Numbers 12 - Iñupiatun Mumiksat Uqalugiksuat

Miriam Tatavsaqtaumman

¹ Moses nuliaŋaruq Cush-miuguruamik aġnamik, aasii Miriam-guvlu Aaron-guvlu uqamayuutiŋaniġaak.

² Uqaqhutiŋ, “Ataniq imña uqaġuuva Moses-kuaqłuni kisian? Uqaŋaiñmivaptauq uvaptiguaqłuni?” Atanġum tusaaŋaniġaich qanuq uqaqtilaaŋigñik.

³ (Moses una piuniaŋitchuaguŋaruq iñuk, piuniaŋitchuaguniqtauvluni iñugniñ nunami.)

⁴ Tavraŋŋatchiaq Ataniq nivliŋaruq Moses-mun, Aaron-mullu, suli Miriam-mun, “Piŋasuuruasii, Tupiġmugitchi nayuqtauvimñun.” Tavruŋaŋarut,

⁵ tavra Ataniq atqaŋaruq nuviyakun, qikaqhuni paaŋani Tupqum, ququulaniġaik, “Aaron! Miriam!” Iluqatik sivuġaanuktaaġniqsuk,

⁶ aasii Ataniq uqallaktuq, “Tusaasitchik uqalumnik! God-mun uqaqtiqaġman akunnavsiññi, Satqummiġaqtuŋa iliŋiññun qiñiqtuuraatigun suli uqautivlugich siññaktutigun.

⁷ Allauruq uqaqatigikapku kivgaġa Moses; Inillaktaġiŋagiga aullarriġuqługu iñugiramnun Israel-mun.

⁸ Tavraasii uqaqatigiraġigiga tavruŋa kiiñaŋanun, nalunaił̣ł̣ugich, kaŋiqsitchiġiiñŋitchuatigun; tautuŋagaa unnii irrusiġa! Qanuq ilivsik uqaqsaayumiñaqpisik akiḷḷiġivlugu kivgaġa Moses?”

⁹ Atanġum qinnautiŋagaik; aasii unił̣ł̣ugik

¹⁰ aasii nuviya piiŋaruq Tupiġmiñ, Miriam timaa tavrauvvaa matuŋaruq mamilaitchuamik naŋirrunmik aasii qatiqsivḷuni aputitun. Aaron-gum qiviaqamiuŋ matuŋatilaaŋanik kiḷḷiġruanik,

¹¹ uqallaktuq Moses-mun, “Apiġigiptigiñ, aŋuun, nagliksaaqtinnasiguk uumiŋa tatavsaunmik isumalluaġiirrutiptigullu piḷuusiqiniptigullu.

¹² Irrusiñiktinnagu Miriam aniŋaruatun tuquŋavluni, niqaata avvaŋa niġirauŋavlugu.”

¹³ Tavra Moses kappiatuŋaruq Ataniġmun, “God, mamitillagniaġuŋ!”

¹⁴ Atanġum kiugaa, “Aapaŋata tivvuaŋakpagu kiiñaŋagun, igḷutuŋaniġaa kanŋunaqsiḷiqtaunini tallimat malġugni (7) uvluni. Anitaullakkumauq nullaummivivsiññiñ savaiññiġmi, taamna pianikpan isitqikkumiñaqtuq.”

¹⁵ Miriam tavra anitauŋaruq nullaummivianniñ tallimat malġugni (7) uvluni, aasii iñuich aullaŋaiññiqsut itqutitqigataqtillugu.

¹⁶ Tavraasii aullaŋarut Hazeroth-miñ aasii nullalgił̣ł̣utiŋ nunagluktuaŋanun Paran.