Numbers 10 - Iñupiatun Mumiksat Uqalugiksuat

Qatiqtuamik Manigmik Savaat Nipauqłuktautit

¹ Atanġum uqallautigaa Moses,

² “Malġugnik nipauqłuktausiuqsaqtutin qatiqtuamik manigmik kauktamik nipauqłuktallaayumautin iñuich katitqugupkich aullaġnaqsikpallu.

³ Nivliqpagnik nipauqłuktautik atautchikun, iluqaġmiŋ iñuich ilignukkisirut paaŋanun Tupqum nayuqtauvigma.

⁴ Atausił̣hiñaq aglaan nipauqłuktaqpan, aullarriuruat kisimiŋ iḷagiiguruani ullagniaġaatin.

⁵ Nipauqłuktaqpan nipaturuamik, nullaummiruat qavanitchiġmi kiŋuniġiiksuat aullaġniaqtut.

⁶ Nipauqłuktavsaaqpan nipaturuamik, kiŋuniġiiguruat kiluani nullaummiruat aullaqiniaqtulli. Tavra nipaturuanik nipauqłuktaġaġikpata aullallaaniaqtut,

⁷ iñuich aglaan iluqaisa ququaqsaqpatigik, nipauqłuktaġniaqtut allaullugu.

⁸ Nipauqłuktaqtauniaqtut iġñiŋich Aaron, aŋaiyyuliqsiqpauruat. “Taamna maliġiraksriaq nalauttaksraġiniaġaat taimuŋaaglaan.

⁹ Aŋuyakkuvsi nunavsiññi, akiḷḷiġilugich aŋuyaktuat ilivsiññik, aŋuyaktuani kiliktuunmik nipauqłuktaġniaqtusi. Tavraasii tusaaniaġaasi Atanġum God-ivsi aasii annautilusi akiḷḷiivsigñiñ.

¹⁰ Quviasuutikun katitkuvsi—niqinaqiguvsi, Tatqiḷitqigñikun niqinaqiguvsi, allallu ukpiġutikun niqinaqutit—nipauqłuktaqtuksraurusi aitchuiguvsi ikipkautinik suli iḷammiuġutikun aitchuutauruanik. Tavra ikayuġniaġivsi. Atanġuruŋa God-igiraqsi.”

Israel-gum Kiŋuvaaŋich Itqanaiyaġmata Aullaqsaqłutiŋ

¹¹ Ukiutqiutaanni aullaġviŋata Egypt-miñ iñuiññaŋanni (20th) uvlut tatqich tuglianni, nuviya qulaaniittuaq Tupqum Atanġum nayuqtauviata qaŋattaŋaniqsuq,

¹² Israel-gum kiŋuvaaŋich aullaqiŋarut Sinai Desert-miñ. Nuviya nutqaġniqsuq Paran Desert-mi.

¹³ Aullaqiqqaaŋarut tavrani, Atanġum piraksriutaagun Moses-kuaqługu,

¹⁴ aullaqituaġaġikamiŋ, aquliġaġiigñiŋat allaŋŋulaiññiqsuq. Aullaqiqqaaqtuat takuyaligaat maŋŋuqaqtuagurut Judah-mik. Nahshon, iġñiŋa Amminadab-gum aullarrigiŋagaat.

¹⁵ Nethanel iġñiŋa Zuar-m qaukłiuŋaruġli maŋŋuqaqtuanun Issachar-mik,

¹⁶ Eliab-li iġñiŋa Helon qaukłiuŋaruq maŋŋuqaqtuanun Zebulun-mik.

¹⁷ Tavraasii Tupqiyaanigmata, iḷagiraŋich Gershon-guvlu Merari-vḷu, akigaqtauruat, aullaqiraqtut.

¹⁸ Taamna aasii pianiŋman, taapkuali takuyyiraqtiŋich maŋŋuqaqłutiŋ Reuben-mik aullaqiraqtut, qavsiullaavlutiŋ, Elizur iġñiŋa Shedeur-m qaukłiuvlugu.

¹⁹ Shelumiel-li iġñiŋa Zurishaddai-m qaukłiuruaq maŋŋuqaqtuanun Simeon-mik,

²⁰ aasiiḷi Eliasaph iġñiŋa Deuel-gum qaukłiuvluni maŋŋuqaqtuanun Gad-mik.

²¹ Tavraliasii Levi-m kiŋuvaaŋich iḷagiraŋich Kohath-gum aullaqiraqtut, tigumiaqługich salumaruaguruat suġauttat. Tikiḷġataġmataasii nullaummivigmun, Tupiq nappaaniŋasuugaat.

²² Taamna pianigman, takuyyiraqtigiraŋiḷḷi aullarriqaqłutiŋ maŋŋuqaqtuanun Ephraim-mik aullaġaqtut, qavsiullaavlutiŋ, Elishama iġñiŋa Ammihud qaukłiuvlugu.

²³ Gamaliel iġñiŋa Pedahzur-m qaukłiuŋaruq maŋŋuqaqtuanun Manasseh-mik,

²⁴ Abidan iġñiŋa Gideoni-m qaukłiuŋaruq maŋŋuqtuanun Benjamin-mik.

²⁵ Aqulliuvlutiŋ, takuyyiraqtualli maŋŋuqaqłutiŋ Dan-mik, aquliraqtauvlutiŋ iluqaiññun qavsiullaaruanun, aullaqiraqtut, qavsiullaavlutiŋ, qaukłiġivlugu Ahiezer iġñiŋa Ammishaddai-m.

²⁶ Pagiel iġñiŋa Ochran-gum qaukłiuŋaruq maŋŋuqaqtuanun Asher-mik,

²⁷ Ahira iġñiŋa Enan qaukłiuŋaruq maŋŋuqaqtuanun Naphtali-mik.

²⁸ Taamna, aasii tavra, irrusiġiŋagaat aquliġaġiikł̣utiŋ pisuaqtuat, qavsiullaavlutiŋ, Israel-gum kiŋuvaaŋich, aullaġaġimmatalu nuullaammatalu.

²⁹ Moses uqallautigaa tuvaaqanmi aniqataa Hobab iġñiŋa Jethro-m Midian-miuguruaq, “Aullaaqsirugut inimun Atanġum qaiññiaġniŋaraanun uvaptinnun. Unniqsuqłiiŋaruq Israel piḷḷuataqtuaġuġniaġnivḷugu, ki aullaqasiqsigut, piqaqtinniaġiptigiñ suġaliññaktaaptinniñ.”

³⁰ Hobab-gum kiugaa, “Naumi, utiġniaqtuŋa nunamnun iḷamnullu.”

³¹ “Uniññasigut,” Moses uqallaktuq. “Iḷisimarutin suqpanun nullallaaruksrautilaaptinnik nunagluktuami, aasii aullarrigiyumagiptigiñ.

³² Aullaqasiġuptigut, piqaqtinniaġiptigiñ aitchuusiaptigniñ Ataniġmiñ.”

Aullaqirut Iñuich

³³ Aullaqikamiŋ iñuich Atanġum iġġianiñ, iglauŋarut piŋasuni uvluni. Atanġum Sivunniuġutim Kiguunniŋa sivuanni aullaqiŋaruq nullaġviksraŋannik paqirrutisaqługich.

³⁴ Aullaqiraġimmata nullaummivigmigniñ, nuviyaŋa Atanġum qulaanniittaqtuq uvlumi.

³⁵ Sivunniuġutim Kiguunniŋa aullaqiraġimman, Moses uqallagaqtuq, “Makillutin, Ataniiq; siammayaaqtitkich akiḷḷiitin qimaaratchiḷugich!”

³⁶ Nutqaġaġimman aasii, uqallagmivḷuni, “Utiġiñ, Ataniiq, 1,000 sipiłługich iñugiaktigiruanun qitunġaġiiguruanun Israel-gum kiŋuvaaŋiññun.”