Matthew 28 - Iñupiatun Mumiksat Uqalugiksuat

Jesus Aŋiruq Tuqqunmiñ

¹ Tavra Jew-guruat Itchaksriġmata Savaiññiŋat qaaŋiġman, qausaġataaqsimman, Mary Magdalene allalu Mary tautugiaŋagaak iḷuvvivik.

² Tavra tavrani nuna aulaqpaŋaruq, qanuq isaġulgata Atanġum atqaqłuni qiḷaŋmiñ aksraktinŋagaa uyaġagruaq, aasii aquppiutchiutivlugu.

³ Ilaan qiññaŋa inŋaruq igniġuuqpatittuatun, annuġaaŋiḷu qatiqtigivlutiŋ aputitun.

⁴ Tavra iqsigivlugu aŋuyaktit munaqsrich uuliksiŋarut aasii irrusiñikłutiŋ tuquŋaratun iñuktun.

⁵ Tavra isaġulik uqallaŋaruq aġnagnun, Iqsiñatik, qanuq iḷisimaruŋa ivaġiktik Jesus kikiaktuurrauŋaruaq aŋarrauramun.

⁶ Uvaniinŋitchuq, qanuq aŋiŋaruq uqausiġmisun. Qaisitchik, tautugiatku ini nallavia.

⁷ Tavraasii aullaġitchik qilamik, aasii uqallautilugich iḷitchitquraŋi aŋiñiḷugu tuqqunmiñ. Aasiuvva, ilaa ayuniaqtuq sivuvsiññi Galilee-mun. Taamani tautugniaġiksi. Uvva, uqallautigivsi.

⁸ Tavra aullaqsaaluŋaruk qilamik iḷuvviviŋmiñ iqsisigillaan quviasukpakłutiglu, aasii aqpamik uqallautiyaqtuŋagaich iḷitchitqurat.

⁹ Tavrasuli Jesus kasuŋagik aasii uqallautivlugik, Tutqiutiqaġitchik. Tavra ullakługu tiguŋagaak isigaŋigun aasii aŋaiyyuvigivlugu.

¹⁰ Tavrani Jesus uqallautiŋagik, Iqsiñatik. Aullaġlutik uqallautiyaqtutkik aniqatiitka aullaqulugich Galilee-mun. Taamani tautugniaġaanŋa.

Quliaqtuaqtut Munaqsrich

¹¹ Tavrali aġnak igliqtillugik, iḷaŋich aŋuyaktit munaqsrich aullaġniqsut iniqpaŋmun aasii quliaqtuaġutivlugich aŋaiyyuliqsiqpaich iluqaiññik piruanik.

¹² Tavra aŋaiyyuliqsiqpaich katinnamik atautchimun piqatigivlugich Jew-guruat umialiŋnat suli sivunniuganikłutiŋ, aitchuŋagaich manisalagnik aŋuyaktit,

¹³ aasii uqallautivlugich, Uqautiyumagisi iñuich iḷitchitquraŋiñun qaivḷutiŋ unnuami tigligniḷugu timaa, aullautivlugu siñiktillusi.

¹⁴ Taamnaasii kavanauruam tusaaniqpagu, iviġaumapkaġniaġikput aasii qanuqtinŋiḷḷusi.

¹⁵ Tavra aŋuyaktit munaqsrich akuqtuŋagaich maniich aasii pivḷutiŋ piraksriusiamiktun. Aasii taamna quliaqtuaq siaminŋaruq Jew-guruani uvlupaŋmunaglaan.

Jesus Niptaqtuq Iḷitchitquramiñun

¹⁶ Tavra qulit atautchimik iḷitchitqurat aullaŋarut Galilee-mun, iġġimun Jesus nalunaiqsaġiŋaraŋanun inmiŋnun.

¹⁷ Tavra tautukamirruŋ Jesus, aŋaiyyuvigiŋagaat, aglaan iḷaŋich nalupqisuŋarut.

¹⁸ Tavra Jesus qalliḷaaqługich uqallautiŋagai, Ataniġnaqusiqsauŋaruŋa aŋalataġiyumiñaqsivḷugich qiḷaŋmiittuat nunamiittuallu.

¹⁹ Tavraasii aullaġitchi aasii iḷitchitquraliuġlusi nunapayaaniñ, paptaiġḷugich atqagun Aapam Iġñiġuvlu Ilitqusiġiksuavlu,

²⁰ iḷisautilugich kamaksritqulugich iluqaiññik piraksriutigiŋaramnik ilivsiññun. Aasiuvva, itqatigigivsi ataramik, isuanunaglaan nunam.