Matthew 25 - Iñupiatun Mumiksat Uqalugiksuat

Uuktuun Qulitigun Niviaqsiatigun

¹ Taivrumani uvlumi, iñuich atanniqsimapkaqtuat Taavrumuŋa qiḷaŋmiittuamun inniaqtut qulitun niviaqsiatun, tiguvlugich qullisiŋ aullaqtuatun paaqsaqługu uiksraun.

² Tallimat taapkunani isumatupiaŋitchuat, aasii tallimattauq isumaturuaguvlutiŋ.

³ Isumatupiaŋitchuat pikamisigiŋ qullisiŋ, uqsritqiutiksraiḷaġniqsut.

⁴ Aglaan isumaturualli uqsritqiutiksraligaaġniġaich qullisiŋ.

⁵ Tavra uiksraun qaiḷḷaiġutipkaqługu niviaqsiat nayaŋaġaluaqamiŋ siquŋarut.

⁶ Tavra unnuaq qitiqqaġman nivliqsut, Marra uiksraun. Qaisitchi paaqsiuŋ.

⁷ Tavra qulit niviaqsiat iluqaġmiŋ makinŋarut aasii tatqikł̣ugich qullisiŋ.

⁸ Tavra isumatupiaŋitchuat uqallaŋarut isumaturuanun, uqsriutiksritchigut. Qullivut marra qamiaqsirut.

⁹ Isumaturuagutiŋisa kiugiññaŋagaich, Iḷaanniuvagut naamaniaŋitkisiuraaġmiugut uvaptiŋnullu ilivsiññullu. Aullaqsiññaġitchi tuniaksraliŋnun aasii tauqsiġḷusi uqsruksravsiññik.

¹⁰ Tavra isumatupiaŋitchuat niviaqsiat tauqsiġiaqtillugich uqsriutiksramiŋnik uiksraun qaiŋaruq, aasii taapkua tallimat itqanaitchuat isumaturuat isiqatigillaksiññaqługu katirrusiqinikun niqinaqiniaqtuanun, aasii upkuaq umikługu.

¹¹ Aquvatigulli alġaiŋich niviaqsiat qaiŋammiut. Ququulaŋarut, Ataniiq, Ataniiq, upkuiġutisigut.

¹² Ilaan kiuŋagai, Nalupiaġivsi.

¹³ Tavra Jesus uqallaŋaruq, Quviqtaiḷisitchi, qanuq nalugiksi uvluq naagga ikarraq Iġñiŋan Iñuum qaġġiviksraŋa.

Uuktuun Piŋasutigun Kivgatigun

¹⁴ Taivrumani uvlumi, iñuich atanniqsimapkaqtuat Taavrumuŋa qiḷaŋmiittuamun inniaqtut kivgaŋisun iñuum aullaaqsiruam. Qaitquŋagai kivgani aasii qaunaksriḷiutivlugich suġauttamiñun.

¹⁵ Iñullaa aitchuŋagaa piḷḷatilaallaaŋatun. Atausiq kivgaq aitchuŋagaa 5,000 taalanik. Tuglia aitchuŋagaa 2,000 taalanik. Aasii allasuli 1,000 taalanik. Aasii aullaqłuni.

¹⁶ Taamna kivgaq aitchuusiaqaqtuaq 5,000 taalanik aullaqłuni tavrauvvaa tauqsiġñiutigiŋagai manniusiani, aasii piññautigivlugich 5,000 taalavsaanik.

¹⁷ Tainnatuttauq, taamna tugliuruaq kivgaq aitchuusiaqaqtuaq 2,000 taalanik piññaŋaruq 2,000 taalavsaanik.

¹⁸ Aglaan taamna kivgaq aitchuusiaqaŋaruaq 1,000 taalanik aullaŋaruq, nivakługu nuna iriŋagai ataniġmi maniŋi.

¹⁹ Tavra sulluataġman atanġat taapkua kivgat utiŋaruq aasii makpiġarriqutiaqsivḷugich.

²⁰ Tavra taamna kivgaq aitchuusiaqaŋaruaq 5,000 taalanik saavinŋaruq, qaitchivḷugu 5,000 taalavsaanik. Ataniiq, qaitchiŋakkaġma 5,000 taalanik, uvva piññavsaaqtuŋa 5,000 taalavsaanik.

²¹ Ilaan atanġata uqallautiŋagaa, Piḷḷuataqtutin, nakuuruatiin ukpiġnaqtuatiillu kivgaaq. Ukpiġnaŋarutin aŋalatchiñipkun manił̣auranik, inillagniaġikpiñ aŋalatchiḷḷasiḷutin manisalagnik. Qaiḷutin quviasuqatigiyaqtuŋŋa.

²² Aasiivsauq taamna kivgaq aitchuusiaqaŋaruaġli 2,000 taalanik saavinŋammiuq. Ataniiq, qaitchiŋagiŋma 2,000 taalanik. Uvva piññavsaaqtuŋa 2,000 taalavsaanik.

²³ Atanġata uqallautiŋagaa, Piḷḷuataġniqsutin, nakuuruatiin ukpiġnaqtuatiillu kivgaaq. Ukpiġnaŋarutin aŋalatchiñipkun manił̣auranik, inillagniaġikpiñ aŋalatchiḷḷasiḷutin manisalagnik. Qaiḷutin quviasuqatigiyaqtuŋŋa.

²⁴ Tavrali kivgaq aitchuusiaqaŋaruaq 1,000 taalanik saavinŋammiuq, aasii uqallakłuni, Ataniiq, iḷisimagikpiñ suamaruatiin iñuk, kivrisuuvlutin palauvaksranik nautchirriġvigiŋaisaġnun, katitchisuuvlutillu palauvaksranik kanġaqsruivigiŋisaġniñ.

²⁵ Tavraasii sivuuġavluŋa aullaŋaruŋa, aasii iriqługich manisalaktin nunamun. Uvva pisin pigigitin.

²⁶ Tavra atanġata kiuŋagaa, Piḷuktuatiin iqiasuuruatillu kivgaaq. Iḷisimaŋagaluaqtutin kivrisuutilaamnik nautchirriġvigiŋaisamnun, suli katitchisuutilaamnik palauvaksranik kanġaqsruivigiŋisamnun.

²⁷ Tavra ilivich manitka ikiyumiñaŋagaluaġitin naggutinnagnaqtuamun maniqaġviŋmun, aasii qaiguma aitchuusiaqaġluŋa taapkuniŋa uvaŋa pimñik, naggutiŋiññiglu.

²⁸ Tavra pisigik taapkua manisalaich ilaaniñ, aasii aitchuutigilugich taavrumuŋa maniqaqtuamun 10,000 taalanik.

²⁹ Kiñaliqaa aŋalatchiḷḷuataqtuaq aitchuusiamiñik aitchuusiaqavsaaġniaqtuq, aasii sippaksraqaġmiḷuni. Aglaan taamna naurrutinnaŋitchuaq mikiruuraqunnii pigikkaŋa piiqsauniaqtuq ilaaniñ.

³⁰ Aasiiḷi una anniqsuutauŋitchuaq kivgaq igitchiuŋ taaġniqsramun. Tavrani iñuich qianiaqtut tiriqtinniaġaiḷḷu kigutitiŋ.

Nation-guruat Isivġiusiaksraŋat

³¹ Tavra Iġñiŋa Iñuum qaikpan umialiguġluni, piqatigilugich iluqaisa isaġulgich, tavrani ilaa aquvinniaqtuq kamanaqtuani umialgunikun aquppiutamiñi.

³² Nation-guruat iñupayaat sivuġaanun katinniaqtut, aasii ilaan aviŋniaġai imnaiḷiqiri avgiruatun imnaiñik imnaiñiñ nagruliŋniñ,

³³ Aasii ilaan inillagniaġai imnaich taliqpiŋmi tuŋaanun, aglaalli nagruqaqtuat saumiŋmi tuŋaanun.

³⁴ Tavrani Umialik uqallagniaqtuq taapkunuŋa taliqpiŋmi tuŋaaniittuanun, Qaisitchi, iviġaumakkusiaqaqtuasii Aapamniñ, kiŋuvaannaktaaġisiuŋ God-im atanniqsimavia ini itqanaiyaaguruaq ilivsiññun nunaqaŋa savaagumman.

³⁵ Qanuq kaaktuaguŋaruŋa aasii niqiksriñŋagivsiŋa. Imiġuksiuŋaruŋa aasii imiksriñŋagivsiŋa. Iglaaguŋammiuŋa aasii paġlaŋagivsiŋa aimaaġvivsiññun.

³⁶ Annuġaagiñŋaruŋa aasii annuġaaqtinŋagivsiŋa. Naŋinŋaruŋa aasii qaunagiŋagivsiŋa. Tigutaaġviŋmiinŋaruŋa aasii ullaŋagivsiŋa.

³⁷ Tavrani iñuich nalaunŋaruat kiuniaġaat, Ataniiq, qaŋa tautuŋavisigiñ kaakavich aasii niġipkaqłutin, naagga imiġuktillutin aasii imiqtiłłutin?

³⁸ Suli qaŋa tautuŋavisigiñ iglaagukavich aasii paġlavlutin aimaaġvivsiŋñun, naagga annuġaaksraiññavich aasii annuġaaqłutin?

³⁹ Suli qaŋa tautuŋavisigiñ naŋinnavich naagga tigutaaġviŋmi innavich, aasii takuvlutin?

⁴⁰ Tavrali Umialgum kiuniaġai, Iḷumun uqallautigivsi, savaaġikavsiuŋ atautchimununnii naglignaġniqsramun makua aniqatiima iḷaŋannun, ilivsi savaaġiŋagiksi uvamnun.

⁴¹ Tavraliasii ilaan uqallautiniaġai taapkua saumiŋmi tuŋaanniittuat, Aullaġitchi uvamniñ, ilivsi suksraunġiqsauniaqtuasii isuitchuamun igniġmun itqanaiyaaguŋaruamun Tuunġaġmun, isaġuliŋiñullu.

⁴² Qanuq kaaktuaguŋaruŋa aasii aitchuŋaitkivsiŋa niqimik, Imiġuksiuŋammiuŋa aasii aitchuŋaitkivsiŋa imiksramnik.

⁴³ Iglaaguŋagaluaqtuŋa paġlaŋaitkivsiŋa aimaaġvivsiññun. Annuġaagiḷḷiuŋaruŋa annuġaaksriñŋiñmigivsiŋa. Naŋinŋaruŋa, tigutaaġviŋmiinŋaruŋalu aasii takuŋaitkivsiŋa.

⁴⁴ Tavraptauq iliŋisa kiuniaġaat, Ataniiq, qaŋa tautuŋavisigiñ kaaktillutin naagga imiġuksiupkaqłutin naagga iglaagupkaqłutin annuġaaksraisillutin naagga naŋinnavich, naagga tigutaaġviŋmi innavich aasii ikayuŋił̣ł̣utin?

⁴⁵ Tavra umialgum kiuniaġai, Iḷumun uqallautigivsi, ikayuġuŋiññavsiuŋ atausiqunnii makua iḷaŋat naglignaqtuat, ikayuġuŋiñŋagivsiŋa.

⁴⁶ Tavra iliŋich tatavsaqtauniaqtut isuitchuamun, aglaalli nalaunŋaruat isuitchuamun iñuuniaqtut.