Matthew 4 - Iñupiatun Mumiksat Uqalugiksuat

Jesus Ikł̣igutchaktinniaqtauruq

¹ Tavra Jesus aullatiŋagaa Ilitqusiġiksuam nunagluktuamun ikł̣igutchaktinniaquvlugu Tuunġaġmun.

² Aasii ilaa niġiḷaiñŋaruq aŋaiyyuuġukłuni malġukipiani uvluni unnuaniḷu, aasii aquvatigun kaaliŋaruq.

³ Tuunġaum qaivḷuni uqallautiŋagaa, Iġñiġipiaqpatin God-im, makua uyaġaich punniġuqtitkich.

⁴ Ilaan kiuŋagaa, Aglausimaruq Bible-ni inna, Iñuk iñuuniaŋitchuq niqikun kisiagun, aglaallu ukpiġilugich God-im uqalupayauraŋi.

⁵ Tavrani Tuunġaum aullautiŋagaa Jesus Jerusalem-mun, aasii inillakługu nuvuquyuanun aŋaiyyuvikpaum qutchigñiqsramun,

⁶ aasii uqallautivlugu, Iġñiġipiaqpatin God-im, nautkiaġiñ, qanuq aglausimaruq Bible-ni inna, “Ilaan tiliñiaġai isaġuliŋni munaġitqulutin, aasii qaunaginiaġaatin piyaqququŋiḷḷutin.”

⁷ Jesus uqallautiŋagaa, Aglausimammiuqsuli, Uuktuġniaŋitkiñ Ataniq God-in.

⁸ Tavrasuli, Tuunġaum aullautiŋagaa qutchipiaġataqtuamun iġġimun, aasii satqummiutivlugu iluqaiññik umialgutiŋiññik nunam, kamanautaanniglu.

⁹ Aasii uqallautivlugu, Iluqaiññik tamatkuniŋa aitchuġniaġikpiñ, sitquġlutin aŋaiyyuvigigumŋa.

¹⁰ Tavrani Jesus uqallautiŋagaa, Aullaġiñ Satan, qanuq aglausimaruq Bible-ni inna, “Aŋaiyyuvigisaġiñ Ataniq God-in, suli kisian savautiniaġiñ.”

¹¹ Tavra Tuunġaum qimaŋagaa, aasii isaġulgich qaivḷutiŋ ikayuŋagaat Jesus.

Jesus Aullaġniigaa Savaani Galilee-mi

¹² Tavra Jesus tusaakami John tigutaaġnivḷugu, Galilee-muksaŋaruq,

¹³ aasii qimakługu Nazareth aullaqłuni iñuurraqsiŋaruq Capernaum-mi tatchim Galilee-m siñaaniittuami, nunaŋani Zebulun Naphtali-vlu.

¹⁴ Taamna uqautigiŋakkaŋa uqaqtaata God-im Isaiah-m nalautautquvlugu inna,

¹⁵ “Nunaŋa Zebulun nunaŋalu Naphtali-m, tuŋaani tatchim, taaganitchiani Jordan, Galilee-m iḷaŋani Jew-guŋitchuat iñuuvianni!

¹⁶ Iñuich taaqtuamiittuat tautugniaġaat ilaa kamanaqtuatun qaummaqtun ittuaq; suli tamatkua sivuuġaruat tuqqunmik, iñuummatun tuqqutim taġġaŋani, iñuurraqsiñiaqtut ukpiliġḷutiŋ, qausaġatautimmatun.”

¹⁷ Tavraŋŋaaglaan Jesus alġaqsruirraqsiŋaruq, uqaqłuni, Isumalitqigitchi, qanuq God-im atanniqsimasaaqsigai iñuich.

Jesus Ququaġai Sisamat Iqaluŋniaqtit

¹⁸ Jesus pisuaġniallaġmi siñaagun tasiata Galilee-m, tautuŋagik aniqatigiik, Simon tairauruaq Peter-mik, Andrew-lu aniqataa, kuvriqsuak tatchimun, iqalugniaqtauvlutik.

¹⁹ Ilaan uqallautiŋagik, Maliktinŋa. Iqalugniaġusiptiktun, iḷisautiniaġiptik iñunnagniaġniġmik.

²⁰ Tavrauvvaa qimaŋagaik kuvratik aasii malikługu.

²¹ Tavraŋŋa aullalgiññami Jesus tautulgitkik malġuksuli aniqatigiik, James-lu John-lu Zebedee-m iġñiŋik, umiuramiinniqsuat Zebedee-lu aapariŋ, allaiyaqługich kuvratiŋ. Ilaan ququaŋagik.

²² Tavrauvvaa qimaŋagaich umiuraqtik aapariglu, aasii malikługu Jesus.

Jesus Iḷisaurriruq, Alġaqsruiruq, Iłuaqsiriruġlu Naŋittuanik

²³ Aasii ilaa kukiḷuŋaruq iluqaani Galilee-mi, iḷisaurrivḷuni aŋaiyyuviŋiññi alġaqsruivḷuniḷu tusaayugaaġiksuaŋanik atanniqsimmataata God-im, suli iłuaqsivḷugich iñuich naŋirrutiqapayauraqtuat.

²⁴ Tavra Jesus tusaaŋagaat aliuġnaġniŋa siamiłłuni iluqaiññun nunaaqqiŋiñun Syria-m. Aasii iñuich qaġġirriŋarut ilaanun iluqaiññik naŋittuanik, tamatkuniŋa nagliksautiqaqtuanik qanusiḷimaanik naŋirrutinik kiiqsiuġutiniglu, iḷitqusiqł̣uqaqtuallu, qiiqsruġuuruallu, avatiŋiḷḷu tuquŋaruat, aasii ilaan iłuaqsiŋagai iluqaisa.

²⁵ Suli iñugiapiaġataqtuat maliŋagaat Jesus Galilee-miñ, quliniḷḷu nunaaqqiñiñ, Jerusalem-miḷḷu, Judea-miḷḷu taavaŋŋatchianiḷḷu kuugum Jordan.