Numbers 11 - Iñupiatun Mumiksat Uqalugiksuat

Ini Atiqaqtuaq Taberah-mik

¹ Iñuich uqamayunagutimmata Ataniq iviġaŋaiñŋaruq, tusaagamigich qinnaliŋaruq aasii igniġmik ikuallaivḷuni akunġanni aasii tuqułługich iñuich nullaġviallu suksraunġiqł̣ugu isukłiuruat.

² Iñuich aasii kappiattualaŋarut Moses-mun ikayuquvlutiŋ; aŋaiyyuvluniasii Ataniġmun, tavra ikualaruaq qamiŋaruq.

³ Tainnamik taamna ini atchiŋagaa Taberah-mik, tavrani igniq Ataniġmiñ ikualaŋavluni akunġanni.

Moses Naliġagman Piŋasukipiaq Qulinik (70) Aullarriksranik

⁴ Allaniŋŋaqtauruat iñuich iglauqatauŋarut Israel-gum kiŋuvaaŋiññun. Niqipiaqtuġulipiallagniqsut, Israel-gum kiŋuvaaŋich unnii iliŋich uqaavsiḷiŋarut: “Niqipiaqtuġlutaluqaimña!

⁵ Egypt-miinŋaptaimña iḷaŋaniñ iqaluktuqtuaġuusugaugut, akiiḷaaqługich. Immasuli cucumber-t, watermelon-gich, leek-gich, aiñat, garlic-giḷḷu niqigisuusugaavut!

⁶ Aasiuvva sayaiqsugut. Niqiksraitchugut tamarra tamanna maana kisimi uvlutuaġaġimman!”

⁷ (Maana nautchiaksratun ittuaq, qatiaġayakhuni quqsuqtaaq qiññaŋa.

^8-9 Unnuami kataŋaraqtuq nullaummiviannun uġġuqsraaġman. Uvlaaġmagu katittaġigaat, kanuqqivḷugu naakka kaukługu palauvaliuqługu, aasii qalatiłługu suli igavlugu muqpauratun. Tipiqaġuuruq punniqtun olive uqsruanik uqsruligaatun.)

¹⁰ Moses-gum tusaaŋagaich iñuich uqaviḷuktuat qikaġaallaġmiŋ paaŋiññi tupiġmiŋ. Moses iłuiḷḷiuliŋaruq, qanukkii Atanġum iviġaŋił̣ł̣uni qinnautiŋagaich,

¹¹ aasii uqallautiŋagaa Ataniq, “Summan uvva tainna aŋalamaqłukpiŋa? Summan iviġaumaigiŋaiqpiŋa? Summan qaunaksriliutiŋaviŋa ukunuŋa iluqaiññun iñugnun?

¹² Miqłiqtuġiŋitkitka! Summan qaunaksrauratun saġliaquvigich tikiutilġataġlugich nunamun unniqsuqłiisigiŋaraġnun kiŋuniiŋiññun?

¹³ Sumiñ imña niqipiaksraġniaqpik naamaruamik ukunuŋa iñugnun? Qirruktut qanuq uvva uvamnun uqaqhutiŋ, ‘Niqipiaksritchigut, niġiyumaugut.’

¹⁴ Qaunagianikkumiñaitkitka kisima.

¹⁵ Tainna aŋalanniaqsimagumŋa, nagligiluŋa tuqunŋa, igḷutuŋaiqsaġiga aŋalamaqłuutin.”

¹⁶ Tavra Ataniq uqallaktuq Moses-mun, “Katitchiiñ piŋasukipiaq qulinik (70) utuqqanaaguruanik iḷisimaraġnik ataniġnaqutiqaqtuanik; Tupiġmuutilugich nayuqtauvimñun, tavrani makitaqatigiyumagaatin.

¹⁷ Atqaġluŋa uqaqatiginiaġivsi tavrani; aasii iḷitqutchimiñ iliŋnun qaiñŋaramniñ siamitchiñiaġmiuŋa iliŋiññun; taapkua ikayuġniaġaatin, aasii kisiviñ savaaġiniaŋitkiñ.

¹⁸ Aasii uqallautilugich iñuich, ‘Salummaġumausi ilivsiññun itqanaiyautigilugu uvluq uvlaaku; niġiñiaqtusi niqipiamik. Atanġum tusaaŋagaasi uqaviḷuktuasi niqipiaqtuġugnivḷusi suli uqaqavsi nakuułhaaqtuamiinŋagaluaġnivḷusi Egypt-miinnavsi. Tavraasii Atanġum niqipiaksriññiaġaasi, aasii niġiruksraġiniaġiksi.

¹⁹ Niġiruksraġiniaŋitkiksi atausił̣hiñami naakka malġułhiñagni uvlugni, naakka tallimałhiñani naakka quliłhiñani, naakkaunnii iñuiññałhiñani (20) uvluni,

²⁰ aglaan naalġataġlugu tatqiq, niġisunġiġataqtillugu. Tainnaġniaqtusi ayyaŋavlugu Ataniq nayuutiruaq akunnavsiññi suli uqaviḷukłusi ilaanun summan aullaŋatilaavsiññik Egypt-miñ.’”

²¹ Moses uqallaktuq Ataniġmun, “Uvvauvaŋa aullarriruŋa 600,000-tun iñugiaktigiruanik iñugnik, aasiuvva niqiksriññiaġnigitin naamasiḷugu tatqimi?

²² Pamiqsaaniglu imnaiñiglu tuqutchianikkumiñaqpat katchuqsaġlugich? Iqalupayaurat taġiumi naamaniaqpat iliŋiññun?”

²³ “Killiksraqaqpaimña suaŋŋatiga?” Atanġum kiugaa. “Uvva iḷitchuġiyasirutin uqallautigiraġa nalautinniaġmagaan naakka nalautinniaŋiñmagaan!”

²⁴ Tavra Moses-gum uqallautiyyaŋagaich iñuich Atanġum uqallautaanik. Qaipkaiŋaruq piŋasukipiaq qulinik (70) aullarriuruanik aasii inillaktiłługich kiavaluisaaqługu Tupiq.

²⁵ Tavraasii Ataniq atqaŋaruq nuviyakun uqautiaqsivḷugu aasii. Iḷitqutchimiñ qaiñŋaramiñun Moses-mun qaitchiŋagaich piŋasukipiaq quliuruat (70) aullarrich. Iḷitqutchim turvigimmatiŋ, nipatuvlutiŋ uqaŋaniqsut God-mun uqaqtauruatitun, aglaan sivikitchuami.

²⁶ Piŋasukipiaq quliuruat (70) iḷaŋik, Eldad-lu Medad-lu, nullaummivigmiŋniinŋaruk Tupiġ-mukkaluaġnatik. Tavraniitillugik iḷitqutchim turvigiŋamammigaik, aasii tainnaptauq nipatuvlutik uqanagutiŋammiñiqsuk uqaqtauruatitun God-mun.

²⁷ Nukatpiam aqpamik kiligiaŋagaa Moses qanuq Eldad-lu Medad-lu pitilaaŋagnik.

²⁸ Tavra Joshua iġñiŋa Nun-gum, ikayuqtigiraŋa Moses-gum nutaġaurauniŋaniñ-qaŋa, nivliŋaruq inna Moses-mun, “Moses, umialiiŋ, aġiutqukkik!”

²⁹ Moses-gum kiugaa, “Isumaaluutiqaqpich imña kipiġniuttaġiramnik? Atanġumtuq iḷitqusiñi qaiḷḷiuŋ iñugirapayaaġmiñun aasii uqaqtillugich nipatutilaamiktun God-im uqaqtiŋisitun!”

³⁰ Moses-lu piŋasukipiaq quliuruallu (70) aullarrauruat Israel-mi utiġniqsut nullaummivigmignun.

Ataniq Qaipkaimman Quail-nik

³¹ Atanġum anuqłiġuqtiłługu qaipkaŋagaich quail-gich taġiumiñ. Siaminŋagaich qalliġiiksiłługich piŋasutun isigagniqtun avataanun nullaġviata, uŋasiksilġataqługich uvluq naalġataqługu pisuaġniqtun.

³² Tavraasii uvluqtutilaatun, unnuaqtutilaatun, uvlaakummallu, aŋuniaŋarut quail-nik; kiñaunnii katitchiŋiñŋaitchuq inuġlugu malġukipiaq qulit (50) bushels. Siaminŋagaich sumulliqaa paniqsirriutivlugich iluqaani nullaummivigmigni.

³³ Niġianiŋaisillugich, Atanġum qinnautiniġaich iñuich aasii naŋirrutiqpak iliŋiññun tuttiłługu.

³⁴ Taamna ini atchiŋagaat Kibroth Hattaavah-mik (uumiŋa sivuniqaqtuaq “Iḷuviŋich Iipaktit”), iḷuviŋavlugich iñuich niqipiaqtuġuumaŋaruat tavrani.

³⁵ Tavraŋŋa iñuich aullaŋarut Kibroth Hattaavah-miñ Hazeroth-mun aasii tavruŋa inillakłutiŋ.