Matthew 21 - Iñupiatun Mumiksat Uqalugiksuat

Jesus Isiġman Jerusalem-mun Kakaksiqł̣uni Umialiktun

¹ Tavra qallikamiŋ Jerusalem-mun tikisanikłutiŋ Bethphage-mun, Iġġiuramun atiqaqtuamun Olives, Jesus tiliŋagik malġuk iḷitchitqurak,

² uqallautivlugik, Aullaġitchik nunaaqqiñun akivsiññun, aasii tavrauvvaa paqinniaġiktik kakakti pituqaqtuak nuġġaŋalu. Pituiġḷugik qaġġisitkik uvamnun.

³ Iñuum kialiqaa uqallautikpatik qanuq, uqallakkumautik, Atanġum atuġukkik. Aasii ilaan aullaqtinniaġik tavrauvvaa.

⁴ Tavra taamna nalaunŋaruq taŋŋiutauvluni uqalugiŋaraanun uqaqtaata God-im, uqaqłuni inna,

⁵ “Uqallautisigik iñuŋi Zion, Uvva, umialivsi ullakkaasi! Kamasaaŋitchuq, suli kakaksiqsuq kakaktimi, nuġġaŋani kakaktim.”

⁶ Iḷitchitqurak aullaŋaruk aasii pivḷutik Jesus pitqutaatun inmiŋnun.

⁷ Iliŋikta qaġġisiŋagaak kakakti nuġġaŋalu, aasii ilaisa iḷianiŋmatigik annuġaatik kakaktiŋnun, Jesus kakaksirraqsiŋaruq.

⁸ Iñugiagniqsrat isivinŋagaich annuġaatiŋ apqutinun, allalli kivluiŋarut qisiqsiutinik napaaqtuniñ aasii iḷiuqqaqługich apqutinun.

⁹ Tavra iñusalaich pisuaqtuat sivuani tamatkualu aquaguaqtuat nipaalaŋarut, Hosanna. Nanġaqtauli Iġñiŋa David. God-im piḷḷuataqtilliuŋ qairuaq pisivlugu Ataniq. Nanġaqtauli God.

¹⁰ Tavra Jesus tikiñman Jerusalem-mun, iluqatiŋ iñuŋi iniqpaum piallaŋarut, apiqsruqtuqłutiŋ, Kiñauvvauna?

¹¹ Tavra iñusalaich uqaŋarut, Tavra uqaqtiŋa God-im, Jesus Nazareth-miñ Galilee-miittuamiñ.

Jesus Aŋaiyyuvikpaŋmuktuq

¹² Tavra Jesus isiŋaruq aŋaiyyuvikpaŋmun aasii anittaqługich iluqaisa tuniuqqairuallu tauqsiqsuqtuallu aŋaiyyuvikpaŋmi. Suli ulġuġaqługich taipuŋich manniqirit aquppiutaŋiḷḷu tamatkua tuniuqqairuat tiŋmianik.

¹³ Ilaan uqallautiŋagai, Aglausimaruq Bible-ni God uqallaŋanivḷugu, “Igluqpaga taggisiqaġniaqtuq iñupayaat aŋaiyyuyaqtuġviannik.” Aglaalli ilivsi iriqtuġviḷiutiŋagiksi tigligayuktinun.

¹⁴ Tavra ayauŋaruallu tusiattuallu ullautiŋarut Jesus-mun aŋaiyyuvikpaŋmi, aasii ilaan iłuaqsiŋagai.

¹⁵ Tavra tautukamisigik aliuġnaqtuat sut piraŋi Jesus, miqłiqtullu nipaalaruat aŋaiyyuvikpaŋmi, Nanġaqtauli Iġñiŋa David, aŋaiyyuliqsiqpaiḷḷu iḷisaurriḷḷu pitquranik sunŋutchaŋarut.

¹⁶ Tavra ilaisa uqallautiŋagaat Jesus, Tusaavigich makua qanuq uqaqtilaaŋat? Jesus uqallautiŋagai, Aaŋ. Taiguaŋaitpisi qaŋaunnii Bible-ni uqalugnik inna, “Miqłiqtut nanġaipkaŋagitin nanġautilluatamik.”

¹⁷ Tavra qimakługich, Jesus aullaŋaruq iniqpaŋmiñ Bethany-mun aasii siñiktaqłuni tavrani.

Jesus Tuqulipkaġaa Fig-mik Siiġñalik Napaaqtuq

¹⁸ Tavra uvlaami, utiqsaġniallaġmiŋ iniqpaŋmun, Jesus kaaliŋaruq.

¹⁹ Aasii tautukługu fig napaaqtua apqutit saniġaanni ullaŋagaa, aasii paqinŋaitchuq siiġñanik tamarra akutuqpaich kisimiŋ. Tavra ilaan uqallautiŋagaa napaaqtuq, Tavraŋŋaaglaan siiġñanik nauritqigñak. Tavra fig napaaqtua tuquliŋaruq tavrauvvaa.

²⁰ Iḷitchitqurat tautukamirruŋ aliuŋarut uqaqłutiŋ, Qanuqłuni manna fig napaaqtua tuquliva tavrauvvaa?

²¹ Tavra Jesus kiuŋagai, Iḷumun uqallautigivsi, ukpiġutiqaġuvsi sumikunnii nalupqisuŋiḷḷusi kisianik savaaqallayumiñaitchusi taavrumiŋa pirauruamik fig napaaqtuanun, aglaan uqallakkuvsiunnii uumuŋa iġġimun, Nuuttin, igitaugiñ taġiumun, taamna pirauyumiñaqtuq.

²² Suli supayaamik apiqsriguvsi aŋaiyyutigilugu, aitchuusiaġiniaġiksi ukpiġutiqaġuvsi.

Jesus Apiqsruqtauruq Ataniġnaqutaagun

²³ Tavra Jesus isiġman aŋaiyyuvikpaŋmun, aŋaiyyuliqsiqpaich umialignaŋisalu Jew-guruat ullaŋagaat iḷisaurripkaqtillugu, aasii uqallautivlugu, Sum ataniġnaqutaagun savaaġivigich tamatkua? Kia aitchuŋavatin taavrumiŋa ataniġnaqunmik?

²⁴ Jesus kiuŋagai, Uvvalivsauq apiġiniaġivsi apiqqunmik. Uqallautiguvsiŋa kiggutaanik, uvaŋalivsauq uqallautiniaġmigivsi sum ataniġnaqutaagun pisilaaŋannik tamatkua.

²⁵ Kia ataniġnaqutiksriñŋavauŋ John paptaiqsiñiksraŋagun, God-im naagga iñuich? Tavra iliŋich uqavaaqatigiirraqsiŋarut avanmun, Uqallakkupta God-miŋŋaqtauniḷugu, ilaan uqallautiniaġaatigut, Summanmi ukpiġiŋaitpisiuŋ John?

²⁶ Aglaan uqaġumiñaitchugut ataniġnaqutaa iñuŋniñ piñiḷugu, Qanuq sivuuġagigivut iñuich. Qanuq iñupayaat nalupqigiŋaitkaat John God-mun uqaqtautilaaŋa.

²⁷ Tavra kiuŋagaat Jesus, Nalurugut. Tavra ilaan uqallautiŋagai, Uvaŋaptauġli uqallautiyumiñaiñmigivsi kimun ataniġnaqutiksrisilaamnik tamatkuniŋa piyumiñaqsivḷuŋa.

Uuktuun Malġukkun Iġñikkun

²⁸ Qanuq isumavisi? Iñuk malġugnik iġñiqaŋaruq. Ilaan ullaŋagaa aŋayukłiq aasii uqallautivlugu, Iġñiiŋ, savagiaġiñ siiġñaqaġviŋmi uvlupak.

²⁹ Tavra ilaan kiuŋagaa, savagiaġuŋitchuŋa. Aquvatigun isumalitqikł̣uni savagiaŋaruq siiġñaqaġviŋmun.

³⁰ Aasii Aapaŋak ullautilgitchuq igḷuanun iġñiġmi aasii uqallautivlugu tainnatun suli. Tavra iġñiŋan kiuŋagaa, Aaŋ aapa. Savagiaġniaqtuŋa. Aglaan savagiaŋaitchuq.

³¹ Nalliakta nalautpauŋ aapami pisuutaa? Ilaisa kiuŋagaat, aŋayukłium. Jesus uqallautiŋagai, Iḷumun uqallautigivsi, tax-iñik katitchirit akiitchullu isiqqaaġniaqtut atanniqsimavianun God-im sivuliglusi.

³² Qanuq John Paptaiqsi qaiŋaruq ilivsiññun iḷisautivlusi nalaunŋaruakun iñuuniaġniġmik, aasii ilivsi ukpiġiŋaitkiksi. Aglaan tax-iñik katitchirit akiitchullu ukpiġiŋagaat, aasiiḷi ilivsi tautugluġisiunnii isumalitqiksuat, aquvatigununnii ukpiġiliŋaitkiksi isumalitqigḷusi.

Uuktuun Napaaqsiqiritigun Siiġñaqaġviŋmi

³³ Jesus uqallaŋaruq, Naalaksiuŋ allasuli uuktuun. Iñuqaŋaruq nunaqaqtuamik nautchirriiruamik siiġñaqaġviŋmik, aasii inillaiŋaruq saputinik avataagun kiavallakługu, nivaŋmivḷuni wine-liuġunnamik tavruŋa, nappaivḷuniḷu nasiqsruġviŋmik, aasii atukkirrutigivlugu napaaqsiqirinun, aasii ilaa aullaqłuni allamun nunamun.

³⁴ Tavra siiġñiviksraq qallimman, ilaan tiliŋagai kivgani napaaqsiqirinun, aitquvlugich autaaġusiaksrautini siiġñat.

³⁵ Tavrali napaaqsiqirit tiguŋagaich kivgaŋi aasii anaumiŋagaat iḷaŋat, tuqunmivḷugu alla, uyaġagnik miḷuqtuġmivḷugu alla.

³⁶ Tilisitqiŋalgitchuqsuli allanik kivganik, iñugianaaqługich sivulliġniñ, tainnatun piŋalgitkaich.

³⁷ Aquatigun ilaa tilisiŋaruq iġñiġmiñik ilaiññun uqaqłuni, Taluġiniaġaat iġñiġa.

³⁸ Tavra napaaqsiqirit tautukamirruŋ iġñiq, uqaurrutiŋarut inmiŋnun, Tamarra kiŋuvaannaktuksraun. Qaisitchi, tuqullakput piññaktaaġiluguasii kiŋuvaannaktaaksrautaa.

³⁹ Tavra tiguŋagaat aasii annisivlugu siiġñaqaġviŋmiñ, tuqunŋagaat.

⁴⁰ Tavra Jesus apiġiŋagai, Iñua siiġñaqaġvium qaigumi, qanuġniaqpagich taapkua napaaqsiqirit?

⁴¹ Ilaisa kiuŋagaat, Ilaan taapkua iñumaqłuich naŋinnaqtuakun tuqunniaġai, aasii atukkirrutigilugu siiġñaqaġvik allanun napaaqsiqirinun aitchuiyumiñaġniaqtuanun inmiñun siiġñanik piviksraŋatigun.

⁴² Jesus uqallautiŋagai, Qaŋaunnii taiguaġiŋaitpisiuŋ Bible uqaluŋiññi? “Kaŋiġalluŋmi uyaġagruaq, piitchuiññiqsrapiaq igluqpiruni, taamna igluqpirit iginŋagaat. Taamna piŋaruq nalaupiaqługu Atanġum sivunniuġutaa. Qanutun aliuġnaqtigirut ilaan piraŋi.”

⁴³ Tavrasuli Jesus uqallavsaaŋaruq, God-im atanniqsimaniaŋitkaasi, ukpiŋiññavsi, aasii atanniqsimalugich allat kamaksriyumiñaqtuat inmiñik, iñuatun siiġñaqaġvium qaitchiruatun siiġñaqaġviŋmiñik allanun aitchuiḷḷaruanun siiġñanik inmiñun piviksrakun.

⁴⁴ Aasii iñuk puukaqtuaq taavrumuŋa uyaġagmun kanuġġirauniaqtuq, aglaattauq taamna uyaġak kattaqinnikkumi iñuŋmik kanuġġiñiaġaa suksraunġipiaġlugu.

⁴⁵ Aŋaiyyuliqsiqpaiḷḷu Pharisees-lu tusaakamisigik Jesus uuktuutiŋi, puttuqsriŋarut ilaanun uqautigitilaamiŋnik.

⁴⁶ Tavra tigutaaqsaġumagaluaqamirruŋ ilaa, sivuuġagiŋagaich iñusalaich, qanuq ilaisa Jesus uqaqtaurualiŋagaat God-mun.