Numbers 15 - Iñupiatun Mumiksat Uqalugiksuat

Pitqurat Aitchuiñikun Ikipkautitigun

¹ Ataniq uqallaktuq Moses-mun,

² “Uqautilugich Israel-gum kiŋuvaaŋich aasii innaġlugich: Tikitkanikkuvsiuŋ nuna ilivsigñun qaisaġa aimaaġvigiliutisaġlugu

³ qaitchigisirusi Ataniġmun pamiqsaanik naakka imnaiñik, aitchuutinik ikipkautitigun itkaluaqpata naagga unniqsuun nalautitkanikpan, naagga aitchuutigisiññaġlugich naagga niqinaqutigilugich pisigilugu Ataniq, illit aasii tivraġigḷutiŋ iviġaumanaġlugu Ataniġmun.

^4-5 Kiña aitchuutiqaġumi pamiqsaanik naakka imnaiñik Ataniġmun, qaġġirrivsaaqsaqtuq uqumaisigilugu malġuk pounds-tun palauvagmik akunŋaruamik, malġuk pints-nik olive uqsruanik. Qaisaugisiruq palauvaksranun aitchuutauluni suli malġugnik pints-nik wine-mik kuviḷugu aitchuutauniaqtuamik.

⁶ Aŋusalluq imnaiq aitchuutaukpan, qaġġiriḷusi sisamanik pound-nik uqumaisigiruamik palauvagmik akunŋaruamik piŋasunik pint-nik olive uqsruanik.

⁷ Qaġġirrilusiḷu wine-miglu imaqtutigilugu piŋasutun pint-tun. Taapkua iluqaisa aitchuutigilugich tivraġiksuat Ataniġmun.

⁸ Itqanaiyaġuvsiuŋ aŋusalluġruaq ikipkaġlugu aitchuutauniaqtuaq naagga unniqsuunmun nalautitkanikpan naagga iḷammiuġutikun aitchuutaulugu Ataniġmun,

⁹ qaġġirriḷusi palauvaksraq aitchuutauruaq itchaksratun pounds-tun uqumaisigilugu palauvak akullugu sisamanik pint-nik olive uqsruanik.

¹⁰ Qaġġirrilusiḷu wine-mik imaqtutigilugu sisamatun pint-tun. Taapkua iluqaisa aitchuutigilugich tivraġiksuat Ataniġmun.

¹¹ “Tavra taapkua aitchuutaullaaniaqtut aitchuisaqtuni aŋusalluġruamik, aŋusallumiglu imnaimik, imnaimik, naagga nagruligmik.

¹² Atausił̣hiñauŋitpan niġrun ikipkautauruaq, iḷḷatiruksrat aitchuutinun agliḷaallaaniaġaich iñugiaktilaaŋatitun.

¹³ Israel-mun kiŋuvaagupayaaqtuat tainna piruksrauniaqtut qaitchiraġigumiŋ niqinik ikipkautikun, tipaa taaptuma iviġaumanaqtuaq Ataniġmun.

¹⁴ Aasii allaniñ nunaniŋŋaqtaurauniñ akunnavsiññi iñuuniaqtuaqaqpan, sivikitchuami inniaqtuamik naagga itchaġataqtuanik, niqinik aitchuisaqpata, tipaa iviġaumagiraŋa Atanġmun, atuqtaksraġiniaġaich maliġiraksriaguruat taapkua.

¹⁵ Taimuŋaaglaan, maliġiraksriutauruat ilivsiññun tunŋaniaġmiut tainnaptauq iglaaguruanun allaniñ nunaniŋŋaqtuaguruanun iñuuniaqtuanun akunnavsiññi. Ilivsiḷu iliŋiḷḷu ativlusi qiñiġaasi Atanġum;

¹⁶ pitqurat maliġiraksrallu tunŋaniaqtut ilivsiññun iliŋiññullu.”

¹⁷ Ataniq uqallaktuq Moses-mun,

¹⁸ “Uqautilugich Israel-gum kiŋuvaaŋich aasii innaġlugich: Tikitkanikkuvsiuŋ nuna ilivsigñun qaisaġa aimaaġvigiliutisaġlugu,

¹⁹ niġiguvsi niqinik nauruanik taavani, iḷaŋiñik ilaaguaqsiḷḷakkisirusi aitchuutiksranik Ataniġmun.

²⁰ Punniliuġuvsi, sivulliq punniq nutaamiñ palauvaksramiñ piḷiaq qaisaugisiruq ilaaguaġlugu Ataniġmun.

²¹ Taimuŋaaglaan, ilaaguaŋaruaq aitchuun qaisauruksrauruq Ataniġmun punniliavsiññiñ.

²² “Aglaan ilivsi pisaaġigaluaġnasi maliġiŋiññiġuvsigiŋ maliġiraksrat Atanġum qaisaŋich Moses-mun,

²³ suli iḷaanni qakugulikpan nunaaqqiuruat iluqaiññik maliġuaŋiññiqpata Atanġum piraksriutiŋiñik Moses-kun,

²⁴ killukkuaġniqpata naluvlutiŋ nunaaqqiuruat, aitchuiruksraurut aŋusalluġruamik ikipkautikun, tipaa iviġaumanaġniaqtuq Ataniġmun. Maliġiraksraġigaat piraksriun palauvaksramik aitchuutiksrakun suli wine-mik aitchuunmik. Maniriruksraurut aŋusallumik nagruligmik piḷuutinun aitchuunmik.

²⁵ Aŋaiyyuliqsiqpaum savaaġiniaġaa piraġausiq nalaullugu salummaġniksraŋat nunaaqqiuruat, tavraasii suliqutigiŋaiqsauniaqtut, killukkuaġutaat pisaaġilutiŋ piŋaiñmarruŋ atakkii qaġġirrirut piḷuutinun aitchuutiksranik niqinik Ataniġmun.

²⁶ Iluqaġmi nunaaqqiŋat Israel-gum kiŋuvaaŋich allaniñ nunaniŋŋaqtauruallu iñuuniaqtuat akunġanni suliqutigiŋaiqsauniaqtut, iluqaġmiŋkii iḷauŋavlutiŋ killukkuaġunmi.

²⁷ “Nalliqsi naluluni piḷuusiqiŋaniqpan, aitchuiruksraurusi aġnasallumik nagruligmik piḷuutinun aitchuutigilugu.

²⁸ Ikipkaivigmi aŋaiyyuliqsiqpaum savaaġiniaġaa piraġausiŋa salumasiñiksravsi piḷuutivsiññiñ, aasii suliqutigiŋaiqsauniaqtusi.

²⁹ Maliġiraksriaq tunŋaruq iluqaiññun pisaaġiŋiłłutiŋ piḷuusiqiruanun, Israel-mun kiŋuvaagugaluaqpata naagga iñuuniaqatauruat allaniñ nunaniŋŋaqtauruaniñ.

³⁰ “Iḷisimagaluaŋŋaġmiŋ aglaan piḷuusiqigumiŋ, Israel-mun kiŋuvaagugaluaqpata naagga allaniñ nunaniŋŋaqtaugaluaġumiŋ, pasiraurut aŋalałługu Ataniq kipakkutikun, aasii tuqutauniaqtut,

³¹ Ayyaŋavlugukii Atanġum uqallautaa aasii iḷisimagaluaŋŋaġmiŋ navgivḷutiŋ piraksriutiŋiññik. Patchisaurut iliŋich tuqutauniaġumiŋ.”

Iñuk Kamaksriŋitchuaq Sabbath-mik

³² Atautchimi, Israel-gum kiŋuvaaŋich nunagluktuamiiñŋaisasuli, iñuk paqitauniqsuq katitchiruaq igniqsuutiksranik qirugnik Sabbath-tuani.

³³ Moses-muutiŋaniġaat, Aaron-mullu, iluqaiññullu nunaaqqim iñuŋiñun,

³⁴ sumutchaiḷiŋagaat qanupiaq aŋalanniaqtilaaŋa naluvlutiŋ.

³⁵ Tavraasii Ataniq uqallaŋaruq Moses-mun, “Iñuk tuqutauruksrauruq; iluqaġmiŋ nunaaqqim iñuŋisa uyaġagnik miḷḷuuġlugu tuqunniaġaat siḷataani nullaummiviuruam.”

³⁶ Tavra iluqaġmiŋ nunaaqqim iñuŋisa siḷataanuutivlugu nullaummivigmiŋ tuqunŋagaat miḷḷuuqługu uyaġagnik, Atanġum piraksriutaatun.

Maliġiraksrat Annuġaat Niviŋaluqutaŋisigun

³⁷ Ataniq uqallaktuq Moses-mun,

³⁸ “Uqautilugich Israel-gum kiŋuvaaŋich aasii innaġlugich: ‘Niviŋaluqutaliuġlusi kaŋiġalluŋigun annuġaavsi suŋauraaqtuamik akłunauraliḷḷaalugu niviŋaniaqtuaq. Tainna piḷḷaaruksraurusi taimuŋaaglaan.

³⁹ Niviŋaluqutauruat itqautauniaqtut, taututuaġaġiguvsigik itqaġniaġisi piraksriutitka suli kamagilugich; tainnaġuvsi tununniaŋitkivsiñŋa suli maliġilugich ilivsi pisuutigirasi naakka pigiyumarasi.

⁴⁰ Niviŋaluqutauruat itqaqtinniaġaasi kamagitqulugich piraksriutipayaatka, suli iluġaaġlusi salumaniaqtusi Atanivsiññun.

⁴¹ Uvaŋa Atanġuruŋa God-igiraqsi; Egypt-miŋŋautiŋagivsi uvaŋa God-igitquvluŋa. Uvaŋa Atanġuruŋa God-igiraqsi.’”