Numbers 18 - Iñupiatun Mumiksat Uqalugiksuat

Savaaksrautiŋich Aŋaiyyuliqsit Levi-m Kiŋuvaaŋiḷḷu

¹ Atanġum uqallautiŋagaa Aaron, “Ilviḷḷu, iġñiġutiitillu, Levi-m kiŋuvaaŋiḷḷu patchisauniaqtusi suna nakuuŋitchuaq pikpan Salumaruami tupiġmi. Aglaan ilviñ iġñiġutiitillu kisivsi patchisauniaqtusi suna nakuuŋitchuaq pikpan aŋaiyyuliqsiqpaich savaaŋisigun.

² Qaġġisilugich nanmiñiq iḷagirasi, maŋŋuqaqtuat Levi-mik, savaqatigitqulutin iġniġutiitillu savakkuvsi savaavsiññik Tupim siḷataani.

³ Piraksriusiatigli savaaġiruksraġigaich ilignun suli savaaksriusiatiŋ Tupim siḷataani, aglaan aksiasaaniaŋitkaich salumaruaguruat atuġuuraŋich Salumaruami Inimi naakka ikipkaivigmi. Tainna pituaġumiŋ, iliŋiḷḷu suli ilivsi tuqutauniaqtusi.

⁴ Savaqatigiruksraġigaasi piraksriusiamiktitun iluqaani savaaksrami Tupim siḷataani, aglaan alla iñuk qallisaaniaŋitchuq ilivsiññun.

⁵ Iġñiġutiitillu kisivsi savaaġiraksraġigisi piraksriusiasi Salumaruami Inimi suli ikipkaivigmi, qinnautitqiŋitchumagitka Israel-gum kiŋuvaaŋich.

⁶ Uvaŋa tavra naliġaaġiŋagitka nanmiñiq iḷagirasi Levi-m kiŋuvaaŋich akunġanniñ Israel-gum kiŋuvaaŋich qaisaġivlugich ilivsiññun. Ilaaguaqtauŋarut uvamnun, savaaqallasivḷugich piraksriusiamignik Tupikun.

⁷ Ilvich aglaan iġñitillu kisivsi savaaġillaniaġiksi aŋaiyyuliqsauniq ikipkaivigmi ikipkaiñikun suli sut ittuat Salumaniqtauruami Inimi. Tamarra tamatkua piraksriusiaġigisi, uvaŋa qaiñŋavlugu ilivsiññun aŋaiyyuliqsauniq. Kiña iñugruiññaq qallituaġniqpan salumaruanun suġautaġiraŋiñun tuqutauniaqtuq.”

Aŋaiyyuliqsauruat Aitchuutiŋich

⁸ Atanġum uqallautiŋagaa Aaron, “Uvaŋa savaaksriñŋagikpiñ qaunagitquvlugich aitchuutit uvamnun: salumaruat aitchuutipayaat uvamnun Israel-guruat qaisaŋich uvamnun ilivsiññun qaitkitka iġñiġutignullu nalunaiqsaulugich iliŋnun, isuitchuamun.

⁹ Salumaruaguvlugich aitchuutauŋaruaniñ ikipkaŋaiḷḷutiŋ ikipkaivigmi, ukua ilvich piginiaġitin: palauvaksrat aitchuutauruat, piḷuunmun aitchuutauruat, suli nunuurautikun aitchuutauruat. Sunapayaaq qaisauruaq uvamnun salumaruaguvlugu tavra ilvich piginiaġitin suli iġñiġiraqpich.

¹⁰ Niġiraksraġigisi salumaruami inimi, suli aŋutit kisimiŋ niġiñiaġaich; salumaruaġiruksraġigisi.

¹¹ “Tavra suli, ilaaguaqługich aitchuutigiraŋiññik Israel-gum kiŋuvaaŋisa uvamnun iḷaŋa piñiaġmigiksi. Qitunġaġiigñivsiññi iḷaupayaaqtuaq salumaruaq piraġausiq nalaullugu niġiyumiñaġniaqtuq.

¹² “Qaitchiñiaġikpiñ nakuuniqtauruanik nauriaqqaaqtaŋiññiñ Israel-gum kiŋuvaaŋich aitchuutigiraŋiñik uvamnun ukiutuaġaġikpan: olive uqsruanik, wine-nik, suli palauvaksranik.

¹³ Iluqaisa ilvich piginiaġitin. Iḷagipayaaqtaqpich qitunġaġiigñivsiññi piraġausiq nalaullugu salumaruaguruat niġiḷḷaniaġaat.

¹⁴ “Sunapayaaq Israel-mi uvamnun ilaaguaqługu qaisauŋaruaq piginiaġiñ.

¹⁵ “Aŋayukłiupayaaqtuat miqłiqtut aŋutaiyaat naagga niġrutauruat Israel-gum kiŋuvaaŋich qaisaŋat uvamnun tavra piginiaġiñ. Aglaan akuqtuqtaksraġigiñ akiḷiun tauqsitqiksaġlugu aŋayukłiupayaaqtuaq miqłiqtuq, suli akuqtuimmiḷutin akiḷiunmik anayukłiġiraŋiñun niġrutit piraġausiq nalaullugu salumaitchuaguruaq.

¹⁶ Miqłiqtut atausimik tatqiñiŋaruat tauqsiġñiaġisi akikaaŋatitun tallimanik qatiqtuanik manigñik, nalaullugu inillaŋaruaq maliġiaksraun Tupiġmi.

¹⁷ Aŋayukłiŋich aglaan immuliviich, imnaich, suli nagrulgich tauqsitqikkumiñaitkisi; iluqaisa pigigitka suli aitchuutauruksraurut. Siqił̣ł̣autilugu auŋat ikipkaivigmun aasii ikipkaġlugu qaunnaŋat niġrutit aitchuutigilugu ikipkaivigmun, tipaa iviġaumanaqtuq uvamnun.

¹⁸ Niqiŋich taapkua pigigitin, sakiaŋiḷḷu taliqpiglu mumiŋat kivikługich aitchuutikun.

¹⁹ “Qaitkitka iliŋnun, iġñiġutiignun, suli paniutignun, taimuŋaaglaan, iluqaisa ilaaguaqługich nalunaiqsauruat aitchuutiŋich Israel-gum kiŋuvaaŋich uvamnun. Allaŋŋuġumiñaitchuq taamna unniqsuqłiisiga iliŋnun suli kiŋuniiġiraġnun.”

²⁰ Atanġum uqallautigaa Aaron, “Nunannagniaŋitchutin kiŋuvaannaktaaġisaġlugich, suli iḷaŋaunnii nunaŋa Israel ilignun qaiññiaŋitkaat. Uvaŋa, Ataniq, naamaruŋa pigigumŋa.”

Aitchuutit Levi-m Kiŋuvaaŋiññun

²¹ Ataniq uqallaŋaruq, “Aitchuutigiŋagitka Levi-m kiŋuvaaŋiññun qulikuuġutipayaaŋich iñuŋisa Israel qaisaŋich uvamnun. Taamna akiññaktaaġiniaġaat savaamiktigun qaunagimmarruŋ Tupiq nayuqtauviga.

²² Allat Israel-gum kiŋuvaaŋich qalliruksraġiŋitkaat Tupiq. Qallituaqparruŋ tatavsaqtauniaqtut tuqqutikun.

²³ Tavraŋŋaaglaan kisimiŋ Levi-m kiŋuvaaŋich qaunaginiaġaat Salumaruaq Tupiq, tatavsaqtauniaqtut nakuuŋitchuaq pikpan tavrani. Taamna allaŋŋuġniaŋitchuq pitquraq suli tunŋaniaqtut kiŋuniiġiraġnun. Levi-m kiŋuvaaŋich nunaqaġniaŋitchut Israel-mi,

²⁴ qaitchiŋavluŋa iliŋiññun pigiraksraŋannik qulikuuġutaannik Israel-gum kiŋuvaaŋich nalunaiqsaġivlugu aitchuutauruat uvamnun. Tainnamik uqautiŋagitka kiŋuvaannaktaksraqaġniaŋiññivḷugich akunġanni Israel-gum kiŋuvaaŋich.”

Levi-m Kiŋuvaaŋisa Qulikuuġutiŋich

²⁵ Atanġum uqallautigaa Moses,

²⁶ “Uqautikkich Levi-m kiŋuvaaŋich innaġlugich: Akuqtuiguvsi Israel-gum kiŋuvaaŋich qulikuuġutiŋiññik Atanġum qaisaġiraŋiññik ilivsiññun, qaitchiruksraurusi quliŋannik qulikuuġutim Ataniġmun.

²⁷ Taamna ilaaguaqtauruaq aitchuun inniaqtuq aitchuutaatitun nautchialiqirit qaitchimmata nutauruamik palauvaksramik suli nutauruamik wine-mik.

²⁸ Tainnaġlusi qaitchiñiaqtusi ilaaaguaqtauruamik aitchuunmik Ataniġmun qulikuuġutipayaaguvlugich qaisaŋiññiñ Israel-gum kiŋuvaaŋisa. Taamna ilaaguaqtauruaq aitchuun Ataniġmun qaiññiaġiksi Aaron-mun aŋaiyyuliqsiqpauruamun.

²⁹ Qaitchasi pigigñiqtaulugu salumaniqtaulugulu akuqtuaġiravsiññiñ.

³⁰ Qaitkanikkuvsiuŋ nakuuniqtauruaq, iḷakuŋa pigiyumiñaġiksi, tainnatuttauq nautchiiritun pigimmatun iḷakuuruat aitchuiganikami.

³¹ Ilviḷḷu qitunġaġiraqpiḷḷu niqigiyumiñaġisi sumiitkaluaġuvsi, akiññaktaaġigiksikii qaunagikavsiuŋ Tupiq.

³² Pasirauniaŋitchusi niġiguvsigik, nakuuniqtaŋanik aitchuiguvsi Ataniġmun. Salumaiḷinasigiŋ salumaruaguruat Israel-gum kiŋuvaaŋich aitchuutigiraŋich niġiḷusi nalliŋiññik nakuuniqtauruaq qaiñŋaiñŋaan. Tainna pituaġuvsi, tuqutauniaqtusi.”