Matthew 7 - Iñupiatun Mumiksat Uqalugiksuat

Jesus Iḷisaurriruq Qanuqinniġaqłiġñasi

¹ Qanuqinniġaqłiġñasi allanik, God-ivli qanuqinniġaġniaŋiñmigaasi.

² Qanuq qanuqinniġaunmik uqallautiqaġuvsi taavrumiŋa qanuqinniġausiaqaġniaqtusi. Qanutchikun qanuqinniġaiguvsi tuniqtusiḷugu naagga tunikiḷḷugu, tainnatuttauq qanuqinniġausiaqaġniaġmiusi.

³ Summan pasivisigik aniqatisi killuliqirualivḷugich ilivsi pigiił̣haaġaluaŋŋavsi?

⁴ Tainna pikavsi, iñuktun ittusi qirugruaġmik irimiutaqallaġmi irriugauramik piiqsiñiataktuatun aniqanmi iraaniñ.

⁵ Ukpiŋŋuaqtuasii, iłuaqsruqqaaġitchi ilivsiññun, aasii ikayuġumiñaqsivaalluglugich aniqatisi killukuaġutiŋiññik.

⁶ Iḷisautiniatagnagich uumisuglutiŋ paaqsaaŋaruat God-mun qanuq qimmisun ittut saallusi ugiaġniaqsaġumaruatun ilivsiññik. Iḷisautiniaqsaġaluaqtuni ittut iḷisimmatun uyaġagnik akisuruanik tuttuqłuich sivuġaannun. Puttuqsrisaitchut akisutilaaŋanik aasii tunmalugigiññaqługich.

Aŋaiyyusitchi Ivaqłiasitchi Tigluktuġitchi

⁷ Aŋaiyyuguvsi, qapiŋaiḷḷusi qiññuaqtuġitchi aitchuusiaqaġniaqtusi, qapiŋaiḷḷusi ivaqłiasitchi paqinniaġiksi ivakkaqsi, qapiŋaiḷḷusi tigluktuġitchi aasii upkuiġutiniaġaasi.

⁸ Qanuq iñupayaaq qiññuaqtuqtuiññaqtuaq aitchuusiaqallaruq, suli ivaqłiatuiññaqtuaq paqitchivḷuni, iñuk suli tigluktuqtuiññaqtuaq upkuiġurriqaġniaqtuq.

⁹ Nallivsi aapauruasii aitchuġumiñaitkiksi iġñiqsi uyaġagmik apiġikpasi punniqaġugluni,

¹⁰ naagga aitchuġumiñaitkiksi nimiġiamik apiġikpasi iqaluqaġugluni.

¹¹ Tavraasii ilivsi, nakuuŋitkaluaŋŋavsi, aitchuisuurusi nakuuruanik miqłiqtuvsiññun, qanutułhaaq aasii Aapari qiḷaŋmiittuaq aitchuiyumiñaqtigiruq nakuuruanik tamatkunuŋa qiññuaqtuqtuanun inmiñun.

¹² Tavra qanupayaaq pitquyumaguvsi iñuŋnun, tainnatulli pisigik, qanuq taamna taŋŋiutauruq pitquranun qaisauruanun Moses-kun, iḷisaurrutiŋiññullu God-im uqaqtiŋisa.

Niġukitchuaq Isiġiaq

^13-14 Isiġitchi niġukitchuakun isiġiakun. Isiġiaq niġukitchuq siġḷiġnaqtuġlu apqun kaŋŋiññaqtuaq qiḷaŋmun aasii iñukitchut iñuich paqitchiruat tamattumiŋa apqunmik. Aasiivsauq igḷuani iñugiaktuat isiŋagaat niġuturuaq isiġiaq aasii iglauvigivlugu siġḷiġnaitchuaq apqun kaŋŋiññaqtuaq nagliksaaġviŋmun.

Napaaqtuq Siiġñaŋiḷu

¹⁵ Nipuŋaitchitchi uqaqtauŋŋuaqtuanik God-mun, qanuq qaisuurut sagluqinnigukłutiŋ qiññaqaqłutiŋ imnaisun anniaqłiḷaitchuatun. Iliŋich ipiaġataqtut kaaksiuruatun amaqqutun anniaqłiġumiñaqtuatun ilivsiññik.

¹⁶ Ami iḷitchuġiniaġisi piḷġusiŋisigun, napaaqtututtauq siiġñaŋisigun iḷitchuġimmatun. Grapes siiġñat naulaitchut nauruaniñ kakiḷḷaġnaliŋniñ, fig-giḷḷu siiġñat.

¹⁷ Tavra napaaqtuġiksuat siiġñisuurut siiġñaġiksuanik, aglaan napaaqtuġiitchuat siiġñaġiitchuanik.

¹⁸ Napaaqtuġiksuaq siiġñiyumiñaitchuq siiġñaġiitchuanik, naaggaunnii napaaqtuġiitchuaq siiġñaġiksuanik.

¹⁹ Napaaqtupayaaq nauriḷaitchuaq siiġñaġiksuanik kipisuugaat aasii qirriutivlugu igniġmun.

²⁰ Tainna tavra uqaqtauŋŋuaqtuat God-mun iḷisimaniaġisi pilġusiŋisigun.

Qaŋaunnii Iḷisimaŋaitkivsi

²¹ Iḷaŋich uqaqtuat uvamnun inna, Ataniiq, Ataniiq, isiġumiñaitchut atanniqsimavianun Taavruma qiḷaŋmiittuam, aglaan iñupayaaq kamaksriruaq pisuutaanik Aapama qiḷaŋmiittuam isiġniaqtuq.

²² Taivrumani isivġiġviŋmi iñugiaktuat uqaġniaqtut uvamnun, Ataniiq, Ataniiq, uqaqtauŋaitpisa God-mun pisivlutin, anittaiŋaitpisalu ilitqusiqł̣ugnik atuqługu atqiñ, suli piŋaitpisa iñugiaktuanik aliuġnaqtuanik atuqługu atqiñ?

²³ Tavraliasii nalupqinaiġḷugu uqallautiniaġitka, qaŋaunnii iḷisimaŋaitkivsi, aullaġitchi uvamniñ, ilivsi piḷuusiqirit.

Malġuk Igluqpirik

²⁴ Iñupayaaq tavra tusaaruaq makkuniŋa uqalumnik aasii kamagivlugich arriqaġniaqtuq isumaturuamik iñuŋmik igluqpiruamik uyaġagruam qaaŋanun.

²⁵ Tavraasii sialuguqtuq, ulittuġlu, anuġi anuqqaŋmivḷuni aasii qasaqtaqługu taamna igluqpak, aasii ulġuŋitchuq, qanuq maŋŋuqaŋaruq uyaġagruamun.

²⁶ Aasiisuli iñupayaaq tusaaruaq makkuniŋa uqalumnik aasii kamagiŋił̣ł̣ugich arriqaġniaqtuq isumalluaġiitchuamik iñuŋmik igluqpiruamik qaviam qaaŋanun.

²⁷ Tavra sialuguŋaruq, suli uliłłuni, anuqqaŋmivḷuni aasii qasaqtaaqsivḷugu taamna igluqpak, aasii ulġuŋaruq suksraunġipiallakłuni.

Jesus Ataniġnaqutaa

²⁸ Tavra Jesus uqaŋaiġataġman taapkuniŋa uqaluŋnik, iñusalaich kamasuutiqaŋarut iḷisaurrutiŋiñik,

²⁹ qanuq ilaan iḷisautiŋagai iñuktun ataniġnaqusiraqtuatun, iḷisaurriŋił̣aaŋisitun pitquranik.