Matthew 26 - Iñupiatun Mumiksat Uqalugiksuat

Sivunniuġun Tuqutchukługu Jesus

¹ Tavra Jesus naannamigich iluqaisa tamatkua iḷisaurrutit, ilaan uqallautiŋagai iḷitchitqurani,

² Iḷisimarusi uvluk malġuk pianikpaŋnik Qulaurrusiqiviŋmun itqaun tikiññiaqtuq, aasii Iġñiŋa Iñuum aitchuutauniaqtuq kikiaktuurrautqulugu aŋarrauramun.

³ Tavra aŋaiyyuliqsiqpaich umialiŋnaŋiḷḷu Jew-guruat katinŋarut igluqpaŋanun aŋaiyyuliqsiqpaich qaukłiata, atiqaqtuam Caiaphas-mik.

⁴ Aasii sivunniugaqsivḷutiŋ atautchimi tigutaallasiñiaqsaqługu Jesus nalunautchiḷutiŋ, aasii tuqullugu.

⁵ Tavra uqallaŋarut, Niqinaqiŋŋaisaaglaan piññagu, tuavaallakpiaqtut iñuich.

Jesus Tivraġiksaġaa Bethany-mi

⁶ Tavra Jesus Bethany-miinman isiġmiupkaqługu igluani Simon kiḷḷiġruaqtuqtuam,

⁷ aġnaq ullautiŋaruq ilaanun piqaqłuni misuġuqtuunmik uyaġagmik akisupiaġataqtuamik tivraġiksaunmik. Aasii kuviŋagaa Jesus niaquanun, niġipkaqtillugu.

⁸ Tavra iḷitchitqurat tautukamirruŋ, piavsaŋarut uqaqłutiŋ, Summan asiñun tivraġiksaun atuqpa?

⁹ Qanuq una tivraġiksaun tuniyumiñaŋagaluaqtuq manisalaŋnun, aasii aitchuutigilugich maniich iḷiappauruanun.

¹⁰ Tavra Jesus, nalunaigivlugu taamna uqallautiŋagai, Summan isumaaluksaaqpisiuŋ aġnaq? Qanuq savaaqaŋaruq savaalluatapiamik uvamnun.

¹¹ Ataramik nayuqtigigisi iḷiappauruat, aglaan uvaŋa nayuqtiginiaŋitkivsiŋa ataramik.

¹² Kuvikamiuŋ una tivraġiksaun timimnun savaaġigaa itqanaiyautauvlugu iḷuvġuniksramnun.

¹³ Iḷumun uqallautigivsi, sumipayaaq manna tusaayugaaġiksuaq alġaqsruutaukpan nunapayaani, aġnam savaaġiŋaraa quliaqtuaguniaqtuq itqaummatauluni ilaanun.

Judas Aŋiqtuq Aitchuutigisukługu Jesus

¹⁴ Tavra iḷaŋat qulit malġuk iḷitchitqurat, atiqaqtuaq Judas Iscariot-mik, aŋaiyyuliqsiqpaŋnuŋaruq

¹⁵ aasii uqallakłuni, Sumik aitchuġniaqpisiŋa aitchuutigigupku Jesus ilivsiññun? Tavra akiḷiñŋagaat iñuiññaq qulitun maniŋñik.

¹⁶ Tavra tavraŋŋaaglaan Judas ivaqłiaŋaruq piviksramik aitchuutigisukługu Jesus.

Jesus-lu Iḷitchitquraniḷu Niġirut Itqautim Qulaurrusiqiviŋmun Niqinaqiviani

¹⁷ Sivullianni uvluŋisa Niqinaqivium Puvlaksautaitchuamik punniġmik, iḷitchitqurat ullaŋagaat Jesus apiġivlugu, Sumi itqanaiyaquvisigut qulaurrusiqiviŋmi nullautchiġviksraġnik?

¹⁸ Ilaan kiuŋagai, Aullaġitchi nalaagun iñuŋmun iniqpaŋmiittuamun, aasii uqallautilugu, Iḷisaurri uqallaktuaq, Ikarraġa tikitchuq, qulaurrusiqiniq niġisukkiga uvaŋalu iḷitchitquratkalu igluŋni.

¹⁹ Tavra iḷitchitqurat piŋarut Jesus piraksriutaatun inmiŋnun, aasii itqanaiyaqługu qulaurrusiqiniġmi nullautchiġviksraqtiŋ.

²⁰ Unnuksraaġmagu, Jesus aquvinŋaruq niġġiviŋñun piqatigivlugich qulit malġuk iḷitchitqurani.

²¹ Tavra niġiñiallaġmiŋ, Jesus uqallaŋaruq, Iḷumun uqallautigivsi, iḷavsi aitchuutiginiaġaaŋa.

²² Tavra iliŋich isumaalipiaġataŋarut, aasii uqallallaagaqsivḷutiŋ ilaanun, Ataniiq, sivuniġiviŋa uvaŋa?

²³ Jesus kiuŋagai, Ilaaguruq taamna misuksiqatauruaq punniġmik uvamnun puggutauramun, ilaan aitchuutiginiaġaaŋa.

²⁴ Iġñiŋa Iñuum tuquniaqtuq taŋŋiġḷugich aglausimaruat inmigun Bible-ni. Aglaan isumaaġutiqpaqaġli taamna iñuk aitchuutiginniktuaq Iġñiŋanik Iñuum. Iłuałhaaŋanayaqtuq taamna iñuk iñuuŋaitkumi.

²⁵ Judas, aitchuutigiriksrautaa, uqallaŋaruq, Iḷisaurrii, Uvaŋauva? Jesus uqallautiŋagaa, Tainna uqallaaniktutin.

Atanġum Nullautchiġvia

²⁶ Tavra niġiḷḷaġmiŋ Jesus tiguŋagaa punniq, aasii aŋaiyyuvluni quyyatigivlugu aviŋagaa, aasii aitchuutigivlugu iḷitchitquranun uqallakłuni, Tigulugu niġġisiuŋ, tavra timiga.

²⁷ Suli tiguŋagaa qallugauraq, aasii quyaanikami God-mun, qaiñŋagaa ilaiññun, uqallakłuni, Imiġitchi tavraŋŋa, iluqasi.

²⁸ Tavra taamna auga maqipkaqtauyumaaqtuaq iñugiaktuanun. Taavrumuuna God-im nalupqinaiġñiaġaa sivunniuġutini iñuŋnun suliqutigiŋaiġḷugich itqaumayumiñaiġḷugich piḷuutiŋich.

²⁹ Uqallautigivsi imitqigñiaŋitchuŋa uumaŋŋa napaaqtuayaam siiġñaŋan ivsaŋaniñ, tikiḷġataqtillugu taamna uvluq imiġniksraq nutaulugu piqatigilusi Aapama atanniqsimaviani.

³⁰ Tavra atuanikamiŋ aŋaiyyunmik aniŋarut, Iġġimuksaqłutiŋ Olives-mun.

Jesus Uqautigigaa Piŋaiñŋaan Peter-m Piiḷaaġniksraŋa

³¹ Tavra Jesus uqallautiŋagai, Iluqasi qimaŋniaġivsiŋa suksraaġluŋa uumani unnuami, qanuq aglausimaruq Bible-ni God uqallagnivḷugu inna, “Uvaŋa tuqunniaġiga imnaiḷiqiri, aasii imnaich siaminniaqtut.”

³² Aglaan aŋipkaqtauganikkuma aullaġniaqtuŋa sivuvsiññi Galilee-mun.

³³ Peter uqallaŋaruq Jesus-mun, Iluqaġmiŋ qimakkaluaqpatin suksraaġlutin, uvaŋa sumikunnii qimakkumiñaitkikpiñ.

³⁴ Jesus uqallautiŋagaa, Iḷumun uqallautigikpiñ, Anaqapak uvva piiḷaaġiniaġiŋma piŋasuni naluniḷuŋa tiŋmiaq nipatkaluaqtinnagu.

³⁵ Peter-m kiuŋagaa, Tuquqatigiraksraġigupkiñunnii, piiḷaaġiyumiñaitkikpiñ sumikunnii. Tainnaptauq uqallagaŋammiut iluqaġmiŋ iḷitchitqurat.

Jesus Aŋaiyyuruq Gethsemane-mi

³⁶ Tavra Jesus aullaqatigiŋagai iḷitchitqurani inimun atiqaqtuamun Gethsemane-mik, aasii ilaan uqallautiŋagai iḷitchitqurani, Aquvittitchi uvuŋa, ikuŋa aŋaiyyuyaqtuġniaqtuŋa.

³⁷ Aasii piqasiutivlugich ilimiñun Peter-lu malġuglu iġñiŋik Zebedee-m, ilaa ipiqtutcharraqsiŋaruq iłuiḷḷiurraqsivḷuniḷu.

³⁸ Tavrani uqallaŋaruq ilaiññun, Isumaaliqpaił̣ł̣uŋa tuquaqsiruatununnii iḷiruŋa, tavraniittitchi, aasii quviqtaiḷiqasiġḷuŋa.

³⁹ Aasii taikuŋaqtaallakłuni isumaaqpaił̣ł̣uni ulġuŋaruq nunamun, aasii aŋaiyyuvluni inna, Aapaaŋ, piyumiñaqpan, piiġuŋ nagliksaaġutiqpak uvamniñ, aglaattauq uvaŋa pisuutiŋił̣aaptun, aglaan ilivich pisuutiptun.

⁴⁰ Tavra Jesus utiŋaruq piŋasunun iḷitchitquramiñun aasii tautuŋagai siñiktuat. Tavra uqallautiŋagaa Peter, quviqtaiḷiyumiñaiñŋavich atautchimiunnii ikarraġmi?

⁴¹ Quviqtaiḷisitchi aŋaiyyusitchiḷu, iḷaanni payaripkaqpiaqtusi ikł̣igutchaktinniaġunmun. Iḷumun ilitqusisi piyummatiqaġaluaqtut, timisi sayaitchut.

⁴² Tavra Jesus aullavsaaŋaruq igḷuvlugu aasii aŋaiyyuvluni, Aapaaŋ, pisuutigigupku nagliksaaqpaktuksrauluŋa, pisuutin piḷi.

⁴³ Tavra utaqqikamigich, tautuvsaaŋagai siñiktillugich, qanuq iriŋich pillitchiŋarut.

⁴⁴ Tavra Jesus qimatqiŋagai, aullaqłuni aŋaiyyuvsaaŋaruq piŋatchiqł̣ugik, uqalugivlugich taapkuasuli uqaluich.

⁴⁵ Tavra uttaqiŋagai iḷitchitqurani, aasii uqallautivlugich, Tavrasuli siñikpisi piḷaiŋaiqsiaqłusi. Uvva, aitchuutauniksraŋa Iġñiŋan Iñuum tikitchuq aŋalataġiyumiñaqsivḷugu piḷuktuanun iñuŋnun.

⁴⁶ Makittitchi. Aullaqta. Tautuksiuŋ uvva aitchuutigiriga uvaniittuq.

Tigurauruq Jesus

⁴⁷ Jesus uqaġniaqtillugusuli Judas qaiŋaruq, iḷaŋat qulit malġuk, piqatiqaqłuni iñusalaŋnik savikpiraqtuanik anautchiraqtuaniglu, qairuanik aŋaiyyuliqsiqpaŋniñ umialiŋnaŋiññiḷḷu Jew-guruat.

⁴⁸ Tavra aitchuutiginniktuam piqatini nalunaiñŋutaksriñŋagai, uqallakłuni, Tavrauniaqtuq iñuk kisu kunikkupku, tigusaġiksi.

⁴⁹ Tavra Judas qaiŋaruq Jesus-mun tavrauvvaa aasii uqallakłuni, Tutqigiñ Iḷisaurrii, aasii kunikł̣ugu.

⁵⁰ Jesus uqallaŋaruq ilaanun, Avilaitqaan, piñasuaġuŋ piyaqtukkan. Tavra iliŋich qaivḷutiŋ tigguġluŋagaat Jesus.

⁵¹ Tavrali iḷaŋata taapkua tuvaaqatauruat Jesus-mun amuŋagaa savikpani, aasii anauvlugu kivgaŋa aŋaiyyuliqsiqpaich qaukłiata, aasii siutaiqł̣ugu.

⁵² Tavrani Jesus uqallautiŋagaa, Utiqtirruŋ savikpaiñ puuŋanun, qanuq tamatkua iluqaġmiŋ savikpagaqtuat tuquniaqtut savikpakun.

⁵³ Isumavich ikayuqtaiḷiqiyumiñaiññasugaluŋa Aapamnun, aasii ilaa tavrauvvaa tilisiḷuni uvamnun qulit malġugnik 6,000-gullaaruanik isaġulignik.

⁵⁴ Aglaan taamna tainna pigaluaqpan qanuġlutiŋ Bible uqaluŋich taŋŋiġñiaqpat, uqaluqaqtuat aitchuutauniaġnivḷuŋa.

⁵⁵ Tavrani Jesus uqallautiŋagai iñusalaich, Qaiŋavisi tigligayuktimik pisaġmatun, savikpagnik anauttaniglu satkuqaqłusi tigusaqtuqłuŋa? Uvlumiñ uvlumun aquppigaluaġaqtuŋa aŋaiyyuvikpaŋmi iḷisaurrivḷuŋa, aasii tigguġlulaitkivsiŋa.

⁵⁶ Aglaan tamarra tamatkua pirraqsirut Bible uqaluŋich uqaqtiŋigun God-im taŋŋiqsautquvlugich. Tavrani iluqaġmiŋ iḷitchitqurat qimaŋagaat aasii pigruqłutiŋ.

Jesus Apiqsruqtuġaat Uqaqsitaaġviŋmi

⁵⁷ Tavrani taapkua tiguriruat Jesus-mik aullautiŋagaat Caiaphas-mun, aŋaiyyuliqsiqpaich qaukłiannun, iḷisaurriḷḷu pitquranik, umialiŋnallu katirviannun.

⁵⁸ Tavra Peter-m maliŋagaa uŋasiuraaqługu, siḷalliġuaŋanunaglaan inaanun aŋaiyyuliqsiqpaich qaukłiata aasii isiqłuni ilaan aquptaaqatigiŋagai munaqsrich qiñiġukłuni isuanunaglaan.

⁵⁹ Tavra aŋaiyyuliqsiqpaiḷḷu iluqaġmiglu uqaqsitaaqtitchirit ivaqłiaŋarut patchisiksranik saglutigilugu uqautigisukługu Jesus, tuqutchukługu.

⁶⁰ Tavra paqillaiġutiŋarut pasikkutiksranik, qanutun iñugiaktigigaluaqtut saglutikun uqautiginniktuat ilaanik. Kiisaimmaa malġuk saavitpuk,

⁶¹ aasii uqallakłutiŋ, Uvvauna iñuk uqallaŋaruaq, Uvaŋa suksraunġiġumiñaġiga God-im aŋaiyyuvikpaŋa, aasii nappatqigḷugu uvluni piŋasuni.

⁶² Tavra aŋaiyyuliqsiqpaich qaukłiat makiłłuni uqallaŋaruq Jesus-mun, Kiggutiksraitpich sumik ukuak iññuk uqautikkutaagnik ilipkun?

⁶³ Tavra Jesus nipaiñŋaruq. Tavra aŋaiyyuliqsiqpaich qaukłiata uqallautiŋagaa, Apiġipiaġikpiñ sivuġaani iñuuruam God-im, uqallauttutigut Christ-guvich, Iġñiŋa God-im?

⁶⁴ Jesus kiuŋagaa, Uqallaaniktutin tainna. Aglaan uqallautigivsi qakugukpan tautugniaġiksi Iġñiŋa Iñuum aquppiruaq taliqpiata tuŋaani Sapiġñaqtuam, aasii qaimmiḷuni nuvuyaŋigun qiḷaum.

⁶⁵ Tavrani aŋaiyyuliqsiqpaum aligaaŋagaa annuġaani, aasii uqallakłuni, Inmiñik iḷiuqtuq God-itun. Iñuvsaanik pasiññiktuksranik ilaanik piqaqtuksrauŋaiqsugut. Ilivsi paŋmapak tusaaganikkiksi uqamaqłuutaa.

⁶⁶ Qanuq sivunniivisi? Ilaisa kiuŋagaat, Tuquruksraġuqtuq.

⁶⁷ Tavrani tivvuaqturraqsiŋagaat kiiñaŋagun, qakiqsimmaan, suli iḷaŋisa iqsraaqsimmaan,

⁶⁸ uqaqłutiŋ, Nalautchaġiñ, Christ-guruatiin, kia qakiqpatin?

Peter-m Piiḷaaġigaa Jesus

⁶⁹ Tavrali Peter aquppiŋaruq siḷalliġmi. Aasii aŋaiyyuliqsiqpaich qaukłiata niviaqsiaq kivgaŋa ullakługu Peter uqallautiŋagaa, Itqatigiŋammigiñ Jesus Galilee-ġmiu.

⁷⁰ Peter piiḷaaŋaruq takkuanni iluqaġmiŋ, uqallakłuni, Naluruŋa sumik uqautiqaqtilaavsiññik.

⁷¹ Tavra ilaa animman qanitchaġuanun, allam niviaqsiam kivgam tautuŋagaa, aasii uqallautivlugich tamaani makitaruat, Uvvauna iñuk piqatauruaq Jesus-mun Nazareth-miumun.

⁷² Tavra Peter piiḷaatqiŋaruq suaŋasivḷugu, Nalugiga iñuk.

⁷³ Akkulivsaallagman tamaani makitaruat ullakługu uqallautilgitkaat Peter, Nalupqinaitchuamik iḷagigaatin taapkua, qanuq uvva uqausipkun iḷisimanaqtutin.

⁷⁴ Tavra Peter suammakłuni uqallaŋaruq, God-im tatavsaġliŋa uqaŋitkuma iḷumun ittuamik. Nalugiga kiutilaaŋa iñuk uqautigikkaqsi. Aasii tavrauvvaa tiŋmiaq nipanŋaruq.

⁷⁵ Tavra Peter itqaiŋaruq Jesus uqallautiŋiñik inmiñun inna, Tiŋmiaq nipanŋaunnagu, piiḷaaġiniaġiŋma piŋasuni. Tavra anivḷuni qiaqpaŋaruq.