Matthew 9 - Iñupiatun Mumiksat Uqalugiksuat

Jesus Iłuaqsigaa Aulalaitchuaq Iñuk

¹ Tavra Jesus ikivluni umiaqpauramun ikaaŋarut, aasii tikił̣ł̣utiŋ ilaan iñuuvianun iniqpaŋmun.

² Tavra, qaġġirriŋarut ilaanun aulalaitchuamik, nalavlugu ikuvġamiñi. Tavra Jesus puttuqsrikamiuŋ ukpiġutaat uqallaŋaruq aulalaitchuamun, Quviasugiñ, iġñiiŋ. Piḷuutitin suliqutigiŋaiqsaurut itqaumayumiñaiqł̣ugich.

³ Tavra iḷaŋich iḷisaurrit pitquranik uqaŋarut inmiŋnun, Una iñuk uqaqtuq iḷiuqłuni God-itun.

⁴ Tavra Jesus iḷisimavlugich isumaŋich uqallaŋaruq, Summan pigiitchuanik isumavisi?

⁵ Nalliak uvva siġḷiġnaił̣haaqpa uqallaktuni inna, Piḷuutitin suliqutigiŋaiqsaurut, naagga uqallaktuni, Makillutin pisuaġiñ?

⁶ Ukpiġnaqsiḷiġniaġiga ilivsiññun Iġñiŋa Iñuum ataniġnaqutiqaqtilaaŋanik nunami suliqutigiŋaiġumiñaqługich itqaumayumiñaiġḷugich piḷuutit. Ilaa tavrani uqallaŋaruq aulalaitchuamun, Makillutin pisuaġiñ. Tigulugich ikuvġatin aggiiñ.

⁷ Tavra makiłłuni aiŋaruq.

⁸ Iñusalaich tautukamirruŋ, kamatchaŋarut, aasii nanġaŋagaat God suaŋŋatiqaqtitchiḷḷaruaq tainnatchimik iñuŋnun.

Jesus Ququaġaa Matthew

⁹ Tavra Jesus aullaqłuni tavraŋŋa, tautuŋagaa iñuk atiqaqtuaq Matthew-mik aquppiruaq tax-iḷiqiviŋmi, aasii uqallautiŋagaa, Maliŋŋa. Tavra makiłłuni maliŋagaa.

¹⁰ Qakugulimman, Jesus niġiyaqtuŋaruq Matthew-m igluanun. Tavrani iñugiaktuat tax-iñik katitchirit piḷuusiqirillu qaivḷutiŋ niġiñiaqasiŋagaat Jesus iḷitchitquraŋiḷu.

¹¹ Tavra Pharisees iḷitchuġikamirruŋ taamna, uqallautiŋagaich iḷitchitquraŋi, Summan iḷisaurriksi niġiqatiqaġuuva tax-nik katitchirinik piḷuusiqiriniglu?

¹² Tavra tusaakamiuŋ taamna, Jesus uqallaŋaruq, Tamatkua surruitchuat taaktituaksraitchut, aglaan tamatkua naŋittuat.

¹³ Aullaġlusi iḷitchaqtuqsiuŋ una sumik sivuniqaġmagaan, “Kipiġniuġutigigiga nagliktautquvlusi, ikipkautiłhiñaŋiḷaanik aitchuutinik.” Qaiŋaitchuŋa ququaġiaġlugich nalaunŋaruat aglaan isumalitqiquvlugich piḷuusiqirit.

Apiqqun Niġiḷaiḷaġnikun Aŋaiyyuuqłuni

¹⁴ Tavra iḷitchitquraŋi John qaiŋarut Jesus-mun, uqaqłutiŋ, Suvlutauvagut Pharisees-lu aŋaiyyuuqapta niġiḷaitchuuvisa, iḷitchitquratin tainna piḷaisillugich?

¹⁵ Tavra Jesus uqallautiŋagai, Iḷisimarusi katirrusiqiruanun tuyuġmiaqtauruat ipiqtusugniaŋitchut nayuqtigiŋŋaan uiksraun. Aglaan uiksrautim aullaurrauviksraŋa tikitchumaaqtuq, aasii taimanigu niġiḷaitpaallugniaqtut.

¹⁶ Suli kiñapayaaq iḷaaqtuutiqalaitchuq iḷiġniġmik ugliŋaitchuamik ukił̣haamik annuġaaluŋmun, qanuq iḷaaqtuutauruaq algutiniaqtuq annuġaamiñ, aasii allaq aglił̣haaġluni.

¹⁷ Naaggaunnii nutauruaq wine puuġnaitchuq puuġruanun. Puuġaluaqpan wine puuġruamik puvlagluni qaaġniaqtuq, aasii wine kuviḷuni, puuġlu maquluni. Aglaan nutauruaq wine puuġnaqtuq nutauruanun wine puuŋiññun, aasii iluqatiŋ puuġlu wine-lu maquŋił̣ł̣utiŋ.

Umialignam Pania, Aġnaġlu Aksiuktuaq Jesus Annuġaaŋanik

¹⁸ Tavra tainna uqaġataviksillugu iliŋiññun, umialiŋnaq isiŋaruq aasii sitquqłuni sivuġaanun uqallaŋaruq, Paniga tuquqqammiqsuq. Qaiḷutin aksiugiaġuŋ, aasii iñuuniaqtuq.

¹⁹ Tavra Jesus makiłłuni maliŋagaa, piqatigivlugich iḷitchitqurani.

²⁰ Tavra iglaupkaqtillugich, aġnaq nagliksaaġutiqaŋaruaq aunaaqsruġniġmik qulit malġugni ukiuni Jesus tunuanuŋaruq, aasii aksiullakługu siñiġutaa annuġaaŋan,

²¹ isumavluni, aksiḷḷaksiññaġupkuunnii annuġaaŋa, iłuaqsiñiaġaluaqtuŋa.

²² Tavra Jesus kiŋiaŋaruq, aasii tautukługu uqallaŋaruq, Quviasugiñ paniuruatiin, ukpiġurvich iłuaqsipkaġaatin. Tavra tavraŋŋatchiaq aġnaq iłuaqsiŋaruq.

²³ Tavra Jesus tikiññami umialiŋnam igluqpaŋanun, tautukługich atuqtuuraqtit suvluaqtuġnanik, iñusalaiḷḷu qiaqpaktuat,

²⁴ uqallaŋaruq, Annisitchi. Niviaqsiaġruk tuquŋitchuq. Siñiksiññaqtuq. Tavra ilaisa iglautigiŋagaat.

²⁵ Tavra iñusalaich anitauganiŋmata, ilaa isiŋaruq aasii tiguŋagaa argaŋisigun, tavrani niviaqsiaġruk makinŋaruq.

²⁶ Tavraasii uqaluk taavrumuuna siaminŋaruq nunaaqqipayaanun.

Jesus Iłuaqsigik Malġuk Ayauŋaruak Iññuk

²⁷ Tavra Jesus iglaupkaqtillugu tavraŋŋa, malġuk ayauŋaruak maliŋagaak, ququullatigillaan, Iġñiġuruatiin David-mun naglikkutiqaġiñ uvaptiŋnun.

²⁸ Jesus isiġman iglumun, ayauŋaruak ullaŋagaak, aasii Jesus apiġiŋagik, Ukpiqpisik uvamnun taamna piyumiñaġnivḷugu? Iliŋikta kiuŋagaak, Aaŋ, Ataniiq.

²⁹ Tavra ilaan aksiŋagaik iriŋik, uqaqłuni, Ukpiġutiqaqtilaaptiktun taamna pirauli iliptiŋnun.

³⁰ Tavra iriŋik tautullasiŋaruk. Tavraasii Jesus piraksripiallaŋagik, Suuramikunnii uqaġnatik kimulliqaa.

³¹ Tavra aullaqłutik siaminŋagaak iḷisimanautaa Jesus nunaaqqipayaanun.

Jesus Iłuaqsigaa Uqalaitchuaq Iñuk

³² Aullaqsalgiñmiullu iñuk uqalaitchuaq ilitqusiqł̣uqaqłuni qaġġisiŋagaat ilaanun.

³³ Tavra ilitqusiqł̣uk anitauganiŋman, uqalaitchuaq iñuk uqallasiŋaruq, aasii iñusalaich kamasuŋarut, uqaqłutiŋ, Qaŋaunnii innasiq iḷisimanaŋaitchuq Israel-mi.

³⁴ Tavrali Pharisees uqallaŋarut, Ilaa anittairuq ilitqusiqł̣ugnik ikayuqtiqaqłuni umialgannik ilitqusiqł̣uich.

Jesus Nagligigai Iñuich

³⁵ Tavra Jesus kukiḷuŋaruq iluqaiññi iniqpaŋni nunaaqqiuraniḷu, iḷisaurrivḷuni aŋaiyyuviŋiññi, alġaqsruivḷuniḷu tusaayugaaġiksuaŋiñik God-im atanniqsimmataata iñuŋnun, iłuaqsivḷugiḷḷu naŋirrutipayaat suaŋairrutipayaallu.

³⁶ Tavra Jesus tautukamigich iñusalaich, nagligiŋagai, qanuq irrusiqaŋarut qanuqsausiiqsuatun ikayuqtaiḷḷiuqłutiglu, imnaisun munaqsraitchuatun.

³⁷ Tavra Jesus uqallaŋaruq iḷitchitquramiñun, Iñusalaich utaqqirut tusaayumavlutiŋ tusaayugaaġiksuanik palauvaksratun nauganiktuatun kipisałhiñaaġuqługich, aglaan savaktit iñukitchut.

³⁸ Tavraasii qiññuaqtuġitchi Atanġanun nautchiaqaġvium tilisivsaaqulugu savaktiksravsaamiñik.