Matthew 8 - Iñupiatun Mumiksat Uqalugiksuat

Jesus Mamititkaa Kiḷḷiġruaqtuqtuaq

¹ Tavra Jesus atqaġman iġġimiñ, iñugiapiaġataqtuat iñuich maliŋagaat.

² Tavrani, kiḷḷiġruaqtuqtuaq ullautiŋaruq ilaanun aasii sitquqłuni sivuġaanun uqaqłuni, Ataniiq, pisukkuvich mamititchumiñaġiŋma.

³ Tavra Jesus isaaŋaruq aasii aksikł̣ugu uqallakłuni, Piyummatiqaqtuŋa. Mamittin. Tavra tavraŋŋatchiaq ilaan kiḷḷiġruaqtuutaa maminŋaruq.

⁴ Tavra Jesus uqallautiŋagaa, uqaqsaiḷiyumautin sumikunnii iñupayaamun, aglaan aullaġiñ, tautuktitchaktuġiñ aŋaiyyuliqsiqpaŋnun, aasii aitchuiḷutin aitchuunmik Moses-kun piraksriutauruamik, iñuich iḷitchuġiyumaut salummaqtautilaaġnik piqataullasivḷutin iñuŋnun.

Jesus Iłuaqsigaa Aŋuyaktit Atanauraŋata Kivgaŋa

⁵ Tavra Jesus tikiḷġataviksillugu Capernaum-mun, Rome-miuguruam aŋuyaktit atanauraŋata paaŋagaa, qiññuaqtuġvigivlugu,

⁶ uqaqłuni, Ataniiq, uvaptiŋni amma kivgaġa nalaruq, avatiŋi tuquvlutiŋ, iłuiḷḷiupiaġataqłuni.

⁷ Tavra Jesus uqallautiŋagaa, Ullaglugu iłuaqsiñiaġiga.

⁸ Tavra aŋuyaktit atanauraŋata kiuŋagaa, Ataniiq, nalliummatiŋitchuŋa isiġiaġumiñaġlutin iglumnun, aglaan uqallaksiññaġiñ piraksriunmik, aasii kivgaġa iłuaqsirauniaqtuq.

⁹ Qanuq uvaŋaptauq ataniqaġmiuŋa atanauranik, aasii aŋuyaktiqaġmiuŋa aŋalatamnik. Uqallakama iḷaŋannun, Aullaġiñ, aullaġaqtuq. Suli allamun uqallakama, qaġġiiñ, ilaa qairaqtuq. Suli kivgaġikkamnun uqallakama, Una piuŋ. Taamna pisuummigaa.

¹⁰ Tavra Jesus tusaaqqaaqługu ilaa uqaqtuaq, kamatchaŋaruq, aasii uqallautivlugich tamatkua maliġuaqtini, Iḷumun uqallautigivsi, Israel-guruaniunnii iḷitchuġiŋaitchuŋa iñuŋmik ukpiġutiqaqtigiruamik uumatun iñuktun.

¹¹ Uqallautigivsi, iñugiaktuat Jew-guŋitchuat qaiñiaqtut nunapayauraniñ, aasii aquvitqataulutiŋ niġġiviŋñun piqatigilugu Abraham, Isaac-lu, Jacob-lu atanniqsimaviani Taavruma qiḷaŋmiittuam.

¹² Iḷaŋiḷḷi Israel-guruat miqłiqtuunasugiruat atanniqsimanniktuamun igitauniaqtut taaġniqsrauruamun. Tavrani iñuich qianiaqtut tiriqtillugiḷḷu kigutitiŋ.

¹³ Tavrali aŋuyaktit atanauraŋannun Jesus uqallaŋaruq, Aullaġiñ. Taŋŋiqsuq apiqsrian ukpilianikavich. Tavra kivgaŋa iłuaqsirauŋaruq tavrauvvaa.

Jesus Iłuaqsigai Iñugiaktuat Iñuich

¹⁴ Tavra Jesus isiqami Peter-m igluanun, ilaan tautuŋagaa Peter-m aakaruaŋa nalaruaq uunnautiqaqłuni.

¹⁵ Jesus aksiŋagai argaŋi, aasii uunnautaiŋaruq, makitiqłuniasii niqłiuġutiaqsivḷugich.

¹⁶ Taavrumani unnugiaqtuami iñuich qaġġirriŋarut iñugiaktuanik ilitqusiqł̣uqaqtuanik, aasii Jesus anittaŋagai ilitqusiqł̣uich uqaluŋmiñik, suli iłuaqsivḷugich iluqaisa naŋittuat.

¹⁷ Taamna taŋŋiutausaŋaruq uqautigiŋaraanun uqaqtiŋan God-im Isaiah-m inna, “Ilaan piiŋagai suaŋairrutivullu naŋirrutivullu.”

Siġḷiġñaqtuq Iḷitchitqurauniq Jesus-mun

¹⁸ Tavra Jesus tautukamigich iñugiapiaġataqtuat iñuich avatimiñi, piraksriŋagai iḷitchitqurani ikaaquvlugich taaguŋatchiġmun.

¹⁹ Tavra iḷisaurri pitquranik ullautiŋaruq ilaanun aasii uqallautivlugu, Iḷisaurrii, maliġuaġniaġikpiñ sumupayauraq aullaġuvich.

²⁰ Tavrali Jesus uqallautiŋagaa, Pisukkaat sisiqaqtut, tiŋmiallu ugluqaqłutiŋ, aglaan Iġñiŋa Iñuum aimaaġviitchuq pimaaqtuġumiñakkamiñik.

²¹ Allasuli iḷaŋat maliġuaqtiŋisa uqallaŋaruq ilaanun, Ataniiq, iḷuviġiallaktiqqaaġlagu aapaga, maliġuaqsaqpaallukkumagikpiñ iḷuviqqaaġlugu.

²² Tavra Jesus uqallautigiññaŋagaa, Akkupak maliŋŋa. Tamatkua tuquŋaruatun ittuat iḷuvviuġlich tuquŋaruanik.

Jesus Quunniġuqtitkaa Imaq

²³ Tavra Jesus ikimman umiaqpauramun, iḷitchitquraŋisa ikiqasiŋagaat.

²⁴ Tavraasii anuqqałłaŋaruq, umiaqpauraqunnii iksruġaliqł̣ugu imġum. Aasii Jesus siñiŋaruq.

²⁵ Tavra ullakługu itiqsaŋagaat, uqaqłutiŋ, Annauttutigut Ataniiq, suksraugaqsirugut.

²⁶ Tavra ilaan uqallautiŋagai, Summan iqsivisi? Qanutun ukpiġutikisigivisi? Tavra Jesus makinŋaruq, aasii suakługik anuġiḷu imaġlu, aasii quunniġupaluŋaruq.

²⁷ Tavrani iñuich kamasupaluŋarut, uqaqłutiŋ, Qanusiq uvvauna iñuk, anuġivlu immavlu kamagillaniqpatku.

Jesus Iłuaqsigik Malġuk Ilitqusiqł̣uqaqtuak

²⁸ Tavra tikiñman taaguŋatchiġmun nunaŋannun Gadarenes, malġuk ilitqusiqł̣uqaqtuak paaŋagaak, iñukpalliqł̣utiŋ iḷuvviviŋniñ, iqsiñaqpaił̣ł̣utiŋ iñuich unnii tamaunaallaiŋaniqsuat.

²⁹ Tavra nipaalarraqsiŋaruk, Iġñiġuruatiin God-mun Suniaqpisiguk? Qaivich nagliksaaqtitchaqtuqłunuk nagliksaaqtitauviksraq nalautinŋaiñŋaan?

³⁰ Tavra tuttuqłusalaich niġiñiaŋarut uŋasiuraqłutiŋ iliŋiññiñ.

³¹ Tavra ilitqusiqł̣uich apiġipiaġataŋagaat, Anitkuptigut, aullaqtittigut tuttuqługnun.

³² Tavra Jesus uqallautiŋagai, Aullaġitchi. Tavra anikamiŋ aullaŋarut tuttuqługnun. Tavraasiikii, iluqaġmiŋ tuttuqłuich paŋaliŋarut suamavlutiŋ anmun qutaiḷakun ikpikun immamun, aasii ipivlutiŋ.

³³ Tavra qaunaksriruat tuttuqługnik pigruŋarut, aasii iniqpaŋmukamiŋ quliaqtuaġiŋagaich supayaurat, qanuqtilaaŋagniglu ilitqusiqł̣uqaqtuak.

³⁴ Tavraasii, iluqaġmiŋ iniqpaum iñuŋi qaiŋarut kasuġiaqługu Jesus. Aasii tautukamirruŋ apiġiŋagaat katchuŋaiqł̣utiŋ qimautitquvlugu ilimiŋniñ.