Numbers 13 - Iñupiatun Mumiksat Uqalugiksuat

Nalunaqtuakun Sumik Qimilġuuqtit

¹ Ataniq uqallaktuq Moses-mun,

² “Naliġaglutin atausiḷḷaamik qulit malġuuruaniñ (12) aullarriñiñ maŋŋuqatigiiguruaniñ aasii nalunaqtuakun qimilġutqulugu nunaŋa Canaan, qaisaġiraġa Israel-gum kiŋuvaaŋiññun.”

^3-15 Moses kamaksrivḷuni aullaqtitchiŋaruq nunagluktuaŋanun Paran aullarrinik, ukuniŋa: Maŋŋuuruat Aullarriuruat Reuben Shammua iġñiŋa Zaccur-m Simeon Shaphat iġñiŋa Hori-m Judah Caleb iġñiŋa Jephunneh-m Issachar Igal iġñiŋa Joseph-gum Ephraim Hoshea iġñiŋa Nun-gum Benjamin Palti iġñiŋa Raphu-m Zebulun Gaddiel iġñiŋa Sodi-m Mannaseh Gaddi iġñiŋa Susi-m Dan Ammiel iġñiŋa Gemalli-m Asher Sethur iġñiŋa Michael-gum Naphtali Nahbi iġñiŋa Vophsi-m Gad Geuel iġñiŋa Machi-m

Maŋŋuuruat Aullarriuruat

¹⁶ Tavra taapkua nalunaqtuakun iḷitchuġiñiaqtit Moses aullaqtinŋaraŋich qimilġuquvlugu nuna. Moses-gum atchitqiŋaraŋa Hoshea iġñiŋa Nun-gum Joshua-mik.

¹⁷ Moses-gum aullaqtinnamigich, uqautiŋagaich, “Maaŋŋa salliñaaŋanuglusi kiluliñaaŋanun nunaŋata Canaan aasii qimiġaligaamuglusi.

¹⁸ Nuna qanusiutilaaġlugu, qanutun iñuich iñugiaktilaaŋat iñuuniaqtuat taavani, qanutullu suaŋatilaaŋat.

¹⁹ Nuna nakuummagaaġlugu naakka nunagiiñmagaan suli iñuich iñuutilaaŋiññik agmavlugich nunaaqqitiŋ naakka payaŋaiyaŋaruani iniqpagni.

²⁰ Nuna naurisuġmagaaġlugu suli napaaqtuqaġmagaan. Piiguġnasi qaġġirriyumausi taavaŋŋa siiġñanik nauruanik.” (Ukiuq nalautinŋavluni auviksraŋat grape-gich.)

²¹ Tavra aŋutit aullaŋarut sallinmun qimilġuŋagaat nuna nunagluktuaŋaniñ Zin kiluaniittuaq tikiḷġataqługu Rehob, qaniŋaniittuaq Hamath Pass-gum salliani.

²² Kiluliñaam tuŋaaniittuamuqqaaŋarut nunamun aasii Hebron-mukłutiŋ, iḷagiich Ahiman-kut, Sheshai-ḷu, suli Talmai, kiŋuniiġiraŋich iñukpasuich taggisiqaqtuat Anakim-nik, iñuuniaġviat. (Hebron una inillaŋaniġaat tallimat malġugni ukiuni sivuani Zoan-gum Egypt-mi.)

²³ Eshcol Valley-muŋarut, aasii amusivḷutiŋ qisiqsiutaanik grape-gum atautchiiguruat uqumaitpaił̣ł̣utiŋ malġuk iññuk akigaġniġaak qirugmik akigausiqhutik. Utqurrivḷutiglu pomegrantes-nik figs-niglu.

²⁴ (Ini taamna atchiŋaniġaat Eshcol Valley-mik pisigivlugich grapes-gich atautchimi nauruanik Israel-gum kiŋuvaaŋich kipisivigiŋaraat.)

²⁵ Qimilġuanigataqamirruŋ nuna malġukipiani (40) uvluni, nalunaqtuakun qimilġuuġiaqtuat utiŋaniqsut

²⁶ Moses-mun, Aaron-mun, suli iluqaiññun Israel-gum kiŋuvaaŋiññun Kadesh-mi nunagluktuaŋani Paran. Quliaqtuaqtut tautuktamignik suli qiñiqtiłługich siiġñat qaġġirratiŋ.

²⁷ Uqautigaat Moses, “Qimilġuŋagikput nuna aasii tautukługu maqiugaqtuaq immugniglu honey-ñiglu; marra aasii siiġñaŋisa iḷaŋich.

²⁸ Iñuich aglaan taavani iñuuniaqtuat saŋŋirut, iniqpaŋich aŋimmiut suli payaŋaiyaŋavlutiŋ. Aasiisuli, tautugmigivut kiŋuniiŋich Anak-gum iñukpasuich taavani.

²⁹ Amalek-miut iñuuniaŋarut kiluliñaaŋani nunam; Hit-miut, Jebus-miut, suli Amor-miut iñuuniaġniqsut qimiġaligaami nunami; Canaan-miulli aasii iñuuniaqhutiŋ qaniŋani Mediterranean Sea-m suli siñaani Jordan River-m.”

³⁰ Caleb-gum nipaiqsinŋagaich iñuich sivuani Moses, uqallakłuni, “Aullaġluta pisaġisaqtuaġlavut aasii piññaktaaġilugu nuna; suaŋŋatiqaqtugut pisaġiyumiñaġlugich.”

³¹ Aŋutit aglaan aullaqatigiŋaraŋich Caleb-gum uqallaktut, “Naumi, suaŋŋatiqapiaŋitchugut aŋuyagumiñaġlugich; iñuich taavani saŋŋił̣haaqtut uvaptinniñ.”

³² Tavra siamitchiŋarut iłuaŋitchuamik Israel-gum kiŋuvaaŋiññun nunakun qimilġuyyaqtamiktigun. Uqaqłutiŋ, “Taavamna nuna qimilġuyyaqtaqput suksraunġiġuugai iñuuniaqtuat tavrani. Tautupayauraqtavut takiqpaŋarut,

³³ tautugmiugut-suli iñukpasugnik taavani, kiŋuniiŋiñik Anak-gum. Ilauvagut grasshoppers-guruat, tainnaptauq iłłuta qiñiqpalliŋagaatigut.”