Numbers 14 - Iñupiatun Mumiksat Uqalugiksuat

Iñuich Uqamayuktut

¹ Unnuaqtutilaatun iñuich qiaŋarut.

² Uqamayukłutiŋ akiḷḷiġivlugik Moses-lu Aaron-lu, uqaqłutiŋ, “Nakuułhaaŋanayaqtuq tuqullakkupta Egypt-mi naakkaunnii tamaani nunagluktuami!

³ Summan imña Atanġum aullativatigut marrumuŋa nunamun? Tuqutauniaqtugut aŋuyakkupta, nuliavut miqłiqtuvullu iñunnaktaaġiniaġaich. Nakuułhaaġniaŋitpaimña Egypt-mun utiġupta?”

⁴ Tavraasii avanmun uqaŋarut, “Aullarriksraġlutauvagut utiqta Egypt-mun!”

⁵ Tavraasii Moses-lu Aaron-lu punŋaruk nunamun sivuġaanni Israel-gum kiŋuvaaŋich.

⁶ Aasii Joshua iġñiŋa Nun suli Caleb iġñiŋa Jephunneh-m, iḷauruak nalunaqtuakun qimilġuyyaqtuatigun, aligaġniġaich annuġaatiŋ isumaaqpaił̣ł̣utiŋ

⁷ aasii uqaqłutiŋ iñugnun, “Nuna qimilġuyyaqtaqput nunagikpaktuq.

⁸ Kamagiguptigu Ataniq, aitchupiaġniaġaatigut nunamik maqiugaqtuaq immugniglu honey-ñiglu.

⁹ Paaqłagnasiuŋ Ataniq iqsiñasiunnii iñuuniaqtuanik taavani. Pisaġiniaġivut siġġaqigaluaġnata. Atanġum itqatigigaatigut suli akiisitaniŋagai god-tit munaqsriŋich; iqsiñasi.”

¹⁰ Iluqaġmiŋ iñuich uyaġagnik miḷḷuuqtuġlugik tuqutchumaalliġñiġaik, aglaan tavraŋŋatchiaq iñuich tautukkaat qivliġruaqtun qaumanġa Atanġum niptaqtuaq qulaanun Tupqum.

Moses Aŋaiyyutigai Iñuich

¹¹ Ataniq uqallaktuq Moses-mun, “Qanutun imña sivisutigiruami pisaaŋŋatikun aŋalanniaqpanŋa ukua iñuich? Ukpiġutiqaġugniaŋitpat uvamnun qanutun sivisutigiruami, savaŋagaluaqtilluŋa aliuġnaqtuanik akunġanni iñugiaktuanik?

¹² Iłuiḷḷiuġutiqpagmik qaipkaiñiaqtuŋa suksraunġiqsaġlugich, aglaan ilvich aapaġuqtinniaġikpiñ nunaqpauruamun aŋiłhaaqtuamun suli suaŋałhaaqtuamik Israel-gum kiŋuvaaŋiññiñ!”

¹³ Moses-gum aglaan uqallautigaa Ataniq, “Ukua iñuich Egypt-miñŋautiŋagitin suaŋŋatikkun. Tusaagumiŋ Egypt-miut qanuq ilviñ suksraunġiqapki iñuktin,

¹⁴ uqautiniaġaich iñuich maani iñuuniaqtuat. Makkua iñuich tusaaganiŋarut ilviñ, Ataniiq, itqatautilaaġnik uvaptinnun, tautupiallavlugu kiiñan nuviya nutqaġaġimman quliptinnun, aullatisuutilaaptinniglu nuviyakun takiłhuaŋaaqtuamik uvlumi suli ignikun takiłhuaŋaaqtuamik unnuaġmagu.

¹⁵ Tavra tuqutkaluaġupkich iluqaisa iñugiratin, nunaqpaich tusaaŋaruat kamanaqtilaaġnik uqaġniaqtut

¹⁶ tuqunniḷugich nunagluktuami tikiutianikkumiñaił̣ł̣ugich nunamun unniqsuqłiisigiŋaraġnun iliŋiññun.

¹⁷ Tavraasii, Ataniiq, Apiġigikpiñ, maniraġiuŋ suaŋŋatigiran aasii taŋŋiġḷugu unniqsuqłiisigiŋaran uqallakkavich,

¹⁸ ‘Uvaŋa, Atanġuruaŋa, qinnaliqsiġiitchuaguruŋa, suli maniuqtuaqługu piqpakkutiqpak suli ukpiġnaġniq suliqutigiŋaiġullu piḷuutinun, suli paaqłaktautiqaqtuanun. Tavraaglaan tatavsautiqaŋitchumiñaitchuŋa miqłiqtunun tutaaluuuruanullu piŋayuannun suli sisamaŋannun kiŋuniġiiguruat piḷuutigiraŋiññun aŋayuqaaġiraŋisa.’

¹⁹ Tavraasii Ataniiq, kamanaqtuaguniŋani allaŋŋuqtauraŋitchuam nakuaqqutikpich, suliqutigiŋaikkich, aŋaiyyuruŋa, piḷuutiŋich ukua iñuich, suliqutigiŋaiqsimaaġusiqsun aullaġataġmataqaŋa Egypt-miñ.”

²⁰ Atanġum kiugaa, “Suliqutigiŋaiġñiaġitka paaqłaktuat, apiqsriaġiraqtun.

²¹ Unniqsuqłiiruŋa aglaan nalupqinaił̣ł̣ugu iñuunipkun suli nalupqinaił̣ł̣ugu nayuqtauniġma immiqsimaaġmagu nuna,

²² nalliŋich unnii taapkua iñuich iñuuniaŋitchut isiġuminaġlutiŋ taamaptumuŋa nunamun. Qiñiŋagaluaqługu qaumaniŋa nayuqtauniġma aliuġnaqtuallu savaatka Egypt-mi suli nunagluktuami, aglaan uuktuġaat qiñuirrutiga qulitun suli kamagisuŋił̣ł̣uŋa.

²³ Isiġumiñaitkaat nuna unniqsuqłiisigiŋaraġa maŋŋuuġiraŋiññun. Nalliataunnii ayyaktuat uvamnik isiġumiñaitkaat.

²⁴ Caleb aglaan kivgaġa allauruamik irrusiqaqłuni iluġaaqłuni paaqłaktuaniñ maliġuaġaaŋa, nunamuutiniaġiga qimilġuyyaŋaraanun, suli kiŋuniiŋisa nunaginiaġaat

²⁵ natiġnaaŋiñi paŋmami iñuuniaġvigiraat Amalek-miullu Canaan-miullu. Utiġlusi uvlaaku aullaġumausi nunagluktuam tuŋaanun aullayaaŋagun Red Sea-m.”

Atanġum Tatavsaġaich Iñuich Uqamayuktuat

²⁶ Ataniq uqallaktuq Moses-mullu Aaron-mullu,

²⁷ “Qanutun imña sivisutigiruami ukua piḷuusiqirich iñuich uqamayugniaqpat akiḷḷiġiluŋa? Tusaġnaġisugruanikkitka uqamayuutiŋich!

²⁸ Inna kiusigik: ‘Unniqsuqłiiruŋaaglaan nalupqinaił̣ł̣ugu iñuunipkun, nalautitinniaġiga tusaġnaġikkaġaa ilivsiññiñ. Uvaŋa, Atanġuruaŋa, uqallaktuŋa.

²⁹ Tuquniaqtusi suli timisi siaminŋaniaqtut nunagluktuami. Uqamayuŋavlusikii akiḷḷiġivluŋa, nalliqsiunnii ukiuniŋaruat qaaŋiqł̣ugu iñuiññaq (20) isiġniaŋitchut taamaptumuŋa nunamun.

³⁰ Unniqsuqłiiŋagaluaqtuŋa iñuuniaġnivḷusi taavani, aglaan nalliqsiunnii piñiaŋitchuq, kisimik Caleb, iġñiŋa Jephunneh-m, Joshua-lu, iġñiŋa Nun-gum.

³¹ Miqłiqtusi tigutaaqtauniaġnigaluaqtasi, aglaan tikiutiniaġitka nunamun ayyaktavsiññun, aasii aimmiviginiaġaat.

³² Ilivsi tuquġaġniaqtusi maani nunagluktuami.

³³ Miqłiqtusi kukiḷuktuaġniaqtut nunagluktuami malġukipiani (40) ukiuni, nagliksaaġutigilugu ukpiġutairrutiksi, iluqaqpiuravsi tuquġaanigataqtillusi.

³⁴ Nagliksaaġutiginiaġisi piḷuusiqiasi malġukipiani (40) ukiuni, atausiq ukiuq sivuniqallaaluni uvlullaamun malġukipiaguruanun (40) uvlunun qimilġuyyaŋakavsiuŋ nuna. Nagliksaaġniaqtusi piḷuusiqiavsigun iḷitchuġiñiaqtusiḷu qanuq itilaaŋa uvamnik akilliqsruqtinikkuvsi.

³⁵ Nalunaiqł̣ugu uqallautigigiga tainna aŋalanniaqtilaavsiññik ilivsi piḷuusiqirauruasi atautchimunmukłusi akiḷḷiḷiutiruasii uvamnun. Maani nunagluktuami iluqaqpiuravsi tuquġaaniaqtusi. Uvaŋa, Atanġuruaŋa, uqallaktuŋa.’”

^36-37 Aŋutit Moses-gum tiliraŋich qimilġuyyaquvlugu nuna siamitchivḷutiŋ iłuaŋitchuamik kiliktuunmik uqamayuliqsinŋagaich iñuich akiḷḷiġivlugu Ataniq. Tavraasii Atanġum iłuiḷḷiuġutitigun siamitchiruat naŋiliqsinŋagaich, aasii tuquavlutiŋ.

³⁸ Qulit malġuuruaniñ nunamik qimilġuyyaŋaruaniñ Joshua-lu Caleb-lu kisimik kisiŋŋuqtauŋaruk.

Iñuich Aŋuyagiaġaat Nuna

³⁹ Moses-gum kiligmagi Israel-gum kiŋuvaaŋich qanuq Ataniq uqallaktilaaŋanik, ipiqtutchakhutiŋ qiaqpaŋarut.

⁴⁰ Uvlaatchaurami uvlaakumman aŋuyagiaqsaŋaniġaat qimiġaligaaq nuna, uqaqhutiŋ, “Tavra itqanaiġutirugut aullaġumiñaqsivḷuta inimun Atanġum quliaŋaraanun uvaptinnun. Quliaqtugut piḷuusiqiŋatilaaptinnik.”

⁴¹ Moses aglaan uqallaktuq, “Uvvami summan kamakkutaitpisisuli Ataniġmun? Akimaniaŋitchusi!

⁴² Tatpauŋaġnasi. Atanġum itqatigiŋitkaasi, akiḷḷiivsi akiisinniaġaasi.

⁴³ Saatkuvsigik Amalek-miut Canaan-miullu, tuqutauniaqtusi aŋuyaktuani; Atanġum itqatiginiaŋitkaasi, qanukkii maliġisuŋisaniŋagiksi.”

⁴⁴ Naaggasuliuvva tatpauŋa qimiġaligaamun nunamuksaaŋarut, Atanġum Sivunniuġutikun Kiguunniŋa naaggaunnii ilaa Moses aullaŋitkaluaqtillugik.

⁴⁵ Tavraasii Amalek-miut Canaan-miullu taavaniittuat aŋuyagniġaich aasii akiisiłługich, maliqataqługich Hormah-muaglaan.