut piŋayuanni suli tallimat malġuanni iñuk piraġausiq nalaullugu salumaruaguruaq siqił̣ł̣aktiġisiruq imiġmik salumaitchuanun iñugnun. Uvlut tallimat malġuŋanni salummaġisigaich, iqaqsrianikpata annuġaamignik suli imiġmik ivvaġlutiŋ, salumasiñiaqtut piraġausiq nalaullugu siqiñiq nipikpan.

²⁰ “Salumaitkuvich aasii salumasisuŋitkuvich aasii iqaġiŋitkuviñ imiġmik akunŋaruamik aġramik, patchisauniaqtutin Atanġum Tupiŋa salumaiḷigupku, suli Israel-guruanun iḷauŋaiġñiaqtutin.

²¹ Taamna piraksriun atuumaraksraġigiksi taimuŋaaglaan. Iñuk siqił̣ł̣aktuiruaq imiġmik salummautiksramik iqaqsriruksraummiuq annuġaamiñik; kiapayaaq aksigñiġumiuŋ imiq salumaiññiaqtuq anaqalġataqtillugu.

²² Sunapayauraq salummaŋaitchuam iñuum aksiksaŋa salumaitchuaguniaqtuq, suli taaptuma alla iñuum aksigñiqpauŋ salumaitchuaq salumaiḷiñiaġmiuq anaqalġataqtillugu.”