Matthew 24 - Iñupiatun Mumiksat Uqalugiksuat

Jesus Uqautigigaa Suksraunġiqsauniksraŋa Aŋaiyyuvikpaum

¹ Jesus qimaaqsimmagu aŋaiyyuvikpak, iḷitchitquraisa qaivḷutiŋ uvyaqiŋagaat aŋaiyyuvikpaum iniŋiññik.

² Tavra ilaan uqallautiŋagai, Tamarra tautukpisigik tamatkua iluqaisa? Iḷumun uqallautigivsi, uyaġaqaġumiñaitchuq atautchimikunnii qalliqaqtuamiktauq allamik uyaġagmik ulġutauyumiñaitchuamik.

Iłuiḷḷiuġutit Nagliksaaqtirrusiallu

³ Tavra Jesus aquppipkaqtillugu Iġġiani Olives, iḷitchitqurat ullaŋagaat iñuił̣aami uqaqłutiŋ, Uqallauttutigut, qakugu taamna piñiaqpa aŋaiyyuvikpaŋmun? Suli sumik nalunaiñŋutaqaġniaqpa qaiñiksran, isuksraŋalu nunam?

⁴ Tavra Jesus kiuŋagai, Qaunagisitchi sagluqipkaġnasi.

⁵ Qanuq iñugiaktuat iñuich qaiñiaqtut uvaŋauŋŋuaqtuat uqaġlutiŋ Uvaŋa Christ-guruŋa, aasii iñugiaktuat sagluqilugich.

⁶ Tusaaguvsi aŋuyaktuanik, qanitkaluaqpata naagga uŋasikkaluaqpata, iłuiḷḷiuġutiginagich. Tamatkua piruksraurut, aglaan sivuniġiŋitkaat isuksraq tikiññiḷugu.

⁷ Nunauruat aŋuyagniaqtut allanun nunauruanun. Suli umialiqaqtuat aŋuyagniaqtut allanun umialiqaqtuanun. Nunasuli aularaġaġniaqtuq sumipayaaq, iñuiḷḷu paniġniaqtut niqaiḷḷiuġlutiŋ.

⁸ Tamarra tamatkua aullaqisaaŋich isumaaġutit piruksrauruat Christ-guruaq qaiŋaiñŋaan.

⁹ Tavraasii iñuich tigutaaġniaġaasi tatavsaqtautqulusi, tuqullusiḷu. Suli iñupayaat uumiginiaġaasi pisigiluŋa.

¹⁰ Tavraasii iñugiaktuat iñuich ukpiġutaiġñiaqtut, suli aitchuutigiraġautilutiŋ avanmun, uumikkutiliġḷutiglu avanmun.

¹¹ Aasiivsauq iñugiaktuat uqaqtauŋŋuaqtuat God-mun iñukpalliġñiaġmiut aasii sagluqilugich iñugiaktuat iñuich.

¹² Suli pisigilugu piḷuusiqutim iñugiaksiñiŋa, iñugiaktuat iñuich piviuttaqqutaiqsaiññaġniaqtut.

¹³ Aglaan iñuk igḷutuutiruaq nagliksaaqtitauniġmik iñuuniqtutilaamisun, annaurrauniaqtuq.

¹⁴ Aasii manna tusaayugaaġiksuaq God-im atanniqsimmataa iñuŋnun alġaqsruutauniaqtuq iluqaani nunapayaami, quliaqtuaguluni nunapayaanun, aasii tavrani nunam isua tikiññiaqtuq.

Naġġutchautiqpak

¹⁵ Taiguaqtuaq iñuk ukuniŋa kaŋiqsiḷi. Tautugniaġiksi naġġutchagnapiaġataqtuaq salumaiḷḷisauluni inillaummiruaq aŋaiyyuvikpaŋmi iniksraġiŋisamiñi, Daniel-gum uqaqtaata God-im uqautigiŋakkaŋa.

¹⁶ Tautukkuvsiuŋ taamna, tavrani tamatkua Judea-miittuat pigruġlich iġġiñun.

¹⁷ Iñuksuli aniiqsuaqtuaq iglumi qaaŋani iñaviqqutchiġñani atqaġumi saagaksraisuqsaġluni sumik iglumi iḷuaniñ.

¹⁸ Aasiivsauq iñuk nautchiaqaġviŋmi savaktuaq iglumiñuŋnani saakkiutiyaqtuġuglugu annuġaani.

¹⁹ Taipkua uvlut tikitpata, yaqhiikkaluaq aġnaq siŋaiyauniġumi, miqłiqtuuraqaqtuaġlu piḷgusiŋaitchuanik.

²⁰ Aŋaiyyusitchi pigruġniksraqsi ukiukuaquŋiḷḷugu naagga Savaiññikun.

²¹ Taipkunanikiataŋ uvluni iñuich nagliksaałhamaaġniaqtut qaŋapaŋmiñ God-imqaŋa savaŋmagu nuna. Aasii tainnatun nagliksaaqtigitqikkumiñaiñmiut aquagun taavruma.

²² Aasii Atanġum iñukłiḷaaŋisuaqpagich taipkua uvlut, kiñaliqaa iñuuyumiñaitchuq. Aglaan pisigilugich God-im piksraqtaani ilaan iñukłiḷaaġniaġai uvlut.

²³ Tavraasii kialiqaa uqallautikpasi inna, Tautuksiuŋ, uvva Christ, naagga, Ikka ikaniittuq, ukpiġinagu.

²⁴ Qanuq Christ-guŋŋuaqtuat uqaqtauŋŋuaqtuallu God-mun iñukpalliġñiaqtut savaglutiŋ aliuġnaqtuanik kamanaqtuanik nalupqinaiġñiaqługu kiutilaaqtiŋ, asiñuutiniaqsaalugich God-im piksraqtaaŋi, sagluqiyumiñaġumisigik.

²⁵ Uvva, kilikkivsi piyumaaqtuat sivuanni.

²⁶ Tavraasii iñuich uqallautikpasi, Amma, Christ nunagluktuamiittuq, ullaksaalugnagu. Uqallakpata, Amma, iriqsimaruq uvani, ukpiġinagu.

²⁷ Qanuq Iġñiŋa Iñuum qaiñiaqtuq igniġuuqpatittuatun paaŋŋamiñ, aasii qaummaġiksivḷugu ualiñaaq.

²⁸ Sumipayaaq siḷu itpan, tavrani inniaġmiut tiŋmiaqpaich kasimalutiŋ.

Qaiñiksraŋa Iġñiŋata Iñuum

²⁹ Tavra taipkunani uvluni, pianikpan taamna iłuiḷḷiuġutiqpak, siqiñiq taaqsiñiaqtuq, tatqiġḷu qaummaġiŋaiġñiaqtuq. Suli uvluġiat katagniaqtut, suli qaummatit siḷamiittuat uniuqtinniaqtut inimiŋniñ.

³⁰ Tavrani nalunaiñŋutaŋa Iġñiŋata Iñuum niptaġniaqtuq qiḷaŋmi. Tavraniasii iluqaġmiŋ iñupayaaŋi nunam isumaaqpagniaqtut, tautukkumirruŋ Iġñiŋa Iñuum qairuaq nuvuyaŋigun qiḷaum, suaŋŋatiqaġluni qaumaniqpaqaġluniḷu.

³¹ Aasii kamanaqtuaq nipauqłuktaun nivliqpan atautchimuquriḷuni, ilaan tiliñiaġai isaġuliŋni, aasii ilaisa katinniaġaich ilaan piksraqtaaŋi sumiḷḷiqaa nunapayauraniñ.

Iḷisaksraq Fig Napaaqtumiñ

³² Fig-nik siiġñaqaqtuamiñ napaaqtumiñ iḷitchisitchi. Qisiqsiutiŋi qituglimmata, akutuqpalivḷuniḷu, iḷisimarusi upinġam qallisilaaŋanik.

³³ Tavra ilivsi tainnatuttauq tautukkuvsigik tamatkua nalaurraqsikpata, iḷisimaniaqtusi Iġñiŋa Iñuum qallisilaaŋanik qallipiaġataqłuni.

³⁴ Iḷumun uqallautigivsi, ukua iñuich tuquanigniaŋitchut iluqaisa tamatkua nalaunŋaunnagich.

³⁵ Qiḷaglu nunalu piiġñiaqtuk, aglaan uqalutka piiġumiñaitchut.

Iñupayauram Nalugaa Uvluq Ikarraġlu

³⁶ Iñupayaam nalugaa taimña uvluq ikarraġlu tamatkua nalaurviksrautaat. Isaġulgitchunnii qiḷaŋmiittuat, Iġñiŋatalu Iñuum, nalugaat. Aapam kisimi iḷisimagaa.

³⁷ Iñuich iñuuniaġusiatiktun Noah iñuumman, iñuich iñuusiqaġniaġmiut Iġñiŋa Iñuum qaikpan.

³⁸ Qanuq taipkunani uvluni sivuani uliqpaum iñuich niġigayuktut, imiġayuktullu, katirrusiqisuurullu, uvlumunaglaan Noah-m isiġvianun umiaqpaŋmun,

³⁹ sumik naluŋarut piyumaaqtuamik uliqpaŋmun, pisaġilġataqtillutiŋ iluqaġmiŋ. Tainnatun inniaqtuq qaiñiŋa Iġñiŋata Iñuum.

⁴⁰ Tavra iññuk malġuk nautchiaqaġviŋmiinniaqtuk, igḷua tigurauniaqtuq, aasii igḷua qimaktauluni.

⁴¹ Aġnak malġuk palauvaksriuġniaqtuk palauvviviŋmi, igḷua tigurauniaqtuq, aasii igḷua qimaktauluni.

⁴² Quviqtaiḷisitchiasii, qanuq iḷisimaŋitchusi uvluanik Atanivsi qaġġiviksraŋan.

⁴³ Aglaan iḷisimalugu una. Igluqpiraqti iḷisimaŋagumi suqpatigun unnuami tigligayuktim qaiñiaqtilaaŋanik, siqunayaitchuq, aasii igluni tigligayuktimun siqumutiluni isiqtinŋiḷḷugu.

⁴⁴ Tavraptauq ilivsi itqanaitchuksraummiusi, qanuq Iġñiŋa Iñuum qaiñiaqtuq ikarrami niġiugvigiŋisavsiññi.

Ukpiġnaqtuaq Naagga Ukpiġnaitchuaq Kivgaq

⁴⁵ Kiuniaqpaasii ukpiġnaqtuaguvluni isumaturuaguvluniḷu kivgaq? Taamnauniaqtuq kivgaq atanġata qaukłiḷiutiniakkaŋa allanun kivganun niqiksritqulutiŋ piñaqsikpan.

⁴⁶ Quviasugli taamna kivgaq atanġata qaigumi paqinniaqtaŋa tainna savaktuagulugu.

⁴⁷ Iḷumun uqallautigivsi, ilaan atanniutiniaġaa iluqaiññun suġaliġmiñun.

⁴⁸ Aglaan taamna piḷuktuaq kivgaq isumaaqsigumi inna, Ataniġaimña qaiḷḷaiġutiruq,

⁴⁹ aasii anaumiaqsiḷugich kivgauqatini, niġimmiuquvva imiqatigivlugiḷḷu imiqtit,

⁵⁰ atanġa taavruma kivgam qaiñiaqtuq uvlumi niġiugiŋisilluni ilaanun, ikarramiḷu nalukkaŋani.

⁵¹ Aasii atanġata qaigumi tatavsapiaġataġniaġaa, piqasiutilugu ukpiŋŋuaqtuanun. Tavrani iñuich qianiaqtut tiriqtinniaġaiḷḷu kigutitiŋ.