Matthew 19 - Iñupiatun Mumiksat Uqalugiksuat

Jesus Iḷisaurriruq Avinnikun

¹ Tavra Jesus uqaŋaiqami tamatkuniŋa, aullaŋaruq Galilee-miñ aasii tikił̣ł̣uni nunaaqqiŋiñun Judea-m taavanitchiani kuugum Jordan.

² Tavra iñugiaktuat iñusalaich maliġuaŋagaat, aasii ilaan iłuaqsiŋagai naŋittuat tamaani.

³ Tavra Pharisees ullaŋagaat aasii uuktuaqsaqługu apiġivlugu, Nalaunŋava pitquratigun iñuum nuliani avitpagu sumigliqaa patchisiqaġlugu?

⁴ Jesus kiuŋagai, Taiguaġiŋaitpisiuŋ aullaqisaami iññiruamun taapkuŋniŋa savaŋatilaaŋa aŋunmiglu aġnamiglu?

⁵ Aasii uqallakłuni, Taamna pisigivlugu, aŋutim qimaguugik aapaniḷu aakaniḷu aasii nayuqsiutivlugu nuliani. Tavra iliŋik malġuuruak atautchisun iñuktun iḷiñiaqtuk.

⁶ Tavraŋŋaaglaan malġuuŋaiqsuk aglaan atausiŋŋuqtuk. Taamna pisigilugu, iñuum avinŋaiḷḷiuŋ tuvaaqatini God-im atautchimuktinŋammatik.

⁷ Pharisees uqallautiŋagaat, Moses suŋiññiŋagaa iñuk makpiġaamun aglagluni nalupqinaiġutinik avirrusiuqpan, aasii aullaqtillugu nuliani.

⁸ Jesus kiuŋagai, Pisigivlugu iḷisautitchiġiiññiqsi Moses avillayumiñaqtinŋagaasi nuliavsiññiñ. Aglaan isuaniñqaŋa tainnainŋaitkaluaqtuq.

⁹ Aasii uqallautigivsi, kialiqaa avirrusiġumiuŋ aġnaqtiŋ, allatuŋisuaqpan, aasii tuvaaqasiġḷuni allamik aġnamik allatuqtuaguruq.

¹⁰ Iḷitchitqurat uqallautiŋagaat, Tainna aŋun sivuniqaġniqpan tuvaaqanmigun, iłuałhaaġniqsuq tuvaaqatiniŋitchuni.

¹¹ Tavrali ilaan uqallautiŋagai, Taamna iḷisaurrun tamatkiġḷugich aŋutit sivuniqaŋitchuq, aglaan tamatkunuŋa God-im ikayukkaŋiñun iñuuyumiñaqsivḷugich taavrumuuna iḷisaurrutikun.

¹² Qanuq aŋutiqaqtuq aniŋavlutiŋ tainna tuvaaqasiġumiñaitchuanik, suli aŋutiqaġmiuq tuvaaqatinikkumiñaiyakkaŋiññik iñuich, aasiisuli aŋutiqaġmivḷuni tuvaaqatinikkumiñaiyaŋaruanik inmiŋnik savautisukługu taamna qiḷaŋmiittuaq. Iñuum akuqtuiyumiñaqtuam taavrumiŋa, akuqtuġliuŋ taamna iḷisaurrun.

Jesus Aŋaiyyutigai Miqłiqtuurat

¹³ Tavrani iñuich iḷaŋich qaġġirriŋarut miqłiqtunik Jesus-mun iḷitquvlugich argaŋi ilaiññun aŋaiyyutilugiḷḷu. Iḷitchitqurat suaŋagaich iñuich qaġġirriruat.

¹⁴ Tavra Jesus uqallaŋaruq, Miqłiqtuurat qaipkaqsigik uvamnun, suli pitquŋiññagich. Qanuq tainnaiḷiŋaruat atanniqsimagai Taavruma qiḷaŋmiittuam.

¹⁵ Tavraasii ilaan aksiukługich aŋaiyyutiqqaaqługich miqłiqtuurat, aullaŋaruq.

Suġalliruaq Nukatpiaq Iñuk

¹⁶ Tavra iñuk ullautiŋaruq Jesus-mun uqaqłuni, Iḷisaurrii, sumik savaalluatamik piruksrauvik isuitchuamik iñuggutinnagugluŋa?

¹⁷ Tavra Jesus uqallautiŋagaa, Summan apiġiviŋa sum nakuutilaaŋanik? Atausiuruq nakuuruaq. Iñuusarraqsisukkuvich kamagikkich God-im pitquraŋi.

¹⁸ Nukatpiam apiġiŋagaa, Nalliŋich? Tavra Jesus uqallaŋaruq, iñuaġnak, allatuġnak, tigliŋnak, saglutiginnignak,

¹⁹ suuŋiḷaġinagik aapallu aakallu, suli piviuttaġilugu siḷalliñ iliktun iḷiḷugu.

²⁰ Nukatpiaq uqallaŋaruq ilaanun, Tamatkua pitqurat iluqaisa kamagiŋagitka. Sumik minitchivik?

²¹ Jesus uqallautiŋagaa, Inuqsraŋaitchupiaġuvich, aullaġiñ, tunikkich supayaat pisin, aasii aitchuutigilugich maniich iḷiappauruanun, tavra piiḷḷiuġniaŋitchutin qiḷaŋmi. Aasii qaiḷutin, maliŋŋa.

²² Nukatpiam tusaakamiuŋ taamna, aullaŋaruq ipiqtutchakpakłuni, qanuq iñugiaktuanik suġaliqaŋaruq.

²³ Tavra Jesus uqallautiŋagai iḷitchitqurani, Iḷumun uqallautigivsi. Qanutun siġḷiġnaqtigiruq suġalliruam isiġniaġniksraŋa atanniqsimavianun Taavruma qiḷaŋmiittuam.

²⁴ Uqallautivsaaġivsi, siġḷiġnaił̣haaqtuq pikukturuaq kakakti isiqpan mitqutim iraagun, suġalliruam isiġniksraŋaniñ atanniqsimavianun God-im.

²⁵ Iḷitchitqurat tusaakamirruŋ taamna atqunaqłutiŋ qaallaŋarut uqaqłutiŋ, Kiñaasii annaurrauniaġniqpa?

²⁶ Tavra Jesus qiviaŋagai aasii uqallautivlugich, Iñuich taamna piyumiñaitkaluaġaat, aglaan God supayaanik piḷḷaruq.

²⁷ Tavra Peter uqallaŋaruq, Uvva uvagut qimaiŋarugut supayaanik aasii maliġuaqłutin. Sumik aasii piññagniaqpisa?

²⁸ Jesus uqallautiŋagai, Iḷumun uqallautigivsi. Nunatchiami, Iġñiŋa Iñuum aquvitpan kamanaqtuanun umialgum aquppiutaŋiñun, ilivsi iḷitchitqurat maliġuaŋaruasii uvamnik aquppiñiaġmiusi qulit malġugni umialgich aquppiutaŋiññi, isivġiġḷugich qulit malġugnik maŋŋuqaqtuat Israel.

²⁹ Suli kiñaliqaa qimaiŋaruaq iglunik naagga aniqatiinik naagga aapamiñik aakamiñiglu naagga miqłiqtunik naagga nunamiñik pisigiluŋa, aitchuusiaqaġniaqtuq tallimakipiaġuġlugu, suli kiŋuvaannagluni iñuggunmik isuitchuamik.

³⁰ Aglaan qaunagisitchi. Tamatkua salliuniataktuat paŋmapak qamalliġuurrauniaqtut taimanigu, aasii qamalliuruat salliġuutilutiŋ.