Numbers 17 - Iñupiatun Mumiksat Uqalugiksuat

Aaron-gum Ayauppiaŋa

¹ Atanġum uqallautiŋagaa Moses,

² “Uqallautikkich Israel-gum kiŋuvaaŋich aitchuqulutin qulit malġugnik (12) ayauppianik, atausimik aullarriḷḷaaġiraŋanniñ maŋŋuuruat. Agliutillaalugu iñuum atqa ayauppiaŋanun

³ aasii aglagmiḷugu Aaron atqa Levi-m maŋŋugiraŋisa ayauppiaŋannun. Atausimik ayauppiaqaġniaqtuq aullarriŋanniñ maŋŋuullaaruat.

⁴ Tupiġmuutilugich nayuqtauvimnun aasii iḷiḷugich sivuġaanun Kiguunniŋata Sivunniuġutim, uqaġvikaaptinni.

⁵ Tavraasii ayauppiaŋa naliġaktaġa nauriñiaqtuq nautchianik. Tainnaġlugu Israel-gum kiŋuvaaŋich uqamayuguktuat ataramik akiḷḷiġivlutin nutqaqtinniaġitka.”

⁶ Moses-gum aasii uqautiŋagaich Israel-gum kiŋuvaaŋich, aullarrigillaaraŋich aasii qaitchiñiqsut ayauppianik ilaanun, atausiḷḷaa maŋŋullaaġiramigniñ, qulit malġuuvlugich (12), Aaron-guptauq ayauppiaŋa piqatigivlugu.

⁷ Tavraasii Moses-gum iḷiñiġaich ayauppiat Tupiġmun sivuġaanun Atanġum Kiguunniŋata Sivunniuġutikun.

⁸ Uvlaakumman, Moses Tupiġmukami, tautuŋagaa Aaron ayauppiaŋa, sivuniqaqtuaq Levi-m maŋŋuŋaniñ, naurisaanigniqsuq. Naurivḷuniasii nauriaksranik, almonds-liuqtuq naanŋaruanik!

⁹ Moses-gum tautuktinŋagaich iluqaisa ayauppiat Israel-gum kiŋuvaaŋiññun. Qiñiŋagaich, aasii aullarriullaaruat ayauppiallaatiŋ tasutqiŋagaich.

¹⁰ Ataniq uqallaktuq Moses-mun, “Aaron-gum ayauppiaŋa iḷisaġiñ sivuġaanun Sivunniuġutim Kiguunniŋata. Kiliktuutauluni itchumauq Israel kiŋuvaaŋiññun paaqłaguktuanun tuqutauniaqtilaaŋiññik uqamayuŋaiŋisuaqpata.”

¹¹ Moses-gum savaaġiŋagaa Atanġum piraksriutaa.

¹² Israel-gum kiŋuvaaŋich uqallaŋarut Moses-mun, “Tuquniaqtugut! Nalupqinaitchuq tuquniaqtilaaqput!

¹³ Kiñapayauraq qallisiññaqtuaq Tupiġmun tuqusuuruq. Kisiŋŋuqtuagut tuquniaġniqpisa, suli?”