Matthew 22 - Iñupiatun Mumiksat Uqalugiksuat

Uuktuun Katitirrusiqiruani Niqinaqiruanik

¹ Tavra Jesus uqarraqsitqiŋaruq uuktuutitigun iñuŋnun uqaqłuni,

² Atanniqsimmataa Taavruma qiḷaŋmiittuam arriliñaġumiñaqtuq umialiŋmun katirrusiqutikun niqinaqipkairuamun iġñiġmiñik.

³ Aasii tiliŋagai ilaan kivgani aiyugaaqtauŋaruat qaitquvlugich katirrusiqutikun niqinaqiruanun, aasii qaisuŋiñŋarut.

⁴ Tilisivsaaŋaruq allanik kivganik uqaqłuni, Uqallautiyumagisi tamatkua aiyugaaqtauruat, Uvva, itqanaiganikkiga niqinaqusiaġa, qimuktitka quiñiruallu tuttuqpaiyaagutitka tuqutaniktut, suli supayaaq itqanaiqsuq. Niqinaqiyyaġitchi katirrusiqiruanun.

⁵ Tavra aiyugaaqtauruat suliqutigiŋaitkaat aasii aullaqsiññaqłutiŋ, iḷaŋich nunamiŋnun, allattauq tauqsiġñiaġviŋmiŋnun.

⁶ Iḷaŋisuli tigguġluŋagaich kivgaŋi, anaumikł̣ugich, suli tuquġaqługich.

⁷ Umialik qinnaliŋaruq, aasii tilivḷugich aŋuyaktini tuquġaŋagaich taapkua iñuaqtit ikipkaqługulu iniqpaŋat.

⁸ Tavrani uqallautilgitkai kivgani, katirrusiqutiksraq itqanaiqsuq, aglaan taipkua aiyugaaqtauŋagaluaqtuat nalliummatiŋitchut.

⁹ Aullaġitchi apqutinun aasii aiyugaaqłiiḷusi katirrusiqutikun niqinaqunmun iñugiaktilaaŋisitun kasukkasi.

¹⁰ Tavra taapkua kivgat aullaŋarut apqutinun aasii katitchiaqsivḷutiŋ iluqaiññik kasukkaġmiŋnik, piḷuktuallu nakuuruallu ativlugich, tavraasi katirrusiqivik igluqpak inaiŋaruq aiyuġaaqtauruanik.

¹¹ Tavra umialgum isiqami qiñiġiaqługich aiyugaaqtauruat, tautuŋagaa iñuk tavrani katirrusiqutinik annuġaaŋaitchuaq.

¹² Aasii ilaan uqallautiŋagaa, Avilaitqaan, qanuqłutin isiqpich uvuŋa katirrusiqunmik annuġaaġaluaġnak. Tavra iñuum kiuŋiḷḷakkaa.

¹³ Tavrani umialik uqallaŋaruq kivganun, Qiḷiqsruqsiuŋ argaŋigun isigaŋigullu, aasii anillugu taaġniqsrauruamun. Tavrani taaġniqsrauruami iñuich qianiaqtut suli tiriqtinniaġaich kigutitiŋ.

¹⁴ Tavraasii Jesus uqallavsaaŋaruq iñugiaktuat aiyugaaqtaugaluaqtut atanniqsimatquvlugich Taavrumuŋa qiḷaŋmiittuamun, aglaan iñukitchuat piksraqtaagurut.

Apiqqun Akiḷiiñikun Taxes-nik

¹⁵ Tavrani Pharisees aullaqłutiŋ sivunniuŋarut uuktuġukługu Jesus apiqqutinik.

¹⁶ Tavra tilisiŋarut iḷaŋiññik iḷitchitquramiŋ ilaanun, piqasiqł̣ugich Herod-kuayaanik uqaqłutiŋ, Iḷisaurrii, iḷisimarugut pitqiksiġautaisilaaġnik, suli iḷisaurrirutin iḷumun ittuamik God-im pitqutaanik iñuŋmun suliqutigiugasuŋaġnagu qanuq iñuich isumaniaqtilaaŋat, qanuq piqutigiŋitkiñ iñuum surautilaaŋa.

¹⁷ Uqallauttutigut qanuq isumatilaaġnik. Paaqsaaŋava uvagut pitquraptiŋni naagga nalaunŋava akiḷiiruni taxes-nik Caesar-mun Rome-miut umialgannun?

¹⁸ Tavra Jesus, iḷisimavlugu pigiitchuakun sivunniuġutaat uqallaŋaruq, Summan uuktuqpisiŋa? Ukpiŋŋuaqtuasii.

¹⁹ Tautuktitchiŋa maniŋmik tax-iutiksramik. Tavra qaġġirriŋagaat maniuramik.

²⁰ Tavra Jesus apiġiŋagai, Kiñauna maniurami, atqalu?

²¹ Iliŋisa kiuŋagaat, Caesar. Tavrali Jesus uqallautiŋagai, aitchuutigisigik Caesar-mun sut pigikkaŋi Caesar-m aasii God-mun sut pigikkaŋi God-im.

²² Tusaakamirruŋ taamna, aliuŋarut, aasii qimakługu aullaŋarut.

Apiqqun Aŋŋisikun Tuqqunmiñ

²³ Taavrumani suli uvlumi Sadducees qaiŋarut Jesus-mun, uqaġuuruat aŋŋisaiññivḷugu, aasii apiġivlugu apiqqunmik.

²⁴ Iḷisaurrii, Moses iḷisaurriŋaruq inna, Iñuk tuqukpan miqłiqsigaluaġnani, aniqataanun tuvaaqasiutitquvlugu uiḷgaqtuaq, aasii qitunġiuġluni aniqatini pisilugu.

²⁵ Tavra tallimat malġuuŋarut aniqatigiich iñuuŋaruat akunnaptiŋni. Aŋayukłiq nuliaŋaruq aasii tuquvluni miqłiqsigaluaġnani, qimaŋagaa nuliani aniqanmiñun.

²⁶ Tuquŋammiuq suli tuglia, piŋayuaglu, kiisaimma tallimat malġuk aniqatigiich tuquvut.

²⁷ Taapkua iluqaġmiŋ kiŋuatigun aġnaq tuquŋaruq.

²⁸ Aŋŋiviŋmi, nallianun tallimat malġuuruat tuvaaqasiutiniaqpa? Iluqaġmiŋ tuvaaqatigianiŋagaat.

²⁹ Tavra Jesus kiuŋagai, Qanutun killukuaqtigirusi. Killukuaġutigigiksi naluvlugich Bible uqaluŋich, God-tivlu suaŋŋataa.

³⁰ Aŋigumiŋ tuqqunmiñ, aŋutillu aġnallu katitinniaŋitchut, aglaan inniaqtut isaġuliktitun qiḷaŋmiittuatun.

³¹ Aasii sivuniġilugu uqaqta tuquŋaruat aŋiñiaġniŋat. Taiguaŋaitpisi qaŋaunnii qanuq God-im uqaluanik ilivsiññun? Ilaa uqallaŋaruq,

³² Uvaŋa God-igigaaŋa Abraham, God-igigaaŋalu Isaac-gum, God-igimmigaaŋasuli Jacob-gum. Taapkua iñuich iñuurut suli. Ilaa God-auŋitchuq tuquruanun, aglaan God-igigaat iñuuruat.

³³ Tavra iñusalaich tusaakamirruŋ taamna kamasuuttaqaŋarut iḷisaurrutiŋiñik.

Qaukłiat Pitqurat

³⁴ Tavra Pharisees tusaakamiŋ Jesus-mun nipaiġiñivḷugich Sadducees, kasimaŋarut.

³⁵ Aasii iḷaŋata iḷisaurrauruam pitquranik apiġiŋagaa apiqqunmik uuktuaqsaqługu.

³⁶ Iḷisaurrii, nalliat qaukłiuva pitqurat iluqaiññiñ?

³⁷ Jesus kiuŋagaa, Piviuttaġipiaqsaġiñ Ataniq God-igikkan, piviuttaġilugu iḷuŋniñ, iluqaaniḷu iñuuniaġniġni, iluqaaniḷu isumaniġni.

³⁸ Taamna tavra kamanaġniqsraq pitquraq.

³⁹ Suli igḷua tainnainmiuq, Piviuttaġisaġiñ siḷalliñ iliktun iḷiḷugu.

⁴⁰ Iluqaġmiŋ pitqurat qaisauruat Moses-kun, iḷisaurrutiŋiḷḷu uqaqtiŋisa God-im kaŋiqaqtut taapkuŋniŋa malġugnik pitquragnik.

Apiqqun Messiah-kun

⁴¹ Tavra kasimapkaqługich Pharisees atautchimi, Jesus apiġiŋagai apiqqunmik.

⁴² Qanuq isummatigivisiuŋ Christ? Kia kiŋuniġivauŋ? Ilaisa kiuŋagaat, kiŋuniġigaa David-gum.

⁴³ Ilaan apiġiŋagai, Qanuqłunimi David, puttuqsripkaġmani ilitqusiġiksuam, tuqłuŋavauŋ Ataniġmiñik, uqaqłuni,

⁴⁴ “Ataniq uqallaŋaruq uvaŋa Atanimnun: Aquvittin taliqpiŋma tuŋaanun, uumigiritin uvamnun akiiḷitchiaġilugich.”

⁴⁵ Tavra tainna David ilaata taigaa Ataniġmiñik. Qanuqłuni Christ-guruaq David-gum taikkaŋa Ataniġmiñik kiŋuniġiyumiñaqpauŋ?

⁴⁶ Tavra nalliataunnii kiusausiiñŋagaa uqaluŋmikunnii, naaggaunnii taavrumaŋŋa uvlumiñ kialiqaa apiġisausiiŋagaa qanusipayaamik apiqqunmik.