Matthew 18 - Iñupiatun Mumiksat Uqalugiksuat

Kiña Kamanaġniqsrauva?

¹ Tavra tavrani iḷitchitqurat ullautiŋarut Jesus-mun, apiqsrivḷutiŋ, Kiña kamanaġniqsrauva atanniqsimaviani Taavruma qiḷaŋmiittuam?

² Tavra Jesus tuksiaqługu inmiñun miqłiqtuuraq inillaŋagaa qitqannun,

³ aasii uqallakłuni, Iḷumun uqallautigivsi, ilivsi isumalitqiŋisuaġuvsi aasii iḷiḷusi miqłiqtutun, sumikunnii isiġumiñaitchusi atanniqsimavianun Taavruma qiḷaŋmiittuam.

⁴ Kiñaliqaa kamanaqsiḷiŋaiġumi inmiñik uuma miqłiqtum irrusiatun iḷiḷuni ilaa kamanaġniqsrauruq atanniqsimaviani Taavruma qiḷaŋmiittuam.

⁵ Iñuum paġlakpauŋ miqłiqtuuraq uvaŋa pisigiluŋa, uvaŋa paġlagaaŋa.

Piḷuksipkaqtinniaġutit

⁶ Kialiqaa ukpiġutaiqsitpagu iḷaŋat makua miqłiqtuuratun iḷivḷutiŋ ukpiqtuat uvamnun, iłuałhaaġayaqtuq uyaġagruaġmik quŋusiġutchiġḷugu ipipkaqpan itiniŋanun taġium.

⁷ Qanutun naglignaqtigirut nunam iñuŋi ukpiġutaiqsitchiruat iñuŋnik. Tainnainniaġniqsuq ataramik, aglaan qanutun naglignaqtigiruq ukpiġutaiqsitchiruaq iñuŋnik.

⁸ Tavra argavsi naagga isigavsi piḷuksipkaqpasi, iñuusitchi argaiqsuatun naagga isigaiqsuatun piḷusi. Iłuałhaaġayaqtuq isiġuvsi atanniqsimavianun God-im argaiḷḷusiunnii naagga isiġaiḷḷusi piqaġniġmiñ iluqaaktun argaqaġlusi isigaqaġlusiḷu igitauniġmiñ isuitchuamun igniġmun.

⁹ Suli irivsi piḷuksipkaqpasi, iñuusitchi iraiqsuatun piḷusi. Iłuałhaaġayaqtuq isiġuvsi atanniqsimavianun God-im atautchimik iriqaġlusi malġugnik iriqaġluni igitauniġmiñ nagliksaaġvium igniŋanun.

Uuktuun Tammaŋaruakun Imnaikun

¹⁰ Qaunagisitchi suuŋiḷaġitchaiḷisiuŋ atausiqunnii makua iḷaŋat miqłiqtutun iḷivḷuni ukpiqtuaguruaq uvamnun. Qanuq uqallautigivsi, qiḷaŋmi isaġuliŋich qakuguliqaa ullautillarut Aapamnun qiḷaŋmiittuamun.

¹¹ [Qanuq Iġñiŋa Iñuum qaiŋaruq annautiyaqtuqługich tammaŋaruat.]

¹² Qanuq isumavisi? Iñuk tallimakipiamik imnaiqaġumi, aasii iḷaŋat tammaġluni, qimagniaŋitpagich tallimakipiaġuutaitchuat qimialuŋnun aasii ivaaqsiḷugu atausiq tammaqtuaq imnaiq?

¹³ Iḷumun uqallautigivsi, paqitkumiuŋ ilaa quviasuuttaqałhaaqtuq taavrumuŋa atautchimun imnaimun ukunaŋŋa tallimakipiaġuutaitchuaniñ imnaiñiñ tammaŋaitchuaniñ.

¹⁴ Tavra pisuutigiŋitkaa Aapavsi qiḷaŋmiittuam atausiqunnii iḷaŋat makua miqłiqtutun iḷivḷutiŋ ukpiliŋaruat tammaqulugu.

Aniqan Piḷuksiruaq Iliŋnun

¹⁵ Aniqatin piḷuksikpan iliŋnun kisivich ullaglugu uqallauttuuŋ pimaqłuutaanik, ilipkullu ilaagullu. Naalaġnikpatin atisiqatigilutin utiqtitqikkiñ aniqatin.

¹⁶ Aglaan atisiqatigisuŋitpatin, ullatqikkumagiñ piqasiġḷutin atautchimik naagga malġugnik iñuŋnik iḷisimaruksragnik sunik uqautiŋnik ilaanun. Tainna piguvich, kamaksriñiaqtutin pitquranik uqaluqaqtuanik inna, “Pasikkutipayaaq ukpiġnaqsiñiaqtuq iḷumun itilaaŋanik malġugnik naagga piŋasunik iḷisimariqaġluni.”

¹⁷ Naalaġnisuŋiḷgitpan, quliaqtuaġili aŋaiyyuliqiruanun, aasii naalaġnisuŋiḷgitpan aŋaiyyuliqiruanik iḷiuqsiuŋ aunniuġutiŋaisavsisun katitchiritullu tax-iñik.

Piñaiḷat Piñaqtuallu

¹⁸ Iḷumun uqallautigivsi, sunapayaaq piñaisitaqsi nunami piñaisinniaġmigaa Taavruma qiḷaŋmiittuam. Suli sunaliqaa pipkallakkaqsi nunami pipkallaniaġmigaa Taavruma qiḷaŋmiittuam.

¹⁹ Uqallautivsaaġivsi, atisiḷutik malġuulutik sunapayaaq nunami apiqsriaġiguptitku aŋaiyyulutik, pipkaġniaġaa iliptiŋnun Aapama qiḷaŋmiittuam.

²⁰ Qanuq sumun malġuk naagga piŋasut katinmata pisigivluŋa, tavraniinmiuŋa piqatigivlugich.

Uuktuun Suliqutigiŋaiksiŋitchuakun Kivgakun

²¹ Tavrani Peter ullautiŋaruq Jesus-mun aasii apiġivlugu, Ataniiq, qavsiiqsuaġlugu suliqutigiŋaiġñiaqpigu itqaumayumiñaiġḷugich piḷuksigaluamiiqpan aniqatiga uvamnun? Tallimat malġuiqsuaġlugu?

²² Jesus kiuŋagaa, Naumi, tallimat malġuŋiḷaaŋni, aglaan qanutupayauraq suliqutigiŋaigaksraukpan.

²³ Tavra inna ittuq atanniqsimmataa qiḷaŋmiittuam iñuŋnun. Umialiktun ittuq piyummatiniktuatun iłuaqsruisukłuni akiiḷaŋiññik kivgami.

²⁴ Makpiġarriqisaaniŋman, iñuk qaġġirrauŋaruq ilaanun akiiḷaqtuqpauraqtuaq maniŋñik.

²⁵ Tavra akiḷiiyumiñaiñman, atanġata tunirautquŋagaa, piqatigilugich nuliaŋalu miqłiqtuŋiḷu supayaallu pigikkaŋi, aasii akiḷiutigilugich akiiḷaŋiñun.

²⁶ Tavra kivgam sitquqami qiññuaqtulavigiaqsiŋagaa, Ataniiq, qiñuirrutiqallagiñ uvamnun, akiḷiiviginiaġikpiñ iluqaiññik akiiḷamnik.

²⁷ Tavra naglikkiagutivlugu atanġata aullaqtitkaa suliqutigiŋaiqł̣ugich akiiḷaŋi.

²⁸ Tavraliasii taamna kivgaq, anisaġniallaġmi, kasuġniġaa iḷaŋat kivgauqatimi akiiḷałauraqtuaq inmiñiñ maniŋñik, aasii tigguġlukamiuŋ nunuiñiaqsautigillaan uqallautivlugu, Akiḷiigiñ akiiḷaġnik uvamnun.

²⁹ Tavra kivgauqataa punŋaruq aasii qiññulaaqsivḷugu, Qiñuirrutiqaġiñ uvamnun, akiḷiiviginiaġikpiñ.

³⁰ Tavra tainna pisuŋiñŋaruq aasii aullautivlugu isiŋagaa tigutaaġviŋmun akiḷiitchiaġisaqługu akiiḷaŋiñik.

³¹ Allat kivgauqatiŋisa iḷitchuġikamirruŋ piruaq taavrumiŋa, atqunaq iłuiḷḷiuġutigiŋagaat, aasii aullaqłutiŋ quliaqtuaġutivlugu ataniqtiŋ taavrumiŋa iluqaanik piruamik.

³² Tavra atanġata qaitquŋagaa taamna kivgaq aasii uqallautivlugu, Ilivich piḷuktuatiin kivgaaq. Suliqutigiŋaiŋagikpiñ iluqaanik taavrumiŋa akiiḷaqpauraġnik qanuq iŋiulakamŋa.

³³ Tainnatulli naglikkutiqaqtuksrauŋagaluaqtutin kivgauqatiŋnun, uvaptun naglikkutiqaŋaruatun iliŋnun.

³⁴ Tavra qinnautivlugu atanġata aitchuutigiŋagaa tigutaaqtaliqirinun tatavsaqtautquvlugu akiḷiitchiaġisaqługu iluqaiññik akiiḷaŋiñik.

³⁵ Tasamma tainnatuttauq Aapama qiḷaŋmiittuam piñiaġmigaasi iluqasi, ilivsi iḷumutun suliqutigiŋaiḷaitkuvsiuŋ itqaumayumiñaiġḷugu aniqativsi piḷuutaa ilivsiññun.