Numbers 16 - Iñupiatun Mumiksat Uqalugiksuat

Paaqłagniŋat Korah-vlu, Dathan-guvlu, suli Abiram-gum

^1-2 Korah-m, iġñiŋata Izhar-m, iḷauruat Kohath-nun, kiŋuvaaguvluni Levi-mun, paaqłagniġaa aullarriñiŋa Moses. Piŋasullu allat iḷḷativlutiŋ maŋŋuqaqtuat Reuben-miñ, Dathan-miñ suli Abiram-miñ, iġñiŋich Eliab, suli On iġñiŋa Peleth iḷaqaqłutiŋ 250-tun iñugiaktigiruanik Israel-gum kiŋuvaaŋiññik, aullarrigisuuramignik nunaaqqimigni.

³ Katiłłutiŋ sivuġaanugniqsut Moses-guvlu Aaron-guvlu aasii uqautivlugik, “Iŋattaqpaitchusik uvva! Iluqaġmiŋ nunaaqqim iñugiraŋich salumarut, suli Ataniq itqatauruq iliŋiññun. Summan, aasii uvva, Moses, aullarriñagutiviñ Atanġum iñuŋiññik?”

⁴ Moses-gum taamna tusaagamiuŋ, punŋaruq nunamun aasii aŋaiyyuaqsivḷuni.

⁵ Tavraasii uqautiŋagaa Korah maliġuaqtigiraŋiḷḷu, “Uvlaaku uvlaami Atanġum iḷitchuġipkaġniaġaatigut kiña ilaata pigitilaaŋa suli kiña salumatilaaŋa; naliġaaġirani sivuġaanuktinniaġaa ilimiñun ikipkaivigmi.

^6-7 Uvlaaku uvlaami maliġuaqtigirasiḷu siḷaavyiunnik piḷusi ikipkaiviusuuruanik, immiġisigisi ikualaruanik aluanik suli tivraġiksautinik, ikipkaivigmuutigisigisi. Tavraasii iḷitchuġiñiaqtugut nalliqput Ataniġmun piriksraqtaaġiŋatilaaŋa. Uvva ilivsi Levi-mun kiŋuvaaguruasii iŋattaqpaałłaŋarusi!”

⁸ Moses-gum uqautivsaaġaa Korah. “Naalaġnisitchi, Levi-mun kiŋuvaaguruasii!

⁹ Uvvaimña suqpauŋiññasugivisiuŋ God-iŋata Israel ilaaguaqtaġiŋammasi iluqaaniñ Israel nunaaqqiŋaniñ? Ilaa savaŋagaa ilimiñun sivuġaanullasivḷusi savaaksrasi savaaġillavlugich Atanġum Tupqani, aasii ikayuqługich nunaaqqiuruat suli alġaqsruqługich.

¹⁰ Uvva sivuġaanullasivḷusi pipkaġaasi, taputivlugich aniqatipayaurasi Levi-m kiŋuvaaŋich; naakkauvva aŋaiyyuliqsausukłusi pisuktusi!

¹¹ Uqamayuutigikavsiuŋ Aaron, tavra paaqłakkiksi Ataniq ilviḷḷu maliġuaqtigiravsiḷu.”

¹² Tavra Moses-gum qaitqugaluaġaik Dathan-lu Abiram-lu, uqallaksiññaŋaruk, “Qaiñiaŋitchuguk!

¹³ Naamaŋitpa tavra aullautiŋagavsigut naurisuqtuamiñ maqiugaqtuaq immugniglu honey-ñiglu nunaŋaniñ Egypt tuqutquvluta maani nunagluktuaŋani? Kamanniraaġugmivisigut suli?

¹⁴ Naurisuqtuamik suli uvva nunaksriñŋaitkivsigut maqiugaqtuaq immugniglu honey-ñiglu naaggaunnii nunanik nautchiiviksranik nanmiñiq uvagut piksraptinnik, uvva-suli naagga sagluqiniatakkivsigut. Qaiñiaŋitchuguk!”

¹⁵ Moses uumitchakłuni uqallaktuq Ataniġmun, “Akuqtuġnagich taapkua aŋutit aitchuutiksrakkaluaŋich iliŋnun. Nalliat unnii pimaqłuŋaitkiga; kakaktiŋich unnii piññaktaaġiŋaitkitka.”

¹⁶ Moses-gum uqallautigaa Korah, “Uvlaaku ilviḷḷu 250-iuruallu maliġuaqtitin Tupiġmuktuksraurusi Atanġum nayuqtauvianun; Aaron suli tavraniinniaġmiuq.

¹⁷ Iluqavsi qaġġirriruksraurusi siḷaavyiunmik ikipkaiviusuuruat piḷḷaalugich, tivraġiksaunmik immiġḷugich, manisaġisi ikipkaivigmi.”

¹⁸ Siḷaavyiutillaamignik piŋaniqsut, aumaruanik aluanik ikusivḷutiŋ tivraġiksautiniglu, qikaŋarut paaŋani Tupqum piqatigivlugik Moses-lu Aaron-lu.

¹⁹ Koram tavra katinŋagaich nunaaqqim iñuŋich, aasii qikaaqsivḷutiŋ sanmivḷugik Moses-lu Aaron-lu paaŋani Tupqum. Tavraŋŋatchiaq qaumanġa Atanġum niptaŋaruq iluqaiññun katittuanun,

²⁰ tavraasi Ataniq uqallaktuq Moses-mullu Aaron-mullu,

²¹ “Avuŋaqtaaġitchik ukunaŋŋa iñugniñ, suksraunġiġniaġitka tavraŋŋatchiaq.”

²² Moses-lu Aaron-lu aglaan punŋaruk kiiñatiŋ tułługik nunamun aasii uqallakłutik, “God-auruatiin, iñuggusiqsimaaġiñ sunapayaaq. Nalliqput tavra piḷuusiqimman, qinnautisuuviuŋ iluqaan nunaaqqiuruaq?”

²³ Atanġum aasii uqautiŋagaa Moses,

²⁴ “Uqallautikkich iñuich piiqsaaqulugich tupiŋiñiñ Korah-vlu, Dathan-lu, suli Abiram-gum.”

²⁵ Tavraasii Moses, piqatiqaqłuni aullarriŋiñik Israel, Dathan-muŋaruq suli Abiram-mun.

²⁶ Uqautigaich iñuich, “Piiġitchi tupiŋiñiñ ukua piḷuusiqirich suli aksianasigik suġautaŋich! Tainna piguvsi tuquniaqtusi piqatigilugich piḷuusiqiaŋich pisigilugich.”

²⁷ Tavra uŋasiksiḷaaŋarut tupiŋiñiñ Korah-m, Dathan, suli Abiram-gum. Dathan-lu, Abiram-lu anivḷutik makitaŋaruk paaŋiññi tupiġmiŋ, piqatigivlugich tuvaaqatitiŋ miqłiqtutiglu.

²⁸ Moses-gum uqautigaich iñuich, “Uvva iḷitchuġiniaqtusi Ataniġmun tiliŋatilaamnik savaquvluŋa makkuniŋa suli uvaŋa isumaptun aŋalatchiŋaisilaamnik tamatkuniŋa.

²⁹ Ukua iñuich tuquniqpata surruutaił̣ł̣utiŋ tatavsaqtaugaluaġnatiŋ God-miñ, tavra Atanġum ququaŋaitkaaŋa.

³⁰ Aglaan Ataniq salapqiŋaitchuamik savagniqpan, inna nuna agmaqtitpauŋ isigaŋisa ataaniñ iiḷiqtuatun pikpagich iluqaisalu nanmiñiq suġauttapayauraŋiḷḷu, agmaruakkun kataglutiŋ iñuuguraġniallaġmiŋ iniŋannun tuquŋaruat, iḷitchuġiniaqtusi tavra taapkunuŋa iñugnun ayyaŋatilaaŋat Ataniq.”

³¹ Uqaġuiġḷuqqaaqtuq Moses, nuna ataanniittuaq Dathan suli Abiram agmaŋaruq

³² aasii iivlugich qitunġatiglu, iḷagivlugich Korah-m maliġuaqtigiraŋich suġautaŋiḷḷu.

³³ Tavra iñuuguraġniallaġmiŋ tasamuŋaŋarut iniŋannun tuquŋaruat, suġautaqtuummaġmiŋ. Nunam umŋutivlugich, tammaŋarut.

³⁴ Iluqaġmiŋ iñuŋich Israel tamaaniittuat qimaaŋarut avaalaruat tusaagamisigik, “Aqpamik ki! Nunam uvva iiñiaġuŋnaġmigaatiguttauq!”

³⁵ Tavraasii Atanġum qaipkaŋagaa igniq qiḷagmiñ aasii ikipkaqługich 250-iuruat aŋutit ikipkairuat tivraġiksautinik.

Ikipkaiviuruat Siḷaavyiutit

³⁶ Tavra Ataniq uqallaŋaruq Moses-mun,

³⁷ “Uqallautisiuŋ Eleazar, iġñiŋa Aaron aŋaiyyuliqsiqpak, patukpaich siḷaavyiutit piiqulugich iḷakutaŋiñiñ ikipkaŋaruat siḷaavyiutitkii salumaruagurut, aasii siamillugich aluat siḷaavyiutiŋiñiñ sumun allamun.

³⁸ Siḷaavyiutit piŋich taapkua aŋutit tuquŋaruat piḷuusiqiŋavlutiŋ. Eleazar-m aasii siḷaavyiutit kautaqtuksraugai maptukłiuraġlugich. Matuliuqtuksrauruq saniġaŋa ikipkaivigmun taaptumiŋa savił̣hamik. Taapkua siḷaavyiutit atuŋagaich uvamnun tivraġiksautinik aitchuigamik, tainnainniġman salumaruagurut uvamni. Kiliktuutauyumauq kautaqtaq savił̣haq nalunaiḷutauluni Israel-gum kiŋuvaaŋiññun.”

³⁹ Tavra Eleazar-m aŋaiyyuliqsiqpaum kautaŋagai maptukłivḷugich siḷaavyiutiŋich matuliuqługu saniġaŋa ikipkaivium.

⁴⁰ Taamna kiliktuutigiŋagaa Israel-gum kiŋuvaaŋiññun kiñaunnii kiŋuniiġiŋitchaŋa Aaron-gum ikipkaivigmugluni ikipkaitquŋił̣ł̣ugu tivraġiksautinik Ataniġmun. Tainna pituaġumi suksraunġiqsauniaqtuq Korah-tun suli maliktiŋisitun. Iluqaan tamanna savaaġiŋaniġaat nalaułługu Atanġum piraksriutaa Eleazar-mun Moses-kuaqługu.

Aaron-gum Annautigai Iñuich

⁴¹ Uvlaakumman nunaaqqim iñugiraŋich iluqaġmiŋ uqamayuŋamagaik Moses-lu Aaron-lu uqallakłutiŋ, “Tuqunŋagisi imma Atanġum iñuŋisa iḷaŋich.”

⁴² Katitanikkamiŋ akiḷḷiqsruqługik Moses-lu Aaron-lu, qiviaġniqsut Tupqum tuŋaanun aasii tautugniġaat nuviyam taluraŋa tupiq aasii qaumaniŋa Atanġum niptaŋaniqsuq.

⁴³ Moses-lu Aaron-lu qikaġiaŋaruk sivuġaanun Tupqum,

⁴⁴ aasii Ataniq uqallaktuq Moses-mun,

⁴⁵ “Avuŋaqtaaġitchik ukunaŋŋa iñugniñ, suksraunġiġñiaġitka tavraniitillugich!” Iluqatik punniqsuk kiiñatik nunamukługik,

⁴⁶ aasii Moses uqallaktuq Aaron-mun, “Siḷaavyiun piḷugu, aluaksraġutin aumaruanik ikipkaivigmiñ, aasii tivraġiksaun iḷiḷugu aluanun. Qilamiqsruġlutin iñugnuuttiuŋ aasii salummautim piraġausiŋa atuġlugu iliŋiññun. Qilamik! Atanġum uumitchautaa suaŋŋaŋaruq naŋirrutiqpak isagutianigmiuq.”

⁴⁷ Aaron-gum kamagiŋagaa, siḷaavyiutiŋa pivḷugu aqpamik akunġannuŋaruq kasimaruat iñuich. Tautukkamiuŋ naŋirrutiqpak isagutianiktuaq, iḷisiñiqsuq tivraġiksaunmik aluanun aasii piraġausiŋa salummautim atuqługu iñugnun.

⁴⁸ Tavra taaptuma nutqaqtinŋagaa naŋirrutiqpak, aasii makitaŋaruq akunġanni iñuuruallu tuquaniktuallu.

⁴⁹ Iñuich tuquruat iñugiaktilaaqaŋarut 14,700-tun, kisitkaluaġnagich tuquruat pisigivlugu Korah-m paaqłautaa.

⁵⁰ Naŋirrutiqpak nutqaġman, Aaron utiŋaruq Moses-mun paaŋanun Tupqum Kasimaviuruam.