Matthew 2 - Iñupiatun Mumiksat Uqalugiksuat

Iḷitchiruat Qairut Paaŋŋamiñ

¹ Jesus aniŋaruq Bethlehem-mi Judea-miittuami, Herod umialgumman. Tavra Iḷitchiruat iñuich paaŋŋamiñ tikiññamiŋ Jerusalem-mun, apiqsriŋarut.

² Sumi imma aniva umialgat Jews? Tautuŋagikput uvluġiaŋa paaniinŋapta, aasiuvva qairugut sitquġvigiyaqtuqługu nanġaġukługu.

³ Herod-gum umialgum tusaakamiuŋ taamna, isumaaluliŋaruq iluqaġmiglu iñuŋi Jerusalem.

⁴ Aasii katitiłługich iluqaisa aŋaiyyuliqsiqpaich, iḷisaurriḷḷu pitquranik, apiqsruqtupiaŋagai sumi Christ aniyumaaġmagaan.

⁵ Ilaisa kiuŋagaat, nunaaqqimi Bethlehem-mi Judea-miittuami, qanuq God-im uqaqtaata aglaaġiŋagaa uqalua God-im inna,

⁶ “Aasii ilivsi, Bethlehem-miut, nunaŋani Judea-m, iñukiññiqsraugaluaqłusi akunġanni nunaaqqiŋisa Judah-m; iḷisimanaqsił̣haaġniaqtusi, qanuq ilivsiññiñ iḷari qaiñiaqtuq atanauraq atanniqsimannigniaqtuaq iñumnik.”

⁷ Tavraasii Herod qaitquŋagai iḷitchiruat nalunautchivḷuni apiqsruqtummaġiksaaŋagai nalupqinaimmaġiksisukługu qanuq iḷimman uvluġiaq niptaqtilaaŋanik.

⁸ Aasii ilaan tiliŋagai Bethlehem-mun, uqaqłuni, Aullaġlusi ivapiaġataġiaqsiuŋ miqłiqtuuraq. Aasii paqitanikkuvsiuŋ iḷitchuġipkaġumagivsiŋa, uvaŋaptauq ullakkumagiga sitquġvigiyaqtuġlugu.

⁹ Taavrumiŋa umialgum uqallautianiŋmatiŋ, aullaŋarut. Sua taamna, uvluġiaq tautuaġiŋakkaŋat paaniinnamiŋ aullarrigiŋagaat, nutqaġataqtillugu qulaanun miqłiqtum irviata.

¹⁰ Tautukamirruŋ uvluġiaq, quviasupiaġataŋarut.

¹¹ Aasii isiqłutiŋ iglumun tautuŋagaat miqłiqtuuraq aakaŋalu Mary, aasii sitquqłutiŋ nanġaŋagaat. Tavra aŋmaqługich suġalitiŋ, aitchuŋagaat aitchuutinik, manigñik kaviqsuanik, tivraġiksuaniglu, myrrh-niglu.

¹² Aasii kiliktauvlutiŋ siññaktukun utiquŋił̣ł̣ugich Herod-mun, utiqsaŋarut nunamiŋnun allakun apqutikun.

Pigruġniŋat Egypt-mun

¹³ Tavra iḷitchiruat aullaaniŋmata, isaġulga Atanġum niptaŋaruq Joseph-mun siññaktukun, aasii uqallautivlugu, Makittin. Pigruutikkik miqłiqtuq aakaŋalu Egypt-mun, aasii taamaniitchumausi uvamnun aullaqutchiaġilusi taamaŋŋa. Qanuq Herod ivaqłiayumalliqsuq miqłiqtumik tuqutchukługu.

¹⁴ Aasii unnuakun Joseph makinŋaruq pigruutivlugik miqłiqtuġlu aakaŋalu, aasii aullaqłutiŋ Egypt-mun.

¹⁵ Tavraniinŋarut Herod tuquniŋanunaglaan. Taamna taŋŋiutauŋaruq Atanġum uqalugiŋakkaŋanun ilaan uqaqtimigun, “Egypt-miñ qaitquŋagiga Iġñiġa.”

Miqłiqtut Tuquġaqtaurut

¹⁶ Tavra Herod, iḷitchuġikami sagluqitilaamiñik iḷitchiruanun, qinnalipiaġataŋaruq. Aasii piraksriiŋaruq tuquġaquvlugich iluqaisa aŋugaurat ukiuqaqtuat malġugnik naagga inuŋallaktuamik Bethlehem-miittuat iluqaaniḷu tamattumani nunami, miksrautchaqługu taimani nalupqinaiyaani iḷitchiruaniñ.

¹⁷ Tavrani taŋŋiqsauŋaruq Jeremiah-m God-im uqaqtaata uqautigiŋakkaŋa inna,

¹⁸ “Nipit tusaġnaqtut nunaaqqimi Ramah-mi, qiaqpaktuat isumaaqpakłutiŋ. Aakauruat isumaaqpaktut maŋŋuġmiktun Rachel-tun, qirratigivlugich miqłiqtutiŋ. Isumaaqpaił̣ł̣utiŋ quviasaaġnaiñŋarut, qanuq miqłiqtuŋich iluqaġmiŋ tuquŋarut.”

¹⁹ Tavra Herod tuqumman, isaġulga Atanġum niptaŋaruq siññaktukun Joseph-mun Egypt-mi uqaqłuni,

²⁰ Makittin. Aullautikkik miqłiqtuġlu aakaŋalu nunaŋannun Israel. Taipkua tuqutchiyumaruat miqłiqtumik tuquŋarut.

²¹ Tavra ilaa makinŋaruq, aasii aullautivlugik miqłiqtuġlu aakaŋalu nunaŋannun Israel.

²² Tavra tusaakamiuŋ Archelaus umialgutilaaŋanik Judea-mi, inaani aapami Herod tuquŋaruam, tavruŋaqsausiiñŋaruq, aasii kiliktauvluni siññaktukun, aullaŋaruq nunaŋiññun Galilee-m.

²³ Aasii iñuurraqsiŋaruq iniqpaŋani Nazareth, taamnaptauq uqautigiŋakkaŋat miqłiqtukun uqaqtiŋisa God-im taŋŋiqsauŋaruq inna, “Ilaa tairauniaqtuq Nazareth-miumik.”