Matthew 27 - Iñupiatun Mumiksat Uqalugiksuat

Jesus Pilate-muurrauruq

¹ Uvlaatchaurami iluqaġmiŋ aŋaiyyuliqsiqpaich umialiŋnaŋiḷḷu Jew-guruat sivunniuqatigiiŋarut Jesus-kun tuqutchukługu.

² Tavra qiḷiqsruiŋagaat, aasii aullautivlugu aitchuutigiŋagaat Pilate-mun kavanauruamun.

Judas Tuquruq

³ Tavrali Judas, Jesus aitchuutigiriŋa, iḷitchuġikami Jesus tuqutaksraġuqtilaaŋanik nunuuraliŋaruq, aasii utiqtiłługich iñuiññaq qulit maniich aŋaiyyuliqsiqpaŋnun, umialiŋnanullu,

⁴ uqallakłuni, Piḷuksiŋaruŋa aitchuutigivlugu tuqutautquvlugu patchisaitchuaq iñuk. Ilaisa kiuŋagaat, Suliqutauva taamna uvaptiŋnun? Qaunakkuiḷḷi iliŋnik.

⁵ Tavra Judas miḷuqsautivlugich maniich ilaaguaqtauŋaruamun aŋaiyyuvikpaŋmi, ilaa aullaqłuni qimiñŋaruq inmiñik.

⁶ Tavrali aŋaiyyuliqsiqpaich tiguvlugich maniich uqallaŋarut, Pitquratiguaŋaitchuq iksraukpata maniich aitchuutiqaġviŋmun aŋaiyyuvikpaŋmi, qanuq akigigai iñuktauruam.

⁷ Tavra uqaaġutigiŋagaich, aasii tauqsiutigivlugich Utkutchirim Nunaŋanik, iḷuviġviksramik iglaaguruanun.

⁸ Tavra taamna pisigivlugu taamna nuna atchiŋagaat Nunaŋa Augum paŋmapaŋmunaglaan.

^9-10 Tavrani taŋŋiqsauŋaruq uqautigiŋaraŋa uqaqtaata God-im Jeremiah-m, uqaqłuni, “Ilaisa tiguŋagaich iñuiññaq qulit maniich, aasii tauqsiutigivlugich utkutchirim nunaŋanun, piraksriutaatun Atanġum uvamnun. Tavra taapkua maniich iñugiaktilaaŋat Israel-guruat sivunniutigiŋakkaŋich akiḷiutigisukługich ilaanun.”

Jesus Apiqsruqtuġaa Pilate-gum

¹¹ Tavra Jesus makitaŋaruq sivuġaani kavanauruam, aasii kavanauruam apiġiŋagaa, Umialigivatin Jew-guruat? Jesus kiuŋagaa, Tainna uqallaktutin.

¹² Tavra ilaa saŋutkaluaġmanni aŋaiyyuliqsiqpaiḷḷu umialiŋnallu, kiulaiñŋagai.

¹³ Kiisaimmaa Pilate uqallakpuq ilaanun, Tusaqsraġiŋitpigich qanutun iñugiaktigiruat uqautigikkaŋich ilipkun?

¹⁴ Tavra Jesus kiuŋaitkaa sumikunnii, kavanauruaq aliuġutchapiaġataqługu.

Jesus Tuquruksraġuġaat

¹⁵ Tavra niqinaqilimaaġmata Itqaunmik qulaurrusiqiviŋmun, kavanauruaq piḷġusiqaŋaruq anipkaivḷuni nallipayaaŋannik tigutaaqtat, iñuich pisukkaŋannik.

¹⁶ Tavra tigutaaqtaqaŋarut iñugiiḷapiaġatamik, atiqaqtuamik Barabbas-mik.

¹⁷ Tavra katinmata Pilate apiġiŋagai, Kimik anipkaitquvisiŋa? Barabbas-mik, naagga Jesus-mik taggisiqaqtuamik Christ-mik?

¹⁸ Qanuq Pilate iḷisimaŋaruq killuġivlugu Jesus ilaiññun aitchuutigiŋatilaaŋanik inmiñun.

¹⁹ Tavra Pilate isivġiipkaqtillugu isivġiġvium aquppiutaŋiñi, nuliaŋan tilisivigiŋagaa uqaluŋmik, Iḷaksianagu taamna nalaunŋaruaq iñuk, qanuq iłuiḷḷiuġutigillakkiga ilaa unnuapak siññaktuġivlugu.

²⁰ Tavra aŋaiyyuliqsiqpaiḷḷu umialiŋnallu maliksuktitchiŋarut iñuŋnik annaktitquvlugu Barabbas aasii tuqullugu Jesus.

²¹ Tavra Kavanauruam apiġitqiŋagai, Nalliak ukuak iññuk anipkaquvisiuŋ? Iliŋisa kiuŋagaat, Barabbas.

²² Pilate uqallautiŋagai, Aasii qanuġniaqpigu Jesus taggisiqaqtuaq Christ-mik? Iluqaġmiŋ uqallaŋarut, Kikiaktuutili aŋarrauramun.

²³ Tavra ilaan uqallautiŋagai, Summan, sumik pigiitchualiqiŋava? Tavra nipaallavsaaqsiññaŋarut, Kikiaktuutili aŋarrauramun.

²⁴ Tavra Pilate iḷitchuġikami qanuġluni piyumiñaiññiqami, piallagniksraŋat isagutiniuraaqsiññaaqsimman, ilaa tigusiŋaruq imiġmik aasii iqaġivlugich argagni takkuanni iñusalaich, uqallakłuni, Uvaŋa patchisauŋitchuŋa uuma iñuum tuqutauniksraŋagun. Ilivsi pisiuŋ.

²⁵ Tavra iluqaġmiŋ iñuich kiuŋagaat, Tatavsausiaq tuqutauniŋagun uvaptiŋnun piḷi miqłiqtuptiŋnullu.

²⁶ Tavrani Pilate-gum anipkaŋagaa Barabbas, aasii ipiġaqtuqtitqaaqługu Jesus, aitchuutigiŋagaa kikiaktuutitquvlugu aŋarrauramun.

Aŋuyaktit Kipagigaat Jesus

²⁷ Tavrani aŋuyaktiŋisa Pilate aullautiŋagaat Jesus kavanauruam igluqpaŋanun, aasii katinŋagaich tamatkiqł̣ugich aŋuyaktauqatigiich avataanun Jesus.

²⁸ Tavra annuġaiyaŋagaat aasii atipkaqługu kavviġiksuamik annuġaanik umialiktun.

²⁹ Aasii niaquġusiŋarut kakiḷḷaġnaqtuanik qisiqsiutinik, aasii iḷivḷugu niaquanun, suli saakkiqł̣ugu qirugmik taliqpianun. Tavra sitquqłutiŋ sivuġaanun kipagiŋagaat uqaqłutiŋ, Sivisuruamik iñuuli umialgat Jews.

³⁰ Tavra tivvuaqtuŋagaat, suli tiguvlugu qiruk tigumiaġikkaŋa anauŋagaat niaquagun.

³¹ Tavra kipautigianikamirruŋ, annuġaagiŋagaat, aasii atipkaqługich ilaan annuġaaŋi, aullautivlugu kikiaktuutisukługu aŋarrauramun.

Jesus Kikiaktuurrauruq Aŋarrauramun

³² Tavra iglaullaġmiŋ, paaŋagaat iñuk Cyrene-miu, atiqaqtuaq Simon-mik. Taamna iñuk nunurivḷugu iqsruktinŋagaat Jesus aŋarrauraŋanik.

³³ Tavra tikiññamiŋ inimun atiqaqtuamik Golgotha, sivuniqaqtuaq niaquġruam inaanik,

³⁴ tavrani aitchuŋagaat Jesus wine-mik imiksraŋanik, avuramik suŋŋamik. Tavra uullakkaluaqamiuŋ, imiġuŋiñŋagaa.

³⁵ Tavra kikiaktuutianikamirruŋ aŋarrauramun, autaaŋagaich annuġaaŋi inmiŋnun saaptautigivlugich.

³⁶ Tavrani aquptaaqłutiŋ naipiqtuŋagaat.

³⁷ Aasii qulaanun niaquan iḷiŋagaat pasikkun ilaagun, taiguaġnaqtuaq, Uvva Jesus Umialgat Jew-guruat.

³⁸ Tavraptauq malġuk tigligayuktik kikiaktuutiŋammigaich, igḷua taliqpian tuŋaanun, suli igḷua saumian tuŋaanun.

³⁹ Suli iñuich tamaunnaaqtuat niaqulavigiraġaŋagaat nivliativlugulu pisaaŋŋatinik Jesus,

⁴⁰ uqaqłutiŋ, Ilivich siquvsiyumaaŋaruatin aŋaiyyuvikpaŋmik aasii nappatqigḷugu uvluni piŋasuni, annauttuiñ iliŋnik. Iġñiġikpatin God-im, atqaġiñ aŋarrauramiñ.

⁴¹ Tavraptauqsuli aŋaiyyuliqsiqpaich, piqatigivlugich iḷisaurriḷḷu pitquranik umialiŋnallu, kipagiŋagaat uqaqłutiŋ,

⁴² Annaurriŋagaluaqtuq allanik, annautilaitchuq inmiñik. Umialiginiqparruŋ Israel, atqaġli paŋmapak aŋarrauramiñ ukpiġiliġñiaġikput.

⁴³ Ukpiqtuq God-mun, uqaqłuniḷu Iġñiġinivḷuni God-mun. Kiasii tautuglakput God-mun annautisuŋmagaan paŋmapak.

⁴⁴ Taapkuaktauq tigligayuktik kikiaktuutiqatauruak ilaanun kipagiŋammigaak tainnatun.

Jesus Tuquruq

⁴⁵ Tavra uvlum qitiqqaġniŋaniñ piŋasunugataqtillugu taaqsiŋaruq nuna iluqani.

⁴⁶ Tavra piŋasunukpalliġman Jesus nipatutilaamisun nivliŋaruq, Eli, Eli, lama sabachthani. Taamna sivuniqaqtuaq, God-iiŋ, God-iiŋ, summan suksraaqpiŋa?

⁴⁷ Tavra iḷaŋisa tamaani makitaruat tusaavlugu uqallaŋarut, Uvvauma ququulagaa Elijah.

⁴⁸ Tavra iḷaŋat tavrauvvaa aqpamik tigusiŋaruq ivsaktaqtuamik, immiqł̣ugu wine-mik, iḷivḷugu qiruum nuvuanun, qaiñŋagaa ilaanun imiquvlugu.

⁴⁹ Aasiiḷi allat uqallaŋarut, Aannagu, naipiqtuġlakput Elijah qaiñiaġmagaan annautiyaqtuġlugu.

⁵⁰ Tavra Jesus nivlitqiŋaruq nipatuvluni aasii aniġniġiqł̣uni.

⁵¹ Tavra tavrani, talukiyaaŋa aŋaiyyuvikpaum aliŋaruq malġuułłuni, qulimiñiñ anmun. Tavrasuli nuna aulaŋaruq, uyaġagruallu quvluŋarut.

⁵² Iḷuvviviiḷḷu aŋmaŋarut, suli iñugiaktuat God-im iñuŋi tuquŋaruat aŋiŋarut tuqqunmiñ.

⁵³ Suli qimaŋagaich iḷuvġuvisiŋ. Jesus aŋianiŋman tuqqunmiñ, Jerusalem-muŋarut aasii tautuŋagaich iñuich iñugiaktuat.

⁵⁴ Tavra aŋuyaktit atanauraŋata tamatkualu aŋuyaktauqatiŋisa munaqsriruat Jesus-mik, tautukługich nuna aularuaq sullu piraġaqtuat aliuġusuliŋarut aasii uqallakłutiŋ, Iḷumun una Iġñiġimagaa God-im.

⁵⁵ Tavra tavrani iñugiaŋammiut aġnat, qiñiqtuaqtuat uŋasiñiñ, maliŋaruat Jesus-mik Galilee-miñ, savautivlugu.

⁵⁶ Iḷagiŋagaat Mary Magdalene, Mary suli aakaŋak James-lu Joseph-lu, aakaŋaglu iġñakisa Zebedee-m.

Jesus Iḷuvviuġaat

⁵⁷ Tavra unnuksraaġman, suġalliruaq iñuk qaiŋaruq Arimatheamiñ, atiqaqtuaq Joseph-mik, iḷitchitquraummiñiqsuaq Jesus-mun.

⁵⁸ Ilaa ullautiŋaruq Pilate-mun aasii apiqsriaġivlugu timaa Jesus. Tavrani Pilate piraksriiŋaruq aitchuutigitquvlugu Jesus timaa Joseph-mun.

⁵⁹ Tavra Joseph atqaqługu timi, nimmaaŋagaa nutauruamik ukił̣haaġiqsuamik.

⁶⁰ Aasii iḷiŋagaa ilaan nanmiñiq nutaamun iḷuvviviŋmiñun, iḷuvviviḷiamiñun uyaġagruakun, aasii ilaan aksraliŋagaa uyaġagruaqpak upkurriutivlugu iḷuvviviŋmun, aasii aullaqłuni.

⁶¹ Mary Magdalene allalu Mary aquppiŋaruk tavrani sanmivḷugu iḷuvvivik.

Munaqsrich Iḷuvviviŋmik

⁶² Siqiñiq nipianiŋman, Jew-guruat nutauruaq uvluat isagutimman, aŋaiyyuliqsiqpaich Pharisees-lu kasimaqatigiŋagaat Pilate,

⁶³ aasii uqallakłutiŋ, Kamanaaq, itqaumarugut qanuq taimña sagluqinnikti iñuuŋŋaġmi uqaŋatilaaŋanik, Uvlut piŋasut pianikpata aŋiñiaqtuŋa.

⁶⁴ Taamna pisigilugu iḷuvvivik anayanaiyaqtillugu uvluk piŋayuaŋnunaglaan, iḷaanni iḷitchitquraŋisa qaiḷutiŋ tiglikpiaġaat aullautilugu, aasii iñuich uqautiaqsiḷugich, Ilaa aŋiñiḷugu tuqqunmiñ, aasii taimma aqulliq saglutaun pigiił̣haaġluni sivulliġmiñ.

⁶⁵ Pilate uqallautiŋagai, munaqsriqaqtusi aŋuyaktinik anayanaiyaġiaqsiuŋ piyumiñaqtilaavsisun.

⁶⁶ Tavra aullaqłutiŋ anayanaiyaŋagaat iḷuvvivik aŋmaqsausiqaġnaiqł̣ugu nalunaiñŋutchiqsuqługu nalunaiñŋutamiŋnik munaqsriḷiqł̣ugulu aŋuyaktinik.