Numbers 1 - Iñupiatun Mumiksat Uqalugiksuat

Kisitchaqqaaġmatigiŋ Israel-gum Kiŋuvaaŋich

¹ Sivulliġmi uvluani tugliuruam tatqim ukiutqiutaanni iñuŋich Israel aullaġmata Egypt-miñ, Atanġum uqautigaa Moses nayuqtauvigmiñi Tupiġmi Sinai Desert-mi. Uqallaktuq,

² “Aaron-lu kisitchaġisik Israel-gum kiŋuvaaŋich iḷagiiktuatigullu qitunġaġiiksuatigullu. Agliutilugich atiŋich aŋutipayaurat

³ iñuiññamiñ aglaan (20) ukiuqaqtuat aŋuyaktauyumiñaqtuat inillagviŋisigullaa.

⁴ Ikayuqtiksrallaalusi iḷagiiguruat qaukłiŋiññik maŋŋuuqatigiiksuaniñ.

^5-15 Ukua aŋutit ikayuġniaġaatin: Maŋŋuuruat Iḷagiiksuat qaukłiat Reuben Elizur iġñiŋa Shedeur-m Simeon Shelumiel iġñiŋa Zurishaddai-m Judah Nahshon iġñiŋa Amminadab-gum Issachar Nethanel iġñiŋa Zuar-m Zebulun Eliab iġñiŋa Helon-gum Ephraim iġñiŋa Joseph-gum Elishama iġñiŋa Ammihud-gum Manasseh iġñiŋa Joseph-gum Gamaliel iġñiŋa Pedahzur-m Benjamin Abidan iġñiŋa Gideoni-m Dan Ahiezer iġñiŋa Ammishaddai-m Asher Pagiel iġñiŋa Ochran-gum Gad Eliasaph iġñiŋa Deuel-gum Naphtali Ahira iġñiŋa Enan-gum

Maŋŋuuruat Iḷagiiksuat qaukłiat

¹⁶ Tavra taapkua aŋutit tilirauruat nunaaqqimiñ, aullarrauruat maŋŋuqatigiiñiñ, qaukłiuruat Israel-gum kiŋuvaaŋiññun.”

¹⁷ Ikayuqtigivlugich taapkua qulit malġuuruat (12) aŋutit Moses-lu Aaron-guvlu

¹⁸ ququaŋagaich nunaaqqimiŋ iñuŋich sivulliġmi uvlumi tuglianni tatqich aasii agliutivlugich iluqaisa iñuich iḷagiiksuatigun suli qitunġaġiiksuatigun. Atiŋich iluqaisa aŋutit iñuiññamiñ aglaan (20) ukiuqaqtuat agliutiŋaniġaich suli kisirrutivlugich,

¹⁹ Atanġum piraksriutaatun. Sinai Desert-mi, Moses-gum agliutiŋagai iñuich.

^20-46 Aŋutit iñuiññaqtun (20) ukiuqaqtuaniñaglaan aŋuyaktauyumiñaqtuat agliutiŋaniġaich atiŋisigun iḷagiiḷḷaaruat suli qitunġaġiiksuatigun, isagutisaaqługich Jacob-gum aŋayukłiŋaniñ Reuben-miñ. Ukua uvva katiłługich iñugiaktilaaġigaich: Maŋŋuuruat Iñugiaktilaaŋat Reuben 46,500 Simeon 59,300 Gad 45,650 Judah 74,600 Issachar 54,400 Zebulun 57,400 Ephraim iġñiŋa Joseph-gum 40,500 Manasseh iġñiŋa Joseph-gum 32,200 Benjamin 35,400 Dan 62,700 Asher 41,500 Naphtali 53,400 Katiłługich: 603,550-iurut

Maŋŋuuruat Iñugiaktilaaŋat

⁴⁷ Levi-m kiŋuvaaŋich agliurrauŋaitchut allatigun maŋŋuqatigiiksuatigun,

⁴⁸ Ataniq uqallaŋavluni Moses-mun,

⁴⁹ “Kisitchiguvich aŋutinik aŋuyaktaullaruanik, iḷaginagich maŋŋuqaqtuat Levi-mik.

⁵⁰ Aglaan, Levi-m kiŋuvaaŋich qaunaksriḷiutiyumagitin Tupiġmun nayuqtauvimñun suli iluqaiññun suġauttaŋiññun. Tigumiaġniaġaat suġautaŋiḷḷu, qaunagilugu, suli nullaġvigillaalugu avataani.

⁵¹ Aullaġaġiguvsi nullaummivivsiññiñ, Levi-m kiŋuvaaŋich tupqiyallaaniaqtut aasii nappaġmiḷugu nullatqigviannun. Kiña alla iñuk qaninŋautiruaq Tupiġmun tuqutauniaqtuq.

⁵² Israel-gum kiŋuvaaŋich nappaiñiaqtut inimignik, qavsiullaalutiŋ, iñullaa nanmiñiq piqatigiramiñun suli takuyallaamiŋnun.

⁵³ Aglaan Levi-m kiŋuvaaŋich nullaġniaqtut avataanun Tupqum munaqsrausaġlutiŋ, kia-unnii qaninŋaŋitchumagaa Tupiq qanukkii qaninŋaqpata qinnautiniaġitka Israel-gum kiŋuvaaŋich.”

⁵⁴ Tavraasii Israel-gum kiŋuvaaŋich savaŋaniqsut supayaamik Atanġum piraksriutaanik Moses-mun.