Matthew 23 - Iñupiatun Mumiksat Uqalugiksuat

Jesus Kiliktuutigigai Iḷisaurrit Pitquranik Pharisees-lu

¹ Tavra Jesus uqallaŋaruq iñusalaŋnun iḷitchitquramiñullu,

² Iḷisaurrit pitquranik Pharisees-lu ataniġnaqutiqaqtut iḷisaurriyumiñaqłutiŋ pitquranik qaisauruanik Moses-kun,

³ tavraasii kamagiraksraġigisi tuvraġlugiḷḷu supayaanik iḷisautikpasi. Aglaan pisuŋaġnasi piraŋiññik, qanuq alġaqsruisuugaluaqtut tuvralaitkaich alġaqsruutitiŋ.

⁴ Iḷisaurrisuurut God-im pitquraŋiñik siġḷiġnaqsivḷugich iñuŋnun kamaksriñiksraŋat iluqaiññik, ikayuġniaġnagich suuramikunnii kamagitqulugich God-im pitquraŋi. Ikayulaitkaich.

⁵ Iliŋich piut iluqaiññik tautuqusaaqsiññaqłutiŋ iñuŋnun. Tautuksigik qanutun aŋitigirut qauġmiutaŋich taliġmiutaŋiḷḷu kiguunnaurat imaqaqtuat Bible uqaluuraŋiññik. Qanutun niviŋaniqtutigimmiut nigraŋich akuŋiññi tautuqusaaqłutiŋ kamaginiḷugich God-im pitquraŋi.

⁶ Suli inigillatugaich kamanaqtuat aquppiutat niqinaqimmata, salliġñiglu aquppiutaksrallatummiut aŋaiyyuviŋñi.

⁷ Suli paġlatquturullu kasimmaviŋñi inini, suli taitqusuurut iḷisaurriñik iñuŋnun.

⁸ Aglaan ilivsi inniaŋitchusi iliŋisitun. Tairauniaŋitchusi iḷisaurriñik, qanuq atautchimik iḷisaurriqaqtusi, aasii ilivsi iluqasi aniqatigiiksusi.

⁹ Suli tuqłuġnagu iñupayaaq aapavsiññik nunami, qanuq atautchimik Aapaqaqtusi, qiḷaŋmiittuamik.

¹⁰ Naaggaunnii tairaunasi aullarriñik, qanuq atausiuruq aullarriksi, Christ-guruaq.

¹¹ Iñuk kamanaġniqsrauruaq akunnavsiññi kivgaġiniaġiksi.

¹² Kiñaliqaa kamanaqsiḷiqtuaq inmiñik kamanaiqsauniaqtuq, suli kiñaliqaa kamasaaŋitchuaq inmiñi kamanaqsiḷiqtauniaqtuq.

Jesus Suakkai Ukpiŋŋuaġniŋatigun

¹³ Qanutun naglignaqtigirusi ilivsi, iḷisaurriich pitquranik Pharisees-lu, ukpiŋŋuaqtuasii. Ittusi pitchiġiiyaqsimammatun upkuaŋa atanniqsimaviata Taavruma qiḷaŋmiittuam, qanuq ilivsi atanniqsimatquŋitchusi God-mun, suli iñuich atanniqsimatqugaluaqtuat pitchaiḷiraġisi.

¹⁴ [Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii. Qanuq ivayaqtuġuugisi uiḷgaŋaruat, tigligaivḷugiḷḷu igluŋiññik, aasii taimma maniugaqsivḷusi nakuurualivḷusi takiruanik aŋaiyyuvlusi. Taamna pisigilugu, tatavsausiaksraqsi pigiił̣haaġniaqtuq.]

¹⁵ Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii, qanuq kukiḷuktusi immakullu nunakullu atausiuramik-unnii mumiksitchisukłusi. Aasii mumiksitanikavsiuŋ, ilivsi pasirauyumiñaqsiḷaavsaaqsiññaġiksi nagliksaaġviŋmuŋniksramun ilivsisuttauq.

¹⁶ Qanutun naglignaqtigirusi ilivsi, ayauŋaruatun aullarrit. Iḷisaurrisuurusi kiñaliqaa unniqsuqłiigumi ukpiġnaqsiḷiġlugu atuġlugu uqaluk aŋaiyyuvikpak, pasiñaġumiñaiññivḷugu taŋŋiŋitpagu unniqsuqłiisini. Suli iḷisaurrimmiusi kiñaliqaa aŋiuqsiyumiñaiññivḷugu unniqsuqłiiñmiñik atuqpagu uqaluk manik kaviqsuaq suġauttaġikkaŋa aŋaiyyuvikpaum.

¹⁷ Ilivsi isumalluaġiitchuasii. Sivuniqsiḷguitkisi iḷisaurrutisi. Nalliak naumałhaaqpa? Manik kaviqsuaq naagga aŋaiyyuvikpak maniŋmik kaviqsuamik ilaaguaqsiḷḷaruaq God-mun?

¹⁸ Aasii iḷisaurrisuummiusisuli, Iñuk kiñaliqaa unniqsuqłiikpan ukpiġnaqsiḷiġlugu atuġlugu uqaluk ikipkaivik, pasiñaġumiñaiññivḷugu taŋŋiŋitpagu unniqsuqłiisini. Suli iḷisaurrimmiusi kiñaliqaa aŋiuqsiyumiñaiññivḷugu unniqsuqłiunmiñik atuqpagu uqaluk, aitchuutauruq ikipkaiviŋmi.

¹⁹ Qanutun sivuniqsiḷguisigirusi iḷisaurrutivsiññik. Nalliak naumałhaaqpa? Aitchuun naagga ikipkaivik ilaaguaqsiḷḷaruaq aitchuunmik God-mun?

²⁰ Tavraasii iñuum atuqamiuŋ uqaluk ikipkaivik unniqsuqłiikami, tasamma taputigai aitchuutit ikipkaiviŋmiittuat.

²¹ Suli iñuum unniqsuqłiikami atuqługu uqaluk aŋaiyyuvikpak, taputimmigaa God ittuaq tavrani.

²² Suli iñuum unniqsuqłiikami atuqługu uqaluk qiḷak, unniqsuqłiiruq taputivlugu God-im aquppiutaŋa taamnalu aquppiruaq tavrani.

²³ Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii. Ilivsi quliŋŋuġutiŋiññik mikiniqsraqpiatchiat nauriavsi niġiñaqtuat aitchuisuurusi God-mun, aasii kamagiŋił̣ł̣ugich naumałhaaqtuat iḷisaurrutiŋich pitqurat, pitqiksiġautairrun nagliktuullu, ukpiġnaullu. Taapkua piraksraġiŋagaluaġisi, allallu tamatkua piḷugich.

²⁴ Piḷġusiqsi tainnainman, iñuktun ittusi imiksriuqtuatun qupilġuiyautituġniallaan aasii iivḷugu pikukturuaq kakakti. Iḷumun ayauŋarusi aullarrit.

²⁵ Qanutun naglignaqtigirusi ilivsi iḷisaurriich pitquranik, Pharisees-lu, ukpiŋŋuaqtuasii. Qanuq ittusi qallugauratun puggutauratullu salummaqtauruatun qaałhiñaŋich, iḷuvsiññi imaqallavsi salumaitchuamik ivayaqtuunmik piḷḷatunmiglu.

²⁶ Ilivsi ayauŋaruasii Pharisees, salummaqqaaqsiuŋ iḷua qallugauram, aasii siḷataa salumaniaġmiuq.

²⁷ Qanutun naglignaqtigirusi ilivsi iḷisaurriich pitquranik Pharisees-lu, ukpiŋŋuaqtuasii. Qanuq ittusi qatiqsaqtatun iḷuvviviksun, siḷatiŋich qiñiyunaqsaqługich, aasii iḷuanni siḷivinŋavlutiŋ iḷuvġich sauniŋiññik iluqaaniglu auruamik.

²⁸ Tavraptauq ilivsi qaałhiñavsigun qiññaqaġmiusi nalaunŋaruaguvlusi iñuŋnun, aasii iḷuvsiññi siḷivinŋarusi ukpiŋŋuaġutinik piḷuutiniglu.

Jesus Uqautigigaa Tatavsausiaksrautaat

²⁹ Qanutun naglignaqtigirusi ilivsi iḷisaurrit pitquranik, Pharisees-lu, ukpiŋŋuaqtuasii. Qanuq iḷuvviviḷiuqtusi nakuusivḷugich uqaqtiŋiñun God-im, suli qiñiyunaqsaqługich nappaqutaŋich iñuich nalaunŋaruat,

³⁰ uqaqłusi, Iñuuqatauŋagupta taimani maŋŋuuptiŋnun, piqasiqsuutiyumiñaiñŋagaluaqtugut ilaiññun tuquġaiñiġmi uqaqtiŋiñik God-im.

³¹ Tainna uqaqavsi, ilivsiññik iḷaurualirusi maŋŋuuvsiññun iñuaqtuqtuanun uqaqtiŋiñik God-im.

³² Kiasii naatitchiuŋ maŋŋuuvsi aullaġniikkaŋat.

³³ Ilivsi nimiġiat. Ilivsi piayaaŋich tuqunaqaqtuat nimiġiat. Qanuġlugu naŋaġumiñaipiaġiksi nagliksaaġviŋmuktitauniksraq.

³⁴ Tavra uqallautigivsi. Tilisiñiaqtuŋa ilivsiññun uqaqtiŋiñik God-im isumaturuaniglu iñuŋnik, iḷisaurriñiglu. Iḷaŋich tuqunniaġisi kikiaktuutilugiḷḷu aŋarrauranun, aasiisuli iḷaŋich ipiġaqtuġniaġisi aŋaiyyuvivsiññi, suli pigruqtitaġlugich nunaaqqiñiñ nunaaqqiñun.

³⁵ Ilivsi iñuich tatavsaqtauyumausi iñuaqtuġnivsigun nalaunŋaruanik iñuŋnik iñuktauniŋaniñqaŋa patchisaitchuam Abel-gum iñuktauniŋanunaglaan Zechariah-m Barachiah-m iġñiŋata, iñuktaġikkavsi aŋaiyyuvikpaŋmi, akunġagni inivḷu ilaaguaqtauruam God-mun, ikipkaiviuvlu.

³⁶ Iḷumun uqallautigivsi, tamatkunuuna iluqaisigun tatavsaqtauniaqtusi ilivsi iñuuruasii paŋmapak.

Jesus Piviuttaġigaa Jerusalem

³⁷ Jerusalem-miut. Yaqhii Jerusalem-miuguruasii, tuquġairuasii uqaqtiŋiñik God-im, uyaġagniglu miḷḷuuqługich tamatkua God-im tiliraŋi ilivsiññun. Qanutun akulaisigilugu katitchumiñaġaluaġaġigivsi iluqasi atautchimun, tiŋmiatun katitchiruatun piayaamiñik isaqquŋmi ataaŋnun, aasii pisulaitchusi.

³⁸ Uvva, iglusi suksraaqtaupiallagniaqtut suġauttaiqsaulutiglu.

³⁹ Qanuq uqallautigivsi, taututqikkumiñaitkivsiŋa uqallakkumiñaqsiḷġataġlusi, God-im piḷḷuataqtilliuŋ iñuk qairuaq pisivlugu Ataniq.