Matthew 6 - Iñupiatun Mumiksat Uqalugiksuat

Jesus Iḷisaurriruq Qanuq Nagliktuiñaqtilaamik

¹ Qaunagisitchi piraġausiqaġuŋiḷḷusi nagliktuutivsiññik qiñiqusaaqsiññaġlusi sivuġaŋanni iñuich. Tainnatuaġuvsi Aapavsi qiḷaŋmiittuam akiḷiġumiñaitkaasi.

² Tavra, aitchuiguvsi nagliktuutinik, nipauqłuktautiginagich, ukpiŋŋuaqtuat piḷġusiatitun aŋaiyyuviŋñi apqutiniḷu, nanġaqusaaqłutiŋ iñuŋnun. Iḷumun uqallautigivsi, akiḷiusiaqaaniktut.

³ Aglaan ilivsi aitchuiguvsi nagliktuutinik, iḷisimapkaġniatagnasi saumiksi nalupkaġmatun suliqitilaaŋanik taliqpivsi.

⁴ Nagliktuisitchi nalunaqtuakun, aasiiḷi Aapavsi tautullaruam nalunaqtuami akiḷiġñiaġaasi.

Jesus Iḷisaurriruq Aŋaiyyunikun

⁵ Aasiisuli aŋaiyyuguvsi, piññasi ukpiŋŋuaqtuatun, qanuq iliŋich makitavlutiŋ aŋaiyyullaturut aŋaiyyuviŋñi apqutillu kayyaaŋiññi, tautuqusaaqłutiŋ iñuŋnun. Iḷumun uqallautigivsi, akiḷiusiaqaaniktut.

⁶ Aglaan ilivsi aŋaiyyuguvsi, isiġitchi inauravsiññun aasii umiqqaaġlugu upkuaq aŋaiyyuaqsiḷusi Aapavsiññun nalunaqtuamiittuamun, aasiiḷi Aapavsi tautullaruam nalunaqtuami, akiḷiġñiaġaasi.

⁷ Suli aŋaiyyuniġmi uqallakkaluamiiġñasi taŋiġitchuanik uqaġniġnik Jew-guŋitchuat piḷġusiatitun, qanuq isumasuurut tusaarauniaġnivḷutiŋ pisigilugich iñugiaktuat uqalutiŋ.

⁸ Tuvraġnasigik, qanuq Aapari iḷisimaruq sunik pigiraksraġikkavsiññik sivuani apiqsriŋaiñŋavsi inmiñun.

⁹ Aŋaiyyusitchiasii inna: Aapavut qiḷaŋmiittuatiin, iñuich qiksigilisin.

¹⁰ Ilivich atanniqsimakkich iñupayaat. Iñupayaat piḷich pisuutignik nunami, qiḷaŋmi pisuutignik piruatun.

¹¹ Aitchuqtigut uvlupak niqiksraptiŋnik.

¹² Suli suliqutigiŋaikkich itqaumayumiñaiġḷugich piḷuutivut, uvaguttauq suliqutigiŋaiġmatun itqaumayumiñaiqł̣ugich tamatkua piḷuksiruat uvaptiŋnun.

¹³ Suli ikł̣igutchaktinniaqtinnatigut, annautilutalu piḷuktuamiñ. [Qanuq ilivich umialgurutin suaŋŋatiqaqłutin kamanautiqaqłutillu isuitchuamun. Aamian.]

¹⁴ Qanuq suliqutigiŋaiġuvsigik itqaumayumiñaiġḷugich iñuich piḷuutiŋich, Aapavsi qiḷaŋmiittuam suliqutigiŋaiġñiaġmigai itqaumayumiñaiġḷugich piḷuutisi.

¹⁵ Aglaattauq suliqutigiŋaiġumiñaitkuvsigik iñuich piḷuutiŋich, Aapavsivsauq suliqutigiŋaiġumiñaiñmigai piḷuutisi.

Jesus Iḷisaurriruq Niġiḷaiññikun Aŋaiyyuuqłuni

¹⁶ Suli niġiḷaitkuvsi aŋaiyyuuġlusi, qiññaqaġnasi ipiqtunaqsiḷusi ukpiŋŋuaqtuatun, qanuq ilaisa qiññaġiiḷiraġigaich kiiññatiŋ niġiḷaisilaaqtiŋ tautuquvlugu iñuŋnun. Iḷumun, uqallautigivsi, akiḷiusiaqaaniktut.

¹⁷ Aglaan niġiḷaitkuvsi aŋaiyyuuġlusi, allaŋŋuqtiġnagu kiiñaqsi,

¹⁸ iñuich naluyumagaat niġiḷaiññiqsi aŋaiyyuuqłusi, aglaan Aapavsi nalunaqtuamiittuam iḷisimagaa, aasii Ilaan tautuaġiruam nalunaqtuami akiḷiġñiaġaasi.

Jesus Iḷisaurriruq Suġaliqtigun

¹⁹ Tutquiñasi mattumuŋa nunamun ilivsi piksravsiññik suġaliġnik, qupilġullu qalġuvlu maqutchuugai, suli tigligayuktit siqumutivlutiŋ tigligaġviannun.

²⁰ Aglaan tutquisitchi qiḷaŋmun ilivsi piksravsiññik suġaliġnik. Tatpagmani qupilġuitchuq qaliḷaitchuġlu maqutchiruksranik, tigligayuktaitchuġlu siqumutilutiŋ tigliktuksranik.

²¹ Qanuq irvianni suġalivsi, tavraniitchugniaġmiusi.

Qaumman Timimun

²² Irrak nannisun ittuk timimun. Irisi surruitpata tautuksisuġniaqtusi iñuulluataġniksramik tuvraġlugu God-im sivunniutaa. Inniaqtusi siḷivinŋaruatun qaummaġiksuamik.

²³ Aglaan irisi surruiñŋitpata tautugluatayuiññiaqtusi iñuulluataġniksravsiññik, God-im sivunniutaa tuvralguiḷḷugu. Inniaqtusi siḷivinŋaruatun taaqtuamik. Tavraasii isumagaluaġuvsi iñuunasugalusi God-im iñuutqutaatun makimaŋallaan God-im sivunniutaa, qanutun killukuaqtigirusi.

Jesus Iḷisaurriruq God-mik, Suġaliqtigullu

²⁴ Kiñaliqaa savakkumiñaitchuq malġugnik ataniqaġluni atautchikun, qanuq ilaan uumiginiaġaa igḷua aasii piviaġilugu igḷua. Naaggaunnii qiksiksrautiqaġluni igḷuanun aasii suuŋiḷaġilugu igḷua. Savautiyumiñaitkiksi God suġallagniaġniġlu atautchikun.

²⁵ Tavraasii uqallautigivsi, uŋiarrisiqaġnasi niqiksravsiññik, imiksravsiññiglu iñuusukpaiḷḷusi, naaggaunnii annuġaaksravsiññik. Iñuggun naumałhaaqtuq niqiksraqsiuqsiññaġniġmiñ, suli timi naumałhaaqtuq annuġaaniñ.

²⁶ Qiñiqsigik tiŋmiat tiŋmiruat siḷami, kanġaqsruiḷaitchut nautchiaksranik naagga kivriḷaitchut katitchiḷaitchullu suġalliqpiŋñun, naaggauvva Aapavsi qiḷaŋmiittuam niġipkaqsimaaġai. Ilivsi akisułhaaqtusi tiŋmianiñ.

²⁷ Nalliqsi iñuuniqtusiḷaaġumiñaitchuq uŋiarigiññaġluni.

²⁸ Aasii summan uŋiarrisiginiqpisiuŋ annuġaaksraq? Isumalaaġutigisigik nauriat qanuq nautilaaŋat. Siġġaqilaitchut ukił̣harriulaitchullu,

²⁹ uqallautigivsi, Solomon unnii qanutun kamanaqtigigaluaqłuni annuġaaŋaitchuq atautchisun-unnii tamatkunatun nauriatun qiñiyunaqtigiliġḷuni.

³⁰ Tainnatun God-im qaunagillaniqpagich nauriallu ivgiḷḷu uvlupałhiñaq nauruat aasii uvlaakun qirriutivlugich igniġviŋmun, nalupqinaitchuq annuġaaksraqaqtinniaġaasi. Qanutun ilivsi ukpiġutikisigirusi uŋiariruasii.

³¹ Tavraasii uŋiariñasi. Apiqsruqtuġnasi inna, sumik niġiñiaqpisa? Sumik imiġniaqpisa? Sumik annuġaaġniaqpisa?

³² Qanuq ukpiŋaitchuat piññagniaġuurut iluqaiññik tamatkuniŋa. Aapari qiḷaŋmiittuaq iḷisimaruq piqaqtuksrautilaavsiññik iluqaiññik tamatkuniŋa.

³³ Tavraasii piqaqtinniaġaasi iluqaiññik tamatkuniŋa ilivsi atanniqsimapkaqqaaġuvsi God-mun iñuulusiḷu nalaunŋaruakun.

³⁴ Taamna tainnainman, uŋiarrisaġinagu uvlaakuksraq, qanuq uvlaakun iñuk uŋiarrisiqaġumiñaqtuq uvlaakun piruanik. Uvluġaġikpan uuktuaġusiat naamarut uvlullaanun.